Gipanalipdan sa mga Pakigsaad
Ang tagsulat nagpuyo sa Hawai‘i, USA.
Ang gahum ug panalipod nga gisaad niadtong kinsa matinud-anong magsul-ob sa garment sa templo wala maggikan sa magic; nagagikan kini sa Dios.
Ang akong gugma sa pagsul-ob sa garment sa templo dili masulti sa hingpit sa mga pulong. Bisan og ang pisikal nga materyal nga maoy gihimo sa garment gaan ug dili kaayo mamatikdan sa dihang naanad na ko, unsa ang girepresentaran sa garment, ang mga panalangin nga uban niini, ug ang mga panalangin nga moabut niini, ug ang akong dayag nga pagpakita sa akong kaugalingong pasalig ngadto sa Dios—ug sa akong gugma alang sa Dios—nga sa pagsul-ob niini kada adlaw usa ka maanindot ug espirituhanong kasinatian. Kini ang kalinaw. Kini ang kalig-on. Kini ang kakalma. Kini ang gahum. Kini ang balaan. Kini usa ka panalangin sa akong kinabuhi kon ako maningkamot.
Usahay ang mga tawo mokonsiderar sa garment nga usa lang ka underwear, o yanong paagi sa pagsukod sa kaligdong, gitumong sa pagpakita kanila unsay ilang masul-ob o dili—sa gusto lang unsay desente ug dili desente. Ug samtang ang sakto nga pagsul-ob sa garment sa tinuod nag-awhag og kaligdong (ilabi na sa mga sumbanan sa kalibutan), ang garment sa balaan nga pagkapari nagrepresentar og mas labaw pa.
Gamhanang Mahangturong Panglantaw
Nadawat nako ang akong kaugalingon nga pagtuga sa edad nga 19 agig pagpangandam sa akong kaminyoon sa templo. Ug samtang ang dili maayong sirkumstansya maoy nakaingon nga natapos ang kaminyoon, nagmatinud-anon ko sa akong mga pakigsaad, ug kadtong mga pakigsaad nga akong gihimo sa Ginoo nagpabilin. Nagpabilin ko nga matinud-anon ug kini nakapalig-on kanako. Wala ko mag-inusara sa akong mga pagsulay ug ako nahimong mas lig-on tungod niini.
Nakadawat ko og daghang mga panalangin sa padayon nga paghupot og rekomend sa templo, sa pagsul-ob sa sakto sa garment sumala sa gisugo, ug tungod sa pagtuman sa mga pakigsaad nga akong gihimo sa templo. Bisan og imposible sa paghingalan sa matag panalangin tungod niini nga pagkamasulundon, ang labing klaro nga akong namatikdan mao ang abilidad sa pagpadayon sa langitnong panglantaw ug sa kanunay nga pisikal nga pahinumdom sa paghimo og sakto nga mga pagpili bisan ang uban sa akong palibut wala maghimo og sakto nga pagpili—ug bisan kon ang mga pagpili sa uban makahatag nako og kasakit.
Daghan ang dili maayo sa akong kinabuhi sa milabay nga 11 ka tuig (ang labing dili maayo naglakip sa diborsyo, grabing problema sa kwarta, ug pagkahigawad sa panarbaho ug personal nga mga problema), apan ang kanunay nga pagsul-ob sa garment ug kanunay nga pag-adto sa templo nakatabang nako nga makahibalo nga aduna pay nindot niining kinabuhia kay sa bisan unsa nga pagsulay nga akong nasinati niining higayuna—bisan unsa pa kalisud o kasakit ang matag higayon.
Tungod niining duha ka kanunay nakatabang nako nga magpabilin nga duol sa Espiritu, gigiyahan ko nga makalingkawas sa pisikal nga kakuyaw uban sa mahangturong mga pag-aghat nga akong gipili nga sundon—ug ako gihatagan usab og dakong pagbati nga paglaum ug mahangturong panglantaw nga migiya nako agi sa malisud nga mga pagsulay sa dihang gibati nako nga wala na koy kusog sa paghimo pa sa emosyonal ug pisikal nga lakang sa pagpadayon sa akong panaw. Kini nga kalinaw nagpadayon sa pagtabang nako kon moabut ang bag-ong mga hagit ug mga pagsulay.
Ang mga panalangin gikan sa templo nga akong nasinati gikan sa matag adlaw usahay atong gibaliwala (sama sa kalinaw sa kaugalingon ug mga pag-aghat), ngadto sa maukyabon, walay katapusan, ug klaro (sama sa kahangturan nga mabugkos sa atong mga pamilya). Ang kasinatian sa matag indibidwal talagsaon ug personal—apan ang mga panalangin kanunay nga moabut kanato sa tukma nga tayming sa Ginoo kon kita motuman sa atong mga pakigsaad (tan-awa sa Doktrina ug mga Pakigsaad 82:10). Ang pagsul-ob sa garment usa ka importante, personal nga paagi sa pagpakita sa Ginoo nga nahinumdom kita sa atong mga pakigsaad.
Kanunay nga Espirituhanong Panalipod
Si Presidente Boyd K. Packer (1924–2015), Presidente sa Korum sa Napulog Duha ka mga Apostoles, mipasabut nga usa sa mga panalangin nga atong mapaabut kon kita mosul-ob sa garment sa hustong paagi: “Ang garment nagrepresentar sa sagrado nga mga pakigsaad. Nag-awhag kini og kaligdong ug mahimong panalipod ug proteksyon sa nagsul-ob.”1
Kini nga panalipod makahatag nato og proteksyon sa unsay gitawag ni Nephi nga “nagdilaab nga mga pana sa kaaway” (1 Nephi 15:24). Kon kita mobana-bana pila ka mga pana ang gitira ni Satanas kanato matag adlaw, sa akong hunahuna daghan kaayo. Nagpuyo kita sa kalibutan nga aktibong nagtinguha sa paglaglag sa unsay atong gituohan. Ang dili maayo nga mga imahe ug mga mensahe naglibut kanato bisan asa, uban sa mga pagpamugos sa paggamit og makadaot nga mga tambal o paglapas sa balaod sa kaputli. Gani naghitak ang pagpamugos ug tintasyon sa pakiglalis ug dili mabination, bisan sa personal o ilabi na sa online; sa pagbiay-biay o pag-insulto sa uban tungod sa pagpadayag sa ilang mga opinyon o mga pagtuo; o sa pagsulog-sulog sa tawo sa butang nga gamay ra kaayo sama sa sayop sa gramatika. Kining espirituhanong mga pag-ataki, kon patalinghugan, makapakunhod sa atong abilidad sa pagsabut sa mga pasidaan gikan sa Espiritu Santo.
Ang lista sa “nagdilaab nga mga pana” nga gilabay ni Satanas kanato sa tinuod walay katapusan ug kanunay nga makuyaw. Si Elder Taniela B. Wakolo sa Seventy miingon, “Ang daghang babag ug mga tintasyon sa kinabuhi mao ang ‘lobo nga manunukob.’” Mao nga unsaon nato pagpanalipod ang atong kaugalingon? Unya nianang sama nga pakigpulong, midugang siya, “Mosaad ko nga ang pag-apil sa mga ordinansa ug pagtahud sa kaubang mga pakigsaad magdala kaninyo og talagsaong kahayag ug proteksyon niining padayong nagkangitngit nga kalibutan.”2
Kon ang “mga pana” nga gilabay ni Satanas kaninyo matag adlaw literal nga hait nga mga butang nga inyong makita ug mabati, ibilin ba ninyo ang panalipod sa inyong balay? Ibaliwala ba ninyo ang kahibalo unsaon sa pagpanalipod sa inyong kaugalingon—o ang dalan ngadto sa dapit nga kadangpan? Langayon ba ninyo ang paghimo o pagtuman sa mga pakigsaad uban sa Dios sa dihang Siya misaad nga kadtong mga pakigsaad makatabang kaninyo nga magmadaugon?
Ang Gahum sa mga Pakigsaad sa Atong Kauswagan
Ang proteksyon nga ikahatag sa garment wala maggikan sa bisan unsa nga matang sa magic diha sa pisikal nga garment mismo, sama sa sayop nga pagtuo sa uban. Hinoon, ang gisaad nga proteksyon mao ang proteksyon nga gihatag sa Ginoo sa pisikal ug espirituhanon nga paagi kon kita motuman sa atong mga pakigsaad ug mopadayag sa atong matinud-anong pasalig ngadto Kaniya matag adlaw.
Ang mga pakigsaad sa templo ug ang garment dili alang sa hingpit nga mga tawo. Kini gitumong sa pagpanalipod sa dili hingpit nga mga tawo kinsa naningkamot sa ilang labing maayo nga mahimong mas maayo. Mga tawo kinsa maghinulsol kon sila mapukan ug mopadayon. Mga tawo nga sama kaninyo ug kanako.
Sama nga kita pisikal nga moambit sa sakrament matag semana aron makahinumdom ug makabag-o sa atong mga pakigsaad sa bunyag, ang pagsul-ob sa garment matag adlaw magsilbi nga usa ka pisikal nga pahinumdom sa mga pakigsaad nga atong gihimo sa templo. Mao kini ang mga butang nga gikinahanglan nato sa atong panaw aron mahimong mas sama ni Kristo.
Lapas sa balaang proteksyon, ang pagtuman sa atong mga pakigsaad ug pagsul-ob sa garment mao ang paagi sa pagpakita sa Dios matag adlaw kon unsa ka dako ang atong gugma Kaniya, ug nga kita mosunod sa Iyang mga sugo tungod kay kita nahigugma Kaniya—ug kini mao ang paagi alang nato sa pagdawat sa daghang mga panalangin nga gusto sa Dios nga ihatag kanato. Tinuod siyang nahigugma kanato labaw kay sa atong masabtan ug Siya gusto nga kita luwas ug adunay proteksyon nga Iyang gisaad.
Bulahan Matag Adlaw
Kitang tanan nakig-away sa usa ka espirituhanong panggubatan matag adlaw, nakaamgo man kita o wala. Ang mga pakigsaad nga gihimo sa templo ug gituman sa atong matag adlaw nga kinabuhi makatabang nato nga modaug sa gubat batok sa sala ug ni Satanas, apan anaa ra kanato sa pagpangandam—ug dayon magmatinud-anon.
Malipayon kaayo ko sa akong desisyon nga moadto sa templo—ug sa misunod nga mga desisyon nga akong nahimo sa pagtuman sa akong mga pakigsaad. Gipanalanginan ako matag adlaw tungod sa akong pagpili ug sa sakto nga pagsul-ob sa garment, sama sa akong gipakigsaad nga buhaton. Nakahimo kini nako nga luwas. Nagpahinumdom kini nako sa akong mga pakigsaad. Ug kini nagpakita sa Dios nga ako nahigugma Kaniya labaw pa kay sa kalibutan ug nga ako mobuhat unsay Iyang gisugo kanako nga akong buhaton.