Dili Ba Paigo ang Oras sa Adlaw? Aniay Paagi Unsaon nga Magamit og maayo ang Imong Panahon

Ni Heather J. Johnson

Ang paghimo og tumong makatabang nga makahimo kita og tukmang mga plano sa atong kinabuhi.

Dili Ba Paigo ang Oras sa Adlaw? Aniay Paagi Unsaon nga Magamit og Maayo ang Imong Panahon

Kon planohon nato ang atong kinabuhi ug gamiton sa maalamong paagi ang atong panahon, panalanginan ug palamboon kita sa Ginoo aron makaserbisyo og maayo sa Iyang gingharian. Ang paggamit sa mosunod nga mga baruganan makatabang nga kita makaangkon og mabungahong kinabuhi ug maandam alang sa kahimayaan.*

Bahin-bahina ang mga tumong ngadto sa mas dali rang mahimo nga mga bahin.

Sa matag dagko natong gihimo nga tumong, pwede nato kining mabahin-bahin ngadto sa tulo ka matang sa mga tumong. Dayon atong matino unsang inadlaw nga tahas ang angay natong buhaton sa pagkab-ot sa atong mga tumong.

1. Taas og tagal nga mga tumong. Mao kini ang nagpatigbabaw, nag-unang mga tumong. Isip usa ka sanglitanan pwede kitang maghimo og tumong sama sa “moangkon og propesyonal nga panginabuhian diin ako makasangkap sa akong kaugalingon ug niadtong akong atimanunon.”

2. Dili kaayo lisud nga mga tumong. Mga tumong kini nga mas piho nga mogiya kaninyo sa pagkab-ot sa inyong taas og tagal nga tumong, sama sa “pag-angkon og usa ka kurso sa kolehiyo.”

3. Mubo og tagal nga mga tumong. Kini nga mga tumong imong makompleto sa mubo ra nga panahon. Ang pagkompleto niini makapaduol kanimo sa pagkompleto sa imong dili kaayo lisud ug taas og tagal nga mga tumong. Usa ka pananglitan sa mubo og tagal nga tumong tingali mao ang “dili gayud makapalta sa klase niini nga semester.”

4. Inadlaw nga mga buluhaton. Ang mga butang nga buhaton nato matag adlaw kinahanglang mogiya kanato sa pagkab-ot sa atong mga tumong. Ang inadlaw nga buluhaton tingali mao ang “[pag]kompleto sa mga buluhaton sa klase nga kinahanglanon na ugma.”

Maghimo og mga tumong sa pipila ka mga dapit.

Ang sundanan nga gihatag diha sa ibabaw pweding magamit sa paghimo og mga tumong sa tanang dapit sa atong kinabuhi. Si Elder Robert D. Hales (1932–2017) sa Korum sa Napulog Duha ka mga Apostoles mitambag kanato sa pagtutok niining upat ka dapit:

• Espiritwal nga paglambo

• Pisikal nga paglambo

• Edukasyonal, personal, ug pagpalambo sa panginabuhian

• Pagkalungsuranon ug sosyal nga paglambo.¹

Samtang naghimo kita og mga tumong niining mga dapita, kinahanglang tumanon nato kini nga tambag gikan ni Presidente M. Russell Ballard, Akting nga Presidente sa Korum sa Napulog Duha ka mga Apostoles, diha sa atong hunahuna: “Pagtakda og mga tumong nga maayong pagkabalanse—dili labihan kadaghan dili sab labihan ka diyutay, ug dili labihan ka taas o labihan ka ubos. Isulat ang inyong makab-ot ra nga mga tumong ug trabahoa kini sumala sa importansya niini. Pag-ampo alang sa balaanong giya sa imong paghimo og tumong.”²

Mas mahisama kita kang Kristo.

Kon maghimo kita og matarung nga mga tumong ug idumala og tarung ang atong panahon sa pagkab-ot niini, mas mahisama kita kang Jesukristo. Si Elder Neal A. Maxwell (1926–2004) sa Korum sa Napulog Duha ka mga Apostoles miingon, “Nagpasalamat ako kang [Kristo] sa katingalahan niyang pagdumala sa panahon, sa walay pag-usik og gutlo, lakip sa mga gutlo sa pagpamalandong. Gani ang matag gutlo sa iyang kinabuhi nagpakita sa iyang pagkatinugyanan.”³

Mubo nga mga sulat

1. Gikuha gikan sa The Gospel and the Productive Life (2017), Student and Teacher Manuals, “Chapter 3: Setting Goals and Managing Time.”

2. Tan-awa sa Robert D. Hales, “Fulfilling Our Duty to God,” Ensign, Nob. 2001, 39.

3. M. Russell Ballard, “Keeping Life’s Demands in Balance,” Ensign, Mayo 1987, 14.

4. Neal A. Maxwell, “Jesus of Nazareth, Savior and King,” Ensign, Mayo 1976, 27.

Si Heather J. Johnson usa ka tigsulat ug editor. Ganahan siya og water skiing ug mosuroy sa kabukiran panahon sa tingtugnaw. Ang listahan sa iyang pagbasa nagpabor sa literatura sa Britanya, ug girekomendar niya ang paggamit sa “y’all” sa matag adlaw nga panag-istorya.

Pagdiskobre pa og Daghan

Susiha ang ubang gi-feature nga mga artikulo kon unsaon sa paghimo og kalainan isip young adult diha sa young adult nga seksyon sa Pebrero 2019 nga Liahona.