Pagkonektar sa mga Anak nga Babaye sa Dios uban sa Iyang Gahum sa Pagkapari [Priesthood]
Ang mga babaye importante nga mga partisipante sa buhat sa Dios nga matuman pinaagi sa Iyang gahum sa pagkapari.
Litrato sa babaye nga nagtan-aw sa Oakland California Temple
Nakaamgo ko nga wala sukad mahitabo kaniadto sa kaimportante sa pagsabut sa pagkapari ug sa nag-uban nga mga panalangin alang sa kababayen-an. Nagpuyo kita sa usa ka panahon nga ang pagkaangay, gahum, kaangayan, ug pagkamatugtanon gihisgutan—sa kasagaran labaw sa mga hiyas. Labaw pa niana, ang pagkatawo, awtoridad, pagkaespirituhanon, ug bisan ang Dios mao ang mga hilisgutan sa dakong kalibug alang sa kadaghanan.
Daghang kababayen-an, wala makahibalo unsa nga mga panalangin nga anaa alang kanila, wala magpahimulos sa hingpit nga magbusog sa espirituhanong paagi nga anaa alang kanila. Daghang mga lalaki naglibog usab sa hilisgutan.
Unsaon nato nga mas makasabut sa koneksyon sa kababayen-an sa gahum sa pagkapari ug pagtabang kanila “sa pag-abante,” sa “pag-angkon sa [ilang] tukma ug importanting dapit diha sa [ilang] panimalay, sa [ilang] komunidad, ug sa gingharian sa Dios—labaw pa kay sa [ilang] nabuhat sukad”?1 Una, mapainubsanon kitang magtinguha sa pagsabut sa mga kamatuoran nga may kalabutan sa pagkapari, ilabi na sa labing bag-ong mga pagtulun-an sa mga lider sa Simbahan. Ikaduha, kita makatinguha sa pagsabut ngano nga ang pipila ka babaye wala makaamgo sa hingpit sa ilang kahigayunan sa paggamit sa gahum sa pagkapari. Ikatulo, makahibalo kita unsaon nga kita makatabang sa kababayen-an nga moapil sa hingpit sa buhat nga himoon sa Dios pinaagi sa Iyang gahum sa pagkapari.
1. Unsa nga mga Kamatuoran ang Naklaro Kabahin sa Kababayen-an ug sa Pagkapari [Priesthood]?
Ang mga apostoles ug ang mga lider sa auxiliary sa kinatibuk-ang mga babaye karong bag-o gihatagan og dugang pagpasabut sa relasyon sa kababayen-an ug sa pagkapari. Ang mosunod mao ang mga kamatuoran nga importante nga masabtan ug matudlo sa saktong paagi.
Ang pagkapari mao ang gahum ug awtoridad sa Dios.
Ang pagkapari mao ang gahum diin ang Dios makatuman sa Iyang importante nga buhat sa kaluwasan, pagpahinabo “sa pagka-imortal ug kinabuhing dayon sa tawo” (Moises 1:39). Ang mga lalaki ug mga babaye adunay importante nga tahas sa buhat sa Dios, ug ang kalalakin-an ug kababayen-an makagamit sa Iyang gahum sa pagtuman sa Iyang buhat.
Ang kababayen-an adunay opisyal ug importante nga tahas sa buhat sa kaluwasan.
Si Bonnie L. Oscarson, kanhi Kinatibuk-ang Presidente sa Young Women, mipahayag: “Ang tanang kababayen-an kinahanglang makakita sa ilang kaugalingon isip mahinungdanong mga sumasalmot diha sa buhat sa pagkapari [priesthood]. Ang kababayen-an niini nga Simbahan mga presidente, mga counselor, mga magtutudlo, mga sakop sa mga council, mga igsoong babaye, ug mga inahan, ug ang gingharian sa Dios dili makalihok gawas kon kita mobarug ug motuman sa atong mga katungdanan uban sa hugot nga pagtuo.”2
Si Presidente Gordon B. Hinckley (1910–2008) mitudlo, “Gihatagan sa Dios ang mga babaye niini nga Simbahan og buluhaton sa pagtukod sa iyang gingharian. Naglakip kini sa tanang aspeto sa tulo nato ka dakong responsibilidad—nga mao ang, una pagtudlo sa ebanghelyo sa kalibutan; ikaduha, paglig-on sa pagtuo ug pagdugang sa kalipay sa mga miyembro sa Simbahan; ug ang ikatulo, sa pagpadayon sa talagsaong buhat sa kaluwasan alang sa mga patay.
“Ang mga babaye sa Simbahan maoy kauban sa ilang mga kalalakin-an nga magpadayon kining talagsaong buhat sa Ginoo. … Ang mga babaye nagdala og dagko kaayong responsibilidad ug sila ang responsable sa katumanan niini nga mga responsibilidad. Nagdumala sila sa kaugalingon nilang mga organisasyon, ug lig-on kana nga mga organisasyon ug matunhayon ug makahuluganon kining mga pwersa sa kamaayo dinhi sa kalibutan. Giila sila nga usa ka kauban sa buluhaton [sa mga tighupot] sa pagkapari, tanan naningkamot nga matukod ang gingharian sa Dios dinhi sa yuta. Gitahud namo ug girespeto ang inyong kapasidad. Gilauman namo ang inyong pagpangulo, ug kalig-on, ug impresibong mga resulta sa inyong pagdumala sa mga organisasyon diin kamo ang responsable. Suportahan ug paluyohan namo kamo isip mga anak sa Dios, nga nagtrabaho sa talagsaong pakig-alayon sa pag-abag kaniya nga mapahinabo ang pagka-imortal ug kinabuhing dayon sa tanang anak sa Dios.”3
Ang kalalakin-an ug kababayen-an tugyanan sa gahum ug awtoridad niadtong kinsa naghupot sa mga yawe sa pagkapari.
Ang mga yawe sa pagkapari mao “ang awtoridad nga gihatag sa Dios ngadto sa [mga naghupot sa] pagkapari aron pagmando, pagkontrolar, ug pagdumala sa paggamit sa Iyang pagkapari dinhi sa yuta.”4 Si Presidente Dallin H. Oaks, Unang Magtatambag sa Unang Kapangulohan, mipasabut, “Matag buhat o ordinansa nga gipahigayon sa Simbahan gihimo ubos sa direkta o dili direkta nga pagtugot sa tawo nga naghupot sa mga yawe niana nga kalihokan.”5
Ang kababayen-an adunay awtoridad sa pagpahigayon sa ilang mga calling, ubos sa direksyon sa usa ka tawo nga naghupot sa mga yawe sa pagkapari, sama sa kalalakin-an. Si Presidente M. Russell Ballard, Akting Presidente sa Korum sa Napulog Duha ka mga Apostoles, mipahayag, “Kadtong adunay mga yawe sa pagkapari [priesthood] … sa tinuoray naghimong posible nga ang tanan kinsa matinud-anong naghago ubos sa ilang direksyon makagamit sa awtoridad sa pagkapari ug makagamit sa gahum sa pagkapari.”6
“Wala kita maanad nga mosulti bahin sa kababayen-an nga dunay awtoridad sa pagkapari [priesthood] diha sa ilang mga calling sa Simbahan, apan unsa man diay kanang laing awtoridad? Kon ang usa ka babaye—batan-on o tigulang—i-set apart sa pagsangyaw sa ebanghelyo isip full-time nga misyonaryo, gihatagan siya og awtoridad sa pagkapari sa pagpahigayon og buluhaton sa pagkapari. Ingon usab niana kon ang usa ka babaye i-set apart aron molihok isip opisyal o magtutudlo diha sa organisasyon sa Simbahan ubos sa pagdumala sa tawo nga naghupot sa mga yawe sa pagkapari.”7
Kon magtudlo niini nga konsepto sa akong mga estudyante, kanunay kong mangutana, “Kon ang stake adunay hiniusa nga miting sa kapangulohan sa Young Men ug Young Women, kinsa ang modumala?” Tungod kay ang presidente sa Young Women sa stake ug ang presidente sa Young Men sa stake gitawag ug gi-set apart pinaagi sa usa ka tawo nga naghupot sa mga yawe sa pagkapari (ang presidente sa stake), uban sa ilang mga calling, ang duha adunay sama nga awtoridad sa pagkapari ug busa bisan hain ang modumala sa lain. Masabtan ra nila sa pagpuli-puli sa pag-conduct sa mga miting.
Ang Ginoo parehang mopanalangin sa kababayen-an ug kalalakin-an pinaagi sa Iyang pagkapari.
Ang Ginoo mohatag og daghang mga panalangin pinaagi sa Iyang pagkapari nga mahimong moabut ngadto sa tanang mga miyembro kinsa mohimo ug motuman sa sagrado nga mga pakigsaad. Si Presidente Ballard mitudlo, “Ang tanan nga mihimo og sagradong mga pakigsaad sa Ginoo ug kadtong mitahud sa mga pakigsaad mahimong makadawat og personal nga pagpadayag, nga mapanalanginan pinaagi sa pagpangalagad sa mga anghel, nga makigsulti sa Dios, nga makadawat sa kahingpitan sa ebanghelyo, ug, sa katapusan, mahimong mga manununod kauban ni Jesukristo sa tanan nga anaa sa atong Amahan.”8
Si Presidente Joseph Fielding Smith (1876–1972) mitudlo: “Ang mga panalangin sa pagkapari [priesthood] dili lang alang sa mga kalalakin-an. Kini nga mga panalangin gibu-bu usab diha sa … tanan nga matinud-anong mga babaye sa Simbahan. … Ang Ginoo nagtanyag ngadto sa iyang anak nga mga babaye sa tanang espirituhanong gasa ug panalangin nga maangkon sa iyang anak nga mga lalaki.”9
Ug samtang ang mga babaye maghimo sa buhat sa ilang Amahan, sila usab mapanalanginan nga mahimong “manununod sa Dios, ug isig ka manununod uban kang Kristo” (Mga Taga-Roma 8:17; tan-awa usab sa bersikulo 16).
Ang kababayen-an ug kalalakin-an (single ug minyo) mahimong tugahan sa gahum sa pagkapari diha sa templo.
Niadtong 1833 ang Ginoo misaad ni Joseph Smith nga ang mga Santos, ang kalalakin-an ug kababayen-an, pagatugahan uban sa “gahum gikan sa kahitas-an” (Doktrina ug mga Pakigsaad 95:8). Si Presidente Ballard miklaro: “Ang tuga [endowment] sa tinuoray usa ka gasa nga gahum. Ang tanan nga mosulod sa balay sa Ginoo nagpahigayon sa mga ordinansa sa pagkapari. Magamit kini sa kalalakin-an ug kababayen-an.”10 Ang tanang takus nga mga miyembro kinsa nakadawat sa ilang tuga ug motuman sa mga pakigsaad nga ilang nahimo sa templo adunay gahum sa pagkapari. Sa ingon, ang mga babaye, minyo o wala maminyo [single], makabaton og gahum sa pagkapari diha sa ilang mga panimalay bisan pa sa pagbisita gikan sa usa ka tighupot sa pagkapari.
Si Sheri Dew, kanhi magtatambag sa Kinatibuk-ang Kapangulohan sa Relief Society, nangutana, “Unsay buot ipasabut nga makagamit sa gahum sa pagkapari [priesthood]? Nagpasabut kini nga kita makadawat og pagpadayag, mapanalanginan ug matabangan sa nangalagad nga mga anghel, makat-on sa pag-abli sa tabil nga nagbuwag nato gikan sa atong Langitnong Amahan, malig-on sa pagpakigbatok sa tintasyon, mapanalipdan, ug mahayagan, ug mahimong mas maalamon kay sa kita karon—ang tanan walay bisan unsa nga mortal nga pagpataliwala.”11 Unsa ang labing importante nga sangputanan niini nga gahum ug sa unsa nga paagi kini madawat? Ang Ginoo mipadayag nga “ang gahum sa pagkadiosnon,” naglakip sa gahum nga mahimong sama Kaniya, gipakita pinaagi sa mga ordinansa sa pagkapari (tan-awa sa Doktrina ug mga Pakigsaad 84:20).
Ang awtoridad sa pagkapari usahay maglihok nga lahi sa Simbahan kay sa pamilya.
Ang organisasyon sa Simbahan mao ang hirarkiya; ang pamilya mao ang patriyarkal. Si Presidente Oaks mitudlo nga adunay “mga kalainan sa paagi nga ang katungod sa pagkapari [priesthood] naglihok diha sa pamilya ug sa Simbahan.”12 Pinaagi sa balaan nga plano, ang bana ug asawa adunay pipila ka lahi nga mga responsibilidad, apan magtambayayong sila isip managkauban.”13 Si Elder L. Tom Perry (1922–2015) sa Korum sa Napulog Duha ka mga Apostoles mitudlo: “Hinumdumi, mga kaigsoonan, nga sa inyong tahas isip lider sa pamilya, inyong asawa maoy inyong kauban. … Sukad pa sa sinugdanan, ang Dios nagsugo sa katawhan nga ang kaminyoon kinahanglan mohiusa sa bana ug asawa diha sa panag-uyon. Busa, walay usa ka presidente o bise presidente diha sa pamilya. Ang managtiayon magkaubang magtrabaho hangtud sa kahangturan para sa kaayohan sa ilang pamilya. Sila magkahiusa sa pulong, sa buhat, ug sa lihok, samtang sila mangulo, maggiya, ug magdumala sa ilang pamilya. Sila managsamang magkauban. Magakauban ug magkahiusa silang magplano ug mag-organisar sa mga kalihokan sa pamilya samtang nagpadayon sila sa unahan.”14
Nan unsay mahitabo kon ang usa ka kapikas mamatay? Si Presidente Oaks mitudlo: “Pagkamatay sa akong amahan, ang akong inahan maoy nangulo sa among pamilya. Wala siyay katungdanan sa pagkapari, apan isip nahabilin nga ginikanan sa iyang kaminyoon nahimo siya nga tigdumala nga tinugyanan sa iyang pamilya. Sa samang higayon, hingpit siyang matinahuron sa katungod sa pagkapari sa among bishop ug ubang mga lider sa Simbahan. Nangulo siya sa iyang pamilya, apan sila nangulo sa Simbahan.”15
2. Mga Babag
Unsa ang pipila ka mga babag nga makapugong sa kababayen-an nga hingpit nga makahibalo sa ilang paggamit sa gahum sa pagkapari?
Ang kalibug sa kalalakin-an ug kababayen-an kabahin sa pagkapari.
Si Presidente Oaks mitudlo: “Ang Melchizedek nga Pagkapari [Melchizedek Priesthood] dili usa ka kahimtang o titulo. Kini usa ka balaan nga gahum nga gitugyan aron magamit alang sa kaayohan sa buhat sa Ginoo alang sa Iyang mga anak. Kinahanglan natong hinumduman kanunay nga ang mga lalaki kinsa naghupot sa pagkapari dili ‘mao ang pagkapari.’ Dili tukma nga moingon nga “ang pagkapari [priesthood] ug ang mga babaye.’ Kinahanglan nga kita mo-refer ‘sa mga tighupot sa pagkapari [priesthood] ug sa kababayen-an.’”16
Pinaagi sa pag-ingon, “Ang priesthood manganta na karon og kanta,” o “nagkinahanglan ta og boluntaryo sa priesthood nga moadto sa kampo sa Young Women,” naghimo kita sa atong kaugalingon ug sa uban, bisan unsa pa ka maayo ang atong tumong, og kadaot pinaagi sa paghimo ug pagpadayon sa kalibug ug pagpakunhod sa gahum sa Dios.
Sa paghunahuna nga ang pagkapari walay labut sa kababayen-an.
Sa dihang gidapit sa pagtuon bahin sa pagkapari, ang pipila ka sister mitubag, “Dili ko kinahanglan nga makat-on niana nga hilisgutan. Dili kana nako magamit.” Apan tungod kay ang pagkapari mopanalangin sa tanang anak sa Dios, kitang tanan makabenepisyo og mas dakong pagsabut. Kitang tanan makabenepisyo og mas dakong pagsabut sa pagkapari. Hunahunaa kon sa unsa nga paagi nga ang Simbahan ug ang atong mga pamilya mapanalanginan kon ang kababayen-an ug kalalakin-an sa Simbahan maalamon kaayo sa pagsabut ug pagtudlo sa mga kamatuoran kabahin sa pagkapari.
Si Linda K. Burton, kanhi Kinatibuk-ang Presidente sa Relief Society, mihatag og gibug-aton nga ang kababayen-an ingon man ang kalalakin-an kinahanglang magtuon sa hilisgutan bahin sa pagkapari. “Sisters, dili kami makabarug ug makatudlo niadto nga mga butang nga wala namo masabti ug mahibaloi sa among kaugalingon.”17
Ang pagbutang og kinutuban sa kababayen-an sa tinuod wala gayud sukad.
Klaro nga ang pipila ka calling sa Simbahan nagkinahanglan og ordinasyon ngadto sa katungdanan sa pagkapari, apan kinahanglan nga kita magmabinantayon nga dili mohatag og kinutuban sa atong kababayen-an base lang sa kultura, kasaysayan, bakak nga mga pagsabut, o mga tradisyon. Pananglitan, ang kababayen-an mahimong maayo nga mga lider ug mga magtutudlo, importante nga mga tingog sa mga konseho sa Simbahan, ug gamhanang mga ehemplo sa pagkadisipulo ngadto sa mga miyembro sa tanang panahon.
3. Unsa ang Atong Mabuhat?
Ania ang pipila ka paagi nga ang matag usa nato makatabang sa atong mga sister sa ebanghelyo nga moapil sa mas hingpit sa buhat sa Dios nga matuman pinaagi sa Iyang gahum sa pagkapari.
Hibaloi ang labing bag-o nga mga pulong sa Kaigsoonan ug sa mga lider sa atong kababayen-an.
Sa milabay nga daghang mga tuig, ang senior nga mga sakop sa Korum sa Napulog Duha ka mga Apostoles piho nga namulong sa tahas sa kababayen-an sa Simbahan. Naminaw ba kita pag-ayo niini nga mga pakigpulong?
Pananglitan, niadtong 2015, si Presidente Russell M. Nelson mipahayag, “Ang gingharian sa Dios dili kompleto ug dili mahimong makompleto kon wala ang mga babaye kinsa naghimo og sagradong mga pakigsaad ug dayon sundon kini, mga babaye nga makasulti uban sa gahum ug awtoridad sa Dios!”18
Tabangi ang tanang mga miyembro nga makasabut sa talagsaong tahas sa kababayen-an sa buhat sa pagkapari.
Si Presidente Ballard mipahinumdom sa kababayen-an sa Relief Society nga ang ilang “luna sa pag-impluwensya usa ka lahi nga luna—luna nga dili masundog sa mga lalaki. Walay makahimo sa pagpanalipod sa atong Manluluwas sa mas labaw nga pag-aghat o gahum kay kaninyo—anak nga mga babaye sa Dios kamo nga adunay kalig-on sa kahiladman ug pagsalig. Ang impluwensya sa tingog sa usa ka nakabig nga babaye dili masukod, ug ang Simbahan mas nagkinahanglan sa inyong mga tingog karon kay sa kaniadto.”19 Si Bonnie L. Oscarson mipahayag: “Ang [Kababayen-an] sa Simbahan kinahanglang makakita sa ilang kaugalingon nga mahimong mahinungdanong mga sumasalmot diha sa buhat nga gidumala sa pagkapari [priesthood] ug dili lamang mga tumatan-aw ug mga tigsuporta.”20
Tahura ang mga lider sa kababayen-an.
Makatarunganon, kita mohatag og pagtagad sa unsay gisulti niadtong atong gipaluyohan isip mga propeta, mga manalagna, ug mga tigpadayag. Naghupot sila sa mga yawe sa gingharian, ug ang Ginooo mogiya sa Iyang buhat pinaagi kanila. Agig dugang sa ilang mga pagtulun-an, ang mga lider sa Simbahan nga babaye gi-set apart ug gihatagan sa awtoridad sa pagkapari sa pagpamulong ngadto sa kalalakin-an ug kababayen-an sa Simbahan. Gusto usab kita nga maminaw sa ilang mga pagtulun-an ug mopatalinghug unsa nga tambag ang gihatag sa Dios kanato pinaagi kanila.
Iapil ang kababayen-an sa mga konseho, dili lamang sa titulo apan uban sa lihok.
Si Presidente Ballard miingon: “Bisan kinsa nga lider sa pagkapari [priesthood] kinsa dili mopaapil sa iyang mga lider nga sister uban sa hingpit nga pagtahud ug ang pagpaapil wala mopasidungog ug mopalambo sa mga yawe sa gitugyan kaniya. Ang iyang gahum ug impluwensya mawala hangtud iyang makat-unan ang mga pamaagi sa Ginoo.”21
Ayaw paghatag og “ingon may awtoridad” nga mga tubag nga wala pa tubaga sa Ginoo Mismo.
Si Presidente Oaks mipasidaan sa mga miyembro sa Simbahan sa paglikay sa pagtubag sa mga pangutana nga wala pa tubaga sa Ginoo: “Dili nato buhaton ang sayop nga nahimo sa una, … sa pagsulay og butang og mga rason ngadto sa pinadayag. Ang mga rason nahimo na hinoon nga hinimo-himo sa tawo sa hilabihan gayud. Ang mga pagpadayag mao ang atong gipaluyohan isip ang kabubut-on sa Ginoo ug anaa diha nahimutang ang kasiguroan.”22
Si Presidente Ballard mihatag og perpekto nga ehemplo niini: “Ngano nga ang kalalakin-an gi-orden ngadto sa responsibilidad sa pagkapari [priesthood] ug dili ang kababayen-an? … Ang Ginoo wala magpadayag kon nganong Iyang gitukod ang Iyang Simbahan ingon sa Iyang gihimo.”23 Si Presidente Ballard mipasidaan usab kanato “ayaw isugilon ang mga istorya nga giingon nga makapasiugda og pagtuo o tabi-tabi apan wala mapamatud-i o mga napapas nang panabut ug pagpasabut sa atong doktrina ug gipanghimo kaniadto. Kanunay nga maalamon nga himoong usa ka batasan ang pagtuon sa pulong sa buhing mga propeta ug mga apostoles; updated kanunay sa bag-ong mga isyu sa Simbahan, polisiya, ug mga pamahayag pinaagi sa mormonnewsroom.org ug LDS.org; ug konsultahon ang mga buhat sa lehitimo, mahunahunaon, ug matinud-anong mga LDS scholars sa pagsiguro nga dili ninyo matudlo ang dili tinuod, gipapas na, o mga katingad-an, ug lahi.”24 Hinumdumi nga usahay, “Wala ko kahibalo” sa tinuod mao ang labing maayo nga tubag. Kinahanglan kitang magsiksik nga makugihon pinaagi sa kahayag sa hugot nga pagtuo sa pagkat-on sa balaan nga kamatuoran.
Tabangi ang kababayen-an ug kalalakin-an nga mas makasabut sa pagkapari.
Ang pagtabang sa kalalakin-an ug kababayen-an nga mahimong malig-on sa ilang abilidad sa pagtuon ug pagkat-on mahitungod sa pagkapari importante. Ang pipila ka kasulatan nga makatabang niini nga proseso naglakip, apan dili limitado sa, Alma 13 ug Doktrina ug mga Pakigsaad mga seksyon 2, 13, 20, 76, 84, 95, 107, 110, 121, ug 124. Ang pagtambong sa templo alang sa katuyoan sa pagpangita sa matinud-anong paagi dili lamang sa mga tubag apan ilabi na sa dinasig nga mga pangutana kabahin sa hilisgutan nga dili mahimong palabihan og hatag og gibug-aton.
Si Elder Bruce R. McConkie (1915–85) sa Korum sa Napulog Duha ka mga Apostoles misugo: “Kini nga doktrina sa pagkapari [priesthood]—wala mahibaloi sa kalibutan ug gamay ang nahibaloan bisan sa Simbahan—dili makat-unan gikan sa mga kasulatan lamang. …
“Ang doktrina sa pagkapari mahibaloan lamang pinaagi sa personal nga pagpadayag. Moabut pagtulun-an human sa usa ka pagtulun-an ug lagda human sa usa ka lagda, pinaagi sa gahum sa Espiritu Santo ngadto niadtong kinsa nahigugma ug nag-alagad sa Dios uban sa ilang tibuok kasingkasing, gahum, hunahuna, ug kusog. (Tan-awa sa D&P 98:12.)”25
Tabangi ang kababayen-an nga makasabut nga sila kinahanglang mobarug uban sa Ginoo ug sa Iyang mga propeta.
Ang kalibutan nagkabahin-bahin ug mayubiton. Ang kababayen-an, nag-away batok sa usag usa. Ang mga opinyon bug-at ug ang mga emosyon grabe kaayo. Hunahunaa ang impluwensya alang sa kaayohan niini nga kalibutan kon ang tanang miyembro sa Simbahan makakita nga sila, sama ni Ester, gitagana “maingon niini nga panahona” (Ester 4:14) ug nga sila, sa indibidwal ug isip tibuok nga nagkahiusa, gikinahanglan aron mogiya, dili mosunod, sa kalibutan.
4. Panapos
Si Emma Smith namahayag: “Atong buhaton ang talagsaon nga butang. … Paabuton nato ang talagsaong mga okasyon ug dinaliang mga tawag.”26 Kining dinalian nga mga tawag, gani mga panghangyo, nagagikan sa mga lider sa Simbahan ngadto sa mga sister sa milabayng pipila ka tuig nga wala sukad kaniadto. Samtang mas makasabut kita sa mga kamatuoran nga may kalabutan sa pagkapari, makaila sa posible nga mga rason ngano nga daghang kababayen-an ang nagpuyo nga ubos sa ilang mga pribilehiyo, ug mohimo sa kahibalo nga atong naangkon kabahin sa kababayen-an ug sa ilang mga oportunidad sa pag-apil sa buhat sa pagkapari, kita mahimong “makakaplag sa kalipay ug kalinaw nga moabut gumikan sa pagkahibalo pinaagi sa inyong pagtudlo nga kamo nakatandog og kinabuhi, nakabayaw og usa ka anak sa Langitnong Amahan diha sa iyang panaw nga ugma damlag makasulod na usab ngadto sa Iyang presensya.”27