Te Rinerine: N Riki bwa te Tia Korobanna ae Rianako ke te Tina ae Raoiroi?
A bane n tuangai aomata ae e na taraa ni kangaanga bwa kona rianako ni bwaai aika uoua. Ma eti anne?
I uringnga ngke I mena n te kaoreti te namakin ae e aki raoiroi ngke I reiakini aron maiuia tabeman taan korobanna aika kinaaki. E taraa n ae te koraki ake a rangi n ataaki ma ni kinaaki a riki bwa taan korobanna aika bwakuaku n aki tabeakiniia aia utu ao ni kabuaa te iango ae raoiroi. Taan korobanna aika kinaaki a korotamnei ni ingabongin te Kiritimati ngke a kauki aia bwai n tangira natiia. Temanna e mare onoua te tai. Manga temanna e korea taningana ao e kanakoa nakoia ana utu. Ao temanna e tiringa te aomata temanna! I a moana ni iango ngkana I riki bwa te tia korobanna ae kinaaki ao n riki naba bwa te tina (ni karaoan aikai ni kabane e na bon raoiroi naba au iango!) tao e bon kona n reke.
E reireinai au burobetia bwa ngkana ti tangiria bwa ti na rang rianako, ti riai n anga bwai ni kabane ibukina. Ti na mwakuri korakora riki nakoia aomata nako. Ti na karimoa moa te korobanna inanon maiura. I aki toki n titiraki inanou, “Ma ngkana te tia korobanna e kawakin tuua, e karaoi ake a riai ni karaoaki moa, ao iai irouna Tamnei te Uea ni kairia n ana mwakuri, tao a na aki kona n riki bwa taan korobana aika tamaroa ao riki n rangi n rianako?” E tiku te titiraki aei i nanou inanon au tai n reirei.
Ngke ngai ao kainabau a bane ara tai man te reirei, ao tia maan ni mare bwa ai teuana ara ririki. Unimwane Russell M Nelson, (n te tai anne, ngaia kain te Kooram n Abotoro n te Tengaun ma Uoman) e roko n taetae n tain ara anga bebwa. E boo te baka n amwarake imwina, ao ti 16 ataei ake a kaoaki bwa a na iria. N akea kantaningakina, ngai ao kainabau ti kaoaki bwa ti na iria. N tain te marooro ao e a kaukaki kanakoan titiraki ma kaekaia. I katea baiu ao n tarai matan Unimwaane Nelson, ao I a kanakoa raraomau ibukin te riki bwa te tia korobanna ao te riki n tina. I a tia ni mwakuri korakora ni karikirakea au tarena n te reirei, ao I tangiria n reitia nako ni mwakuri ao ni manga karikirakea riki, ma I ataia ae te riki n nakoantina e na riai moa ni karaoaki. Iai te anga ae e kona ni karaoaki ni kauoua? A toka matan unimwaane Nelson ngke e kaeka, “E Bon Kona!” E kaungaai bwa N naa karikirakea au tarena ao n tataro nakon Tamau are i Karawa ni buokai bwa N na ata arou ae N na karaoi ni kauoua ma te Uea, N na kona ni karaoa te bwai are I taku bwa e aki kona ni karaoaki. I katuka te reirei anne i nanou.
Kabaeam nakon Ana Kantaninga
Ngai ao kainabau ai aman ngkai natira. Ti a tia n reiakina arora ni kaitarai anga aika bati n te riki ni karo. N te moan tai, I moana au bong man te aoa 4:00 n te moaningabong, ni katauraoi au bwai ni korotamnei imwain utiia natiu. I kataia n korotamnei onoua te bong n te wiiki, e ngae ngke n tai tabetai I tii kona n korotamnei inanon tii 30 te miniti. I moana au tai ni korotamnei ma te tataro, n atakina bwa bon akea au kona ngkana akea ana ibuobuoki te Uea. I tataro tiaki ni kona ni korotamnei raoi ma n ataae e kakawaki riki n te bong anne ao n tauraoi ni karaoa Ana kantaninga moa. E aki baiti reken te rikirake, ma e teimatoa n rereke.
Ni kabaitiia 12 te ririki imwiin au anga bebwa. E reke te tai are e a bwara nanou iai. E taraa n rangi ni kakanoa te maiu. Te nakoantina e a taraa n rangi n rawata te kakaewenako iai nakon are I kantaningaia. I a tekateka n tang irarikin au bwai ni korotamnei, ao ni iangoia bwa N na bon kona n riki bwa te tia korobanna ae kinaaki n aron are I a kaman iangoia. E reke irou te namakin bwa n anaa au tienoo are e toka n te kabwate, ao I a rairia nakon te tai ae 30 Eberi, 2006, te bong are imwin au anga bebwa. I a maninga taekan te namakin are e reke irou ngkoa ma Beretitenti Nelson! Titebo ma angibuakan te maiu aei a kuri ni kamaunanakoa man au iango. Ikanne i matau n te tai anne bon ana taeka te burabeti ae ngkai, “E Bon Kona!” A onikaki rannimata nakon te nano ni kakaitau ngke I uringi n taai akekei baike I a tia ni kakoroi nanoia, ao I a tarai bwai n taai aika a na roko ma te unga n nano.
Karaoan ae Taraa n Aki Kona ni Karaoaki
Imwin tabeua te namakaina, I a tareboniiaki iroun te tia korobana man te Ensign maekatiin, ni bubuti ngkana a kona ni kabongana teuana au korotamnei ni katoka n moani baan te bebwa ni kaongora ibukin te maungatabu ni kabuta n Nobembwa 2018. I rangi ni kubanako! Inanon rikirakeu, te moani bwai are I kakaraoia ngkana I karekea ana maekatiin te Ekaretia I kakakaei taian korotamnei. Ao ngkai e nang toka teuana au korotamnei iaona! Ngkanne, ngke I tuangaki bwa a tangiria ni kabeaa au korotamnei ma ana taeka Beretitenti Nelson, I a kona n noraa bain te Uea bwa e kakorakoraai nakon are imwiina.
E abwabwaki te kawai n aron au rabakau n korotamnei, ma I rangi ni karabwarabwa ibukin ana kaunga nano Beretitenti Nelson ibukin te Uea ao ibukira. I karabwarabwa ibukin norakina ae a kona n reke bwai aika a raraoi mai irou ao ana onimaki irou. I ataia bwa ngkana ti kamwakura ara onimaki iroun te Uea ti na kona ni karaoi bwai aika korakora, ae bwaai ake ti taku bwa aki kona ni karaoaki. “Bwa akea te taeka teuana mairoun te Atua ae na aki mwaaka” (Ruka1:37).