Ang Inyong Panimpalad sa Mortalidad
Ni Elder Dieter F. Uchtdorf
Sa Korum sa Napulog Duha ka mga Apostoles
Gikan sa usa ka tibuok kalibutan nga debosyonal alang sa mga young adult, “Ang Inyong Panimpalad sa Mortalidad,” gipadangat ni Elder Dieter F. Uchtdorf ug Sister Harriet Uchtdorf sa Conference Center niadtong Enero 14, 2018.
Tuo—ug ang Dios magauban kaninyo. Ipaduol ang inyong kasingkasing Kaniya—ug Siya mogiya kaninyo sa inyong panaw.
Nindot kaayo nga makig-uban kaninyo karon ug mobati sa inyong espiritu, sa inyong kalig-on, sa inyong kalagsik. Nalipay kaayo ko nga kamo dunay kahigayunan nga makadungog gikan ni Sister Uchtdorf. Si Harriet gayud ang dakong kalipay sa akong kinabuhi. Ang tanan nga nakaila niya, ganahan niya. Siya ang matang sa tawo nga makahimo niadtong nagpalibut kaniya nga mas maayo ug mas malipayon. Tinud-anay nga ingon niana ang iyang impluwensya ngari kanako.
Bag-o lang namong gisaulog ang ika-55 nga anibersaryo sa among kasal. Kon motan-aw mi sa among duha ka anak ug sa ilang mga kapikas, sa among unom ka apo uban sa ilang mga pamilya, ug sa among upat ka apo sa tuhod, mahingangha mi sa katalagsaon sa panimpalad sa among kinabuhi.
Ang Panahon sa Dali nga mga Tubag
Usa ka makapainteres nga hunahuna ang miabut kanako samtang nangandam ko alang niini nga kalihokan. Oo, tinuod, ang mga katuigan sa dihang nag-edad ko og 18 hangtud 30 hapit dili na nako mahinumduman, apan bisan pa sa akong edad karon, gibati nako nga batan-on pa gihapon. Gani, kadaghanan namo nga edaran nga mga tawo mikonsiderar sa among kaugalingon nga mga batan-on nga nagpuyo sa dugay na kaayong panahon.
Kon motan-aw mo namo, ang “karaang henerasyon,” mas daghan og pagkasusama sa inyong henerasyon kay sa inyo tingaling gihunahuna. Nagtuo ko nga ang mga kalainan tali sa mga anak sa Langitnong Amahan, bisan unsa pay ilang edad, gamay ra kon itandi sa mga pagkasusama. Sama pananglit, daghan kaninyo may mga pangutana mahitungod sa Dios ug sa inyong kaugalingon—lawom, sukaranang mga pangutana nga susama sa gipangutana sa mga tawo nga mas magulang pa ninyo:
“Aduna ba gyud kahay Dios? Nagpakabana ba Siya?”
“Anaa ba ako sa saktong dalan?”
“Nganong mobati man ko usahay nga walay pulos, nabug-atan, napasagdan, o nag-inusara?”
“Nganong wala man mangilabot ang Dios sa akong kinabuhi?”
“Nganong wala man Siya motubag sa pag-ampo?”
“Nganong gitugutan man Niyang makasinati ko niini nga kaguol, sakit, o trahedya?”
Lisud kaayong tubagon kini nga mga pangutana.
Niining panahon sa dali nga mga tubag—diin ang daw hingpit ug dili malalis nga kahibalo dali ra nga ma-Google—madismaya kita usahay kon ang mga tubag sa atong personal, importante, ug dinalian nga mga pangutana madugay. Modangup kita sa langit, ug ang atong makuha mao lamang ang makasagmuyo, nagtuyok-tuyok nga “cursor.”
Dili kita gusto nga maghulat.
Kon maghulat kita og sobra sa pipila ka segundo sa pagresponde sa search engine, magtuo kita nga tingali naguba o naputol ang koneksyon. Sa atong kasagmuyo, basin hunungon pa gani nato ang pagpangita. Apan kon kabahin na sa mahangturon nga mga pangutana, kabahin sa kalag, kinahanglan kita nga mas mapailubon.
Dili tanang tubag managsama og bili. Ang mga tubag nga gikan sa kalibutanong kaalam o sikat nga mga opinyon dali rang moabut, apan mawad-an ra dayon sa bili niini kon dunay motumaw nga bag-ong mga teyoriya ug mga uso. Ang langitnong mga tubag—mahangturong mga tubag—bililhon kaayo. Ang pagdawat niini nga mga tubag kasagaran magkinahanglan og sakripisyo, buhat, ug pailub.
Kini nga mga tubag angayan lang nga paabuton.
Ang akong tuyo karon mao ang paghalad sa akong siguradong pagsaksi nga ang inyong Amahan sa Langit nakaila kaninyo, nakadungog kaninyo, ug dili gayud mobiya kaninyo. Samtang inyong ipaduol ang inyong kasingkasing Kaniya ug maningkamot sa pagsunod sa Iyang dalan, manggilabot Siya sa inyong kinabuhi ug mogiya sa inyong agianan sa inyong panaw niining talagsaon ug makahinam nga panimpalad sa mortalidad.
Pagsumpay sa mga Tuldok
Usa sa talagsaon nga mga innovator [tawo nga mopalambo sa naimbento] sa atong panahon, si Steve Jobs sa Apple anaa niini nga ideya: “Dili ninyo masabtan ang mga panghitabo sa umaabut; makasabut lamang kamo niini kon motan-aw og balik sa nangagi. Busa kinahanglang mosalig kamo nga ang mga panghitabo sa umaabut inyong masabtan.”1
Unsa ang iyang gipasabut niana? Sa ulahing bahin sa ika-19 nga siglo, ang mga artist sama ni Georges Seurat ug Pablo Signac misugod sa pagpintal gamit ang bag-ong estilo nga sa kaulahian nailhan isip neo-impressionism. Ang ilang paagi naglakip sa pagtuldok-tuldok sa canvas og gagmay nga mga patak sa kolor. Kon padul-an, kini nga mga tuldok makita nga daw dili konektado ug pinasulagma. Apan kon inyong tan-awon ang tibuok painting, inyong makita kon sa unsang paagi ang mga tuldok mamahimong mga kolor ug kon sa unsang paagi ang mga kolor sa katapusan makahimo og mga porma nga mopadayag og matahum nga desinyo. Ang daw kanhi pinataka ug gani makalibug masugdan na sa pagsabut.
The Papal Palace in Avignon, ni Paul Signac, GIKAN SA GETTY IMAGES
Usahay ang atong kinabuhi susama sa neo-impressionistic nga art. Ang mga tuldok sa kolor nga naglangkob sa mga higayon ug hitabo sa atong mga adlaw daw dili konektado ug samok usahay. Dili nato makita nga adunay han-ay niini. Dili nato mahunahuna nga adunay tuyo niini.
Hinoon, kon moatras kita ug magbaton og mahangturong panglantaw, kon motan-aw kita sa atong kinabuhi gamit ang bayanan sa ebanghelyo ni Jesukristo, atong masugdan pagsabut ang mga panghitabo sa atong kinabuhi. Tingali dili pa dayon nato makita ang kinatibuk-ang larawan, apan uban sa pailub igo natong makita aron mosalig nga adunay matahum, maanindot nga desinyo. Ug samtang maningkamot kita nga mosalig sa Dios ug mosunod sa Iyang Anak, si Jesukristo, usa ka adlaw atong makita ang nahuman nga produkto, ug atong masayran nga ang mismong mga kamot sa Dios ang nagdirekta ug naggiya sa atong mga lakang.
Atong masayran nga ang Batid nga Artist adunay plano alang niadtong pinasulagma nga mga tuldok. Atong makita nga gipalambo Niya ang atong mga talento, miandam og mga oportunidad, ug mipaila kanato sa mga posibilidad nga labi pang mahimayaon kay sa atong mahunahuna o makab-ut sa atong kaugalingon. Nakita ko gayud kini sa akong kaugalingong kinabuhi.
Ang Akong Panimpalad sa Mortalidad
Sa gamay pa ko, kaduha napugos sa paglayas ang akong pamilya gikan sa among pinuy-anan ug gibiyaan ang tanan. Niining duha ka okasyon, naklaro nga ang mga tawo sa bag-o namong mga dapit mikonsiderar kanamo nga “ubos” kay sa kanila. Sa mga bata nga akong kaedad, ang akong tonada nagpaila nako nga dili taga-diha, ug dako kining tinubdan sa pagbiay-biay ug katawa alang kanila.
Ang kasakit ug kahasol sa among pagbalhin-balhin nakahimo nako nga maatrasado sa akong pag-eskwela, ug nabiyaan ko og usa gyud ka tuig. Sa East Germany, gitun-an nako ang Russian isip ikaduhang pinulongan. Lisud kadto, apan nahimo ra nako. Karon, sa West Germany, gikinahanglan nako nga makat-on og Iningles.
Daw imposible kini alang kanako! Nagtuo ko nga dili gayud pwede ang akong ba-ba sa pinulongang Iningles.
Sa tin-edyer pa, naibug ko sa labing talagsaong babaye nga dunay nindot nga dagkong brown nga mga mata. Subo lang, wala siyay bisan gamay nga interes kanako.
Busa, didto ako, medyo walay importansya ug nanlimbasug nga batan-ong lalaki nga nagpuyo sa Germany human sa gubat nga daw wala kaayoy tsansa nga magmalampuson sa kinabuhi.
Hinoon, duna koy duha ka maayong mga butang nga pabor kanako. Nasayud ko nga gihigugma ko sa akong pamilya. Sa eskwelahan ug sa simbahan adunay mga titser nga nagdasig nako nga kanunay nga himoong tag-as ang akong mga tumong. Makahinumdom gihapon ko sa dihang ang usa ka batan-ong Amerikano nga misyonaryo mitudlo niini nga baruganan gikan sa mga kasulatan: “Kon ang Dios dapig [kaninyo], kinsa pa man ang batok [kaninyo]?”2
Adunay bahin niini nga daw gamhanan kaayo nga ideya kanako. Ug kon tinuod kana, naghunahuna ko, “nan nganong mahadlok man ko?”
Busa, mituo ko. Ug misalig ko sa Dios.
Sulod sa usa ka panahon, nag-aprentis ko. Usa sa akong mga titser mihagit nako nga magtinguha og mas taas pa ug moeskwela sa gabii aron magtuon og mechanical engineering. Nagkinahanglan kini og dako kaayo nga ekstra nga buhat, apan misangput kini sa akong pagdiskubre sa akong dakong hilig sa mga eroplano! Nakurat kaayo ko sa dihang akong nasayran nga aron mahimong piloto kinahanglan kong makamao og Iningles. Apan gusto ko nga mahimong piloto, ug sa milagrusong paagi ang akong ba-ba daw nausab, ug ang Iningles daw dili na imposible nga pinulongan.
Uban sa bag-ong kadasig, bag-ong pasalig nga maningkamot og maayo, ug uban sa pagsalig diha sa Langitnong Amahan, mihimo ko og gagmay nga mga lakang sa pag-ugmad og pagsalig nga makahimo ko niini. Siyempre, wala kana magpasabut nga walay mga problema nga mahitabo.
Pagka-19 anyos nako, mibiyahe ko ngadto sa San Antonio, Texas, aron sugdan ang akong pagbansay sa pagka-piloto sa Air Force. Sa eroplano, nakatupad ko og tawo nga ang sinultihan bagâ nga tonada sa taga-Texas. Nakaamgo ko sa akong kahadlok nga ang Iningles nga gihagoan nako pag-ayo nga makat-unan dili ang samang Iningles nga gipamulong nila sa Texas!
Lisud usab didto sa training school sa pagka-piloto. Programa kadto nga grabe ang kompetisyon, diin ang tanan nakigtigi alang sa pinakataas nga posisyon sa gradwasyon. Diha-diha dayon nasayud ko nga maalkanse ko kay kadaghanan sa akong mga klasmeyt lumad nga mamumulong sa Iningles.
Gipahimangnuan ko sa akong mga flight instructor sa laing potensyal nga alkanse—migahin ko og dakong panahon sa simbahan. Ang lokal nga mga miyembro miabi-abi kanako sa ilang branch ug sa ilang mga panimalay, ug nagtambayayong pa gani kami sa pagtukod og chapel sa Big Spring, Texas. Nabalaka ang akong mga instruktor nga ang maong mga kalihokan makadaut sa akong tsansa sa taas nga ranking. Wala ko magtuo niini. Busa misalig ko sa Dios ug mihimo sa akong labing maayo.
Sa katapusan, nakat-on ko og Iningles, hinoon naningkamot gihapon ko niini. Nakompleto nako ang akong pagbansay sa pagkapiloto—ug maoy nag-una sa akong klase. Nahimo ko nga fighter pilot ug sa wala madugay usa ka airline captain. Ug kadtong gwapa, brown og mata nga babaye nga akong gipangandoy nahimo nakong asawa.
Buhata ang Gagmay nga mga Butang sa Hingpit nga Paagi
Duna bay leksyon dinhi niini? Naghunahuna ko nga adunay pipila!
Ang usa tingali mao kini: Ayaw papiog sa daghang dagko, lisud nga buluhaton sa kinabuhi. Kon mopasalig mo sa pagbuhat sa “sayon” nga mga butang—sa “gagmay” nga mga butang nga gipabuhat sa Dios kaninyo—ug buhaton ninyo kini sa labing hingpit ninyong mahimo, ang dagkong mga butang mosunod.
Ang uban niining gagmay ug sayon nga mga butang nga mas hingpit ninyong mabuhat mao ang pagtuon sa mga kasulatan, pagsunod sa Pulong sa Kaalam, pagtambong sa simbahan, pag-ampo uban sa tinuod nga katuyoan, ug pagbayad sa inyong ikapulo ug mga halad.
Buhata kining mga butanga bisan kon dili ka ganahang mobuhat niini. Kini nga mga “sakripisyo” morag gagmay ra, apan importante kini, kay ang “sakripisyo nagdala sa mga panalangin sa langit.”3
Sa usa ka pagsabut, ang inyong gagmay ug yano nga mga sakripisyo mao ang mga tuldok sa inadlaw-adlaw nga pagpakabuhi nga naghimo sa obra maestra nga painting sa inyong kinabuhi. Tingali dili ninyo masabtan ang mga panghitabo karon, ug dili pa angay ninyong masabtan. Pagbaton lamang og igong pagtuo alang sa panahon nga inyong gipuy-an karon. Salig sa Dios, ug “gikan sa gagmay nga mga butang [magagikan] ang mga dagko.”4
Pagsalig sa Dios
Karon, naghunahuna tingali mo, “Oo, Elder Uchtdorf, nindot kaayo na para nimo. Apan usa ikaw ka Apostol. Usa lang ko ka regular nga miyembro sa Simbahan. Wala tubaga ang akong mga pag-ampo. Wala giyahi ang akong kinabuhi. Kon dunay plano alang nako ubos kini nga bersyon. Pinasa nga plano. Plano nga angay kong makontento sa unsay naa nako.”
Minahal kong mga higala, kamo mga anak sa buhing Dios, ang Dios sa kalibutan. Siya nahigugma kaninyo, Siya gusto nga kamo magmalampuson, Siya adunay plano nga giandam alang sa inyong kalampusan. Hinumdumi ang gisulti ni Steve Jobs: “Dili ninyo masabtan ang mga panghitabo sa umaabut; makasabut lamang kamo niini kon maghinumdom niini human kini mahitabo.”
Sa nag-edad pa ko og sama kaninyo wala koy ideya kon unsay mahitabo nako sa umaabut. Siguradong wala nako masabti ang mga panghitabo sa akong palibut.
Apan misalig ako sa Dios. Naminaw ko sa tambag sa mahigugmaong pamilya ug maalamong mga higala, ug mihimo og ginagmay nga mga lakang sa pagtuo, nagtuo nga kon buhaton nako ang labing maayo nakong mahimo sa pihong higayon, ang Dios ang moatiman sa mas dakong panglantaw.
Gibuhat Niya.
Nasayud Siya sa katapusan gikan sa sinugdanan nga dili nako mahimo.
Dili nako makita ang umaabut, apan makita Niya.
Bisan niadtong mga panahon sa kalisud nga nagtuo ko nga gipasagdan ko, anaa Siya uban kanako—nakita ko kana karon.
Sa Mga Proverbio, makita nato kining talagsaong saad: “Sumalig ka sa Ginoo sa bug-os mong kasingkasing; ug ayaw pagsalig sa imong kaugalingong salabutan.
“Sa tanan nimong mga dalan ilha siya, ug siya magamando sa imong mga alagianan.”5
Dili ko motuo nga adunay question mark sa tumoy niana nga bersikulo. Dili, nagtuo ko nga kinahanglang adunay exclamation mark diha!
Busa angay ninyong pangutan-on ang inyong kaugalingon, “Makakaplag ba ko og igong pagtuo sulod kanako aron motuo sa Dios? Andam ba kong mosalig nga nahigugma Siya kanako ug gusto nga mogiya sa akong dalan?”
Gani, mahimong magmalampuson kamo sa inyong kaugalingong paningkamot sa daghang mga butang. Apan moawhag ko kaninyo sa pagtuo nga ang inyong kinabuhi mas labi pang maayo kon mosalig kamo sa Dios nga mogiya sa inyong mga lakang. Nahibalo Siya sa mga butang nga wala gayud ninyo mahibaloi, ug aduna Siyay giandam kaninyo nga umaabut nga labaw pa sa inyong posibleng mahunahunaan. Ang talagsaon nga si Apostol Pablo mipamatuod, “Wala makita sa mata, ni madungog sa dalunggan, ni mosantop sa hunahuna sa tawo ang giandam sa Dios alang niadtong nahigugma kaniya.”6
Gusto ba ninyo ang inyong Langitnong Amahan nga mogiya kaninyo, mopanalangin kaninyo, ug mosuporta kaninyo?
Nan pagtuo.
Higugmaa Siya.
Tinguhaa Siya uban sa tibuok ninyong kasingkasing.
Lakaw diha sa Iyang mga pamaagi—nga nagpasabut sa pagsunod sa mga sugo, pagtahud sa inyong mga pakigsaad, pagsunod sa mga pagtulun-an sa mga propeta, ug pagpatalinghug sa mga pag-aghat sa Espiritu.
Buhata kini ug ang Dios “mopalambo kaninyo sa usa ka libo ka pilo ug mopanalangin kaninyo sama sa iyang gisaad kaninyo!”7
Nakasabut ko nga alang sa uban daw sayon kining isulti ug lisud buhaton. Dili kinahanglang moadto og layo sa kultura karon aron makadungog og nagkasumpaki nga mga tingog nga makapawala sa kadasig o gani mobiay-biay sa pagtuo sa Dios ug sa atong relihiyon.
Ang ingon nga mga tingog napalanog sa atong panahon pinaagi sa dili hitupngan nga mga kalamboan sa komunikasyon. Mao kana ang atong hagit, apan pribilehiyo usab kini ninyo.
Masaligon ako nga makakaplag kamo og mga paagi sa pag-atubang niini sumala sa pamaagi sa Ginoo! Kabahin kini sa inyong panimpalad sa mortalidad. Kon unsaon ninyo kini pagbuhat moimpluwensya pag-ayo sa inyong kaugmaon ug sa tahas nga inyong buhaton diha sa buhat sa Dios dinhi sa yuta.
Bisan pa man, ang inyong nasinati sa kinabuhi dili ingon niana katalagsaon. Dili lamang ang inyong henerasyon kansang pagtuo sa Dios gihagit ug gitamay. Sa pagkatinuod, daw kabahin kini sa mortal nga pagsulay alang sa tanang mga anak sa Dios.
“Kon kamo iya pa sa kalibutan,” miingon si Jesus sa Iyang mga disipulo, “higugmaon sa kalibutan ang mga iya: apan kay kamo dili man iya sa kalibutan, hinonoa gipili ko kamo gikan sa kalibutan, ang kalibutan nagadumot kaninyo.”8
Maayo pang dawaton na lang ninyo ang kalagmitan nga sa higayon nga mopasalig kamo nga mosunod sa Manluluwas, kadtong nanagpuyo sa dako ug lapad nga gambalay dili mahiuyon—usahay, kusganon kaayo.9 Mosulay pa tingali sila sa paghadlok ug pagpakaulaw kaninyo.
Apan hinumdumi nga dili kamo manubag ngadto kanila. Manubag kamo sa Dios. Moabut ang adlaw nga mobarug kamo sa Iyang atubangan aron manubag sa inyong kinabuhi.
Mangutana Siya kon unsay inyong gihimo sa pagbuntog sa mga tintasyon sa kalibutan ug pagsunod sa dalan sa pagkamatarung. Mangutana siya kon misunod ba kamo sa Manluluwas, kon gihigugma ba ninyo ang inyong silingan, kon tinud-anay ba kamong naningkamot nga magpabilin sa dalan sa pagkadisipulo.
Hinumdumi, dili mahimo ang duha maoy inyong buhaton. Dili kita makadawat sa dagkong mga panalangin sa pagkadisipulo samtang sa samang higayon magpabiling miyembro sa Babylon First Ward. Minahal kong mga higala, karon ang panahon nga mopasalig ngadto kang Kristo ug mosunod sa Iyang dalan.
Moabut ang adlaw nga ang tanang anak sa Dios masayud unsa ang matarung—lakip niadtong nagbiay-biay karon sa kamatuoran. Moluhod ug mokumpisal sila nga si Jesus mao ang Kristo, ang Manunubos, ang Manluluwas sa kalibutan.10 Masayud sila nga namatay Siya alang kanila.
Nianang adlawa maklaro nga ang Iyang tingog mao lang ang bugtong tingog nga importante.
Sigurado ninyong masayran kon unsa kamo kabulahan tungod kay mipadayon kamo sa inyong pagtuo, misunod sa mga sugo sa Dios, miserbisyo sa inyong isigkatawo, ug mitukod sa gingharian sa Dios dinhi sa yuta. Minahal nga mga higala, tuo—ug ang Dios magauban kaninyo. Ipaduol ang inyong kasingkasing Kaniya—ug Siya mogiya kaninyo sa inyong panaw agi niining talagsaon ug makapahinam nga panimpalad sa mortal nga kinabuhi.
“Dili Igsapayan”
Kon maghisgot kita sa pagtugot sa Dios nga mogiya sa atong kinabuhi, gusto nakong maklaro ang usa ka butang. Dili tingali kamo makagusto sa unsay akong isulti kaninyo. Kon mangutana kamo sa Dios kon unsay buhaton mahitungod sa mga desisyon sa inyong kinabuhi—lakip ang pipila ka importante nga mga desisyon—tingali dili Siya mohatag kaninyo og klaro nga tubag. Ang kamatuoran mao nga usahay dili igsapayan kon unsa ang inyong desisyon, basta lang magpabilin kamo diha sa sukaranan nga mga pakigsaad ug mga baruganan sa ebanghelyo.
Sa daghang sitwasyon, ang mga desisyon nga inyong himoon dili tingali sama kaimportante sa unsay inyong buhaton human mohimo sa desisyon.
Pananglitan, ang manag-uyab tingali mopili nga magminyo bisan kon ang pipila sa ilang kaugalingong mga pamilya wala mokonsiderar kanila nga perpekto nga pagkaparis. Bisan pa niana, dako ang akong paglaum sa ingon nga magtiayon kon, human sa ilang pagdesisyon, magpabilin silang hingpit nga mapasaligon sa usag usa ug ngadto sa Ginoo sa tibuok nilang kasingkasing ug hunahuna. Pinaagi sa pagtratar sa usag usa uban sa gugma ug kamabination ug sa pagtutok sa emosyonal, espiritwal ug temporal nga mga panginahanglan sa usag usa—pinaagi sa makanunayong pagbuhat sa “gagmay” nga mga butang—mamahimo silang perpekto nga pagkaparis.
Ang sukwahi mao ang magtiayon nga naghunahuna nga napilian nila ang “perpekto” nga tawo ug dayon maghunahuna nga nahuman na ang lisud nga buhat. Kon mohunong sila sa pagpangulitawo sa usag usa, mohunong sa pakig-istorya sa usag usa, ug mobalik ngadto sa garbo ug paghunahuna lamang sa kaugalingon, kini nga magtiayon anaa sa dalan padulong sa kasubo ug pagmahay.
Ang sama nga baruganan magamit sa mga pagpili sa trabaho. Dako ang akong paglaum alang niadtong mipili sa dili kaayo inila nga trabaho apan naningkamot og maayo nga makakita og mga paagi nga mahimong mahinamon ug mahagiton ang ilang trabaho.
Minos ang akong paglaum alang niadtong mopili sa impresibo paminawon nga mga trabaho apan sa kadugayan nawad-an nianang kadasig sa sulod nga gikinahanglan aron magmalampuson sa ilang trabaho. Gani, ang malampusong pagpahiangay ngadto sa mga kausaban sa trabahoan maoy usa sa nag-unang kinaiya nga angayng palamboon sa inyong henerasyon aron makasugakod sa umaabut.
Busa unsay gusto sa Ginoo kon unsaon ninyo paghimo sa importanting mga desisyon?
Ang Iyang mga panudlo ngadto nila ni Oliver Cowdery ug Joseph Smith nakatabang kanako. Misulti ang Ginoo kanila, “Ikaw kinahanglan gayud nga magtuon niini diha sa imong hunahuna; unya ikaw kinahanglan nga mangutana kanako kon kini husto.”11
Ang Langitnong Amahan mihatag kaninyo og utok ug kasingkasing. Kon mosalig kamo Kaniya, motabang Siya kaninyo sa paggamit niining duha sa tukma nga paagi sa inyong paghimo og desisyon.
Alang sa daghang mga desisyon, aduna kamoy sobra sa usa ka maayong opsyon nga kapilian. Sa dihang nahitabo kini kang Joseph ug sa iyang mga kauban, ang Ginoo migamit og makapaikag nga mga pulong samtang nagtinguha sila sa Iyang giya.“Dili igsapayan.”12
Apan ang Ginoo midugang dayon, “Lamang pagmatinud-anon.”13
Ang inyong buhat mao ang paghimo sa labing maayong mga desisyon nga inyong mahimo base sa impormasyon nga anaa kaninyo, pinasikad sa mga mithi ug mga baruganan sa ebanghelyo. Dayon paningkamot kutob sa mahimo nga magmalampuson diha sa mga butang nga inyong gibuhat—ug pagmatinud-anon.
Buhata kana, ug masumpay ang mga tuldok.
Tingali makasagmuyo nga makadungog nga ang Dios dili gayud mohatag kaninyo og detalyado nga subayunon sa inyong panaw sa kinabuhi. Apan gusto ba gayud kamo og direksyon sa matag detalye sa inyong kinabuhi? Gusto ba gayud kamo nga dunay mohatag kaninyo sa mga cheat code sa kinabuhi sa dili pa ninyo kini mahunahuna sa inyong kaugalingon? Unsa man kana nga matang sa panimpalad?
Minahal nga batan-ong mga higala, kausa lamang kamo molabay sa panimpalad sa mortalidad. Dili ba ang gitinagsa pagpahiangay nga praktis lakip ang impormasyon sa mahitabo sa umaabut ug mga tubag sa dagkong mga pangutana sa kinabuhi mokuha sa inyong talagsaong pagbati sa kalampusan ug sa paglambo sa inyong pagsalig sa Ginoo ug sa inyong kaugalingon?14
Tungod kay gihatagan kamo sa Dios sa inyong kabubut-on, daghan ang mga pagpili nga mahimo ninyong buhaton ug sa gihapon magpuyo og makatagbaw nga kinabuhi. Ang mortalidad sa pagkatinuod usa ka istorya nga bukas ang katapusan, nga kamo ang mopili sa inyong kaugalingong panimpalad. Aduna kamoy mga sugo, duna kamoy mga pakigsaad, duna kamoy dinasig nga propetikanhong tambag, ug aduna kamo sa gasa sa Espiritu Santo. Sobra na kana aron mogiya kaninyo ngadto sa mortal nga kamaya ug mahangturong kalipay. Labaw pa niana, ayaw pagpakawala sa paglaum kon makahimo kamo og desisyon nga dili kaayo maayo. Sa ingon niana kamo makat-on. Kabahin kana sa panimpalad!
Dili, ang mga panimpalad dili gayud hapsay gikan sa sinugdanan hangtud sa katapusan, apan kon magmatinud-anon kamo, makasiguro kamo og malipayon nga katapusan. Ikonsiderar lang ang ehemplo ni Jose sa Ehipto. Sa daghang paagi, ang iyang kinabuhi makalolooy. Gibaligya siya sa iyang mga igsoon ngadto sa pagkaulipon. Gibalhug siya sa bilanggoan tungod sa usa ka krimen nga wala niya buhata. Bisan pa sa makalilisang nga mga kahimtang nga gipugos diha kaniya, nagpadayon siya sa iyang hugot nga pagtuo. Misalig siya sa Dios. Gibuhat niya ang iyang labing maayo gikan niini. Sa daghang katuigan—bisan kon daw nataligam-an ug napasagdan na siya—siya mituo. Kanunayng gipaduol ni Jose ang iyang kasingkasing ngadto sa Dios. Ug gipakita sa Dios nga mahimo Niyang positibo ang mga negatibo.15
Karon, paglabay sa mga 4,000 ka tuig, makakuha gihapon kita og inspirasyon diha sa istorya ni Jose.
Ang inyong panimpalad dili tingali ingon kamaukyabon, apan aduna kini mga kalampusan ug kapakyasan. Busa, hinumdumi ang ehemplo ni Jose. Pagpabiling matinud-anon. Tuo. Pagmatinuoron. Ayaw pangluod. Ayaw pangdaug-daog. Higugmaa ang Dios. Higugmaa ang inyong isig ka tawo. Salig sa Ginoo, bisan kon daw lisud ang mga butang.
Tingali ulahi na ninyo kining makita, apan motan-aw kamo og balik ug mahibalo nga ang Ginoo sa tinuod mimando ug migiya sa inyong dalan.
Ang mga tulbok nagsumpay gayud.
Lima ka Butang nga Hinumduman
Hangtud unya, hangyoon ko kamo sa paghinumdom og lima ka butang?
Una, hibaloi nga ang mga tubag sa Dios sa inyong labing lawum nga mga pangutana tingali malangay ug tingali moabut kini sa mga paagi nga wala ninyo damha. Ang mga tubag sa Dios adunay mahangturong bili. Angay lang kining paabuton.
Ikaduha, pagbaton og gamayng pagtuo. Ipaduol ang inyong mga kasingkasing ngadto sa Dios. Tuo nga importante kamo sa Dios, ug salig nga mohimo Siya kaninyo nga labaw pa kay sa posible ninyong mahimo kon kamo ra. Pagkat-on mahitungod Niya. Higugmaa Siya. Tuohi Siya. Pakigsulti Kaniya sa kanunay, sa kinasingkasing. Paminaw sa Iyang tingog.
Ikatulo, lakaw kutob sa laing maayo ninyong mahimo diha sa dalan sa pagkadisipulo. Ayaw batia nga nasanapan. Buhata lang ang gagmay nga mga butang sa pinakamaayo ninyong mahimo, ug mahan-ay ra ang dagkong mga butang.
Ikaupat, ayaw itugot nga ang makawala sa kadasig nga mga tingog makapugong kaninyo sa inyong panaw sa pagtuo. Hinumdumi, dili kamo manubag ngadto sa inyong mga kritiko. Manubag kamo ngadto sa inyong Amahan sa Langit. Ang Iyang mga hiyas importante.
Ikalima, himoa ang labing maayong desisyon nga inyong mahimo pinaagi sa pagsunod sa mga pag-aghat nga moabut sa inyong kasingkasing ug hunahuna. Buhata ang inyong labing maayong mga paningkamot sa paghuman sa buluhaton. Pagbaton og pagtuo, ug ang Dios mopahinungod sa inyong matinuorong paningkamot alang sa inyong mahangturong kaayohan.16
Buhata kini ug, sa katapusan, mamaayo ra ang tanan.
Samtang kamo magtinguha sa pagsunod sa inyong Manluluwas, ang inyong pagsalig motubo.17 Ug samtang kamo maglakaw diha sa pagkamatinud-anon ug ablihan ang inyong kasingkasing ngadto sa Kahayag ni Kristo, ang inyong gugma sa Dios mohingkud ug ang inyong abilidad sa paghigugma sa inyong mga silingan malunsay.
Ug kining tanan maghatag kaninyo og kamaya ug kalipay.
Maghatag kini kaninyo og kalinaw.
Usa ka adlaw, maghatag kini kaninyo og walay katapusang himaya.
Nianang umaabut nga adlaw, mohinumdom kamo niining gimanggad ug makahinam nga panimpalad sa mortalidad, ug makasabut kamo. Inyong makita nga ang mga tuldok magsumpay gayud ngadto sa usa ka matahum nga desinyo, mas hamili kay sa inyong mahunahuna sukad.
Uban sa dili matukib nga pasalamat, inyong makita nga ang Dios Mismo, sa Iyang dakong gugma, grasya, ug kalooy, anaa kanunay nagbantay kaninyo, nagpanalangin kaninyo, ug naggiya sa inyong mga lakang samtang naglakaw kamo padulong Kaniya.