ʻE Fakahaofi ʻe he Ngaahi Fehuʻi ʻe Fitu Ko ʻEní Hoʻomo Nofomalí (Naʻa mo e Teʻeki Ke Mo Malí)
“ʻOkú ma feʻofaʻaki, ʻa ia ʻoku pau pē ʻokú ma faitatau!” Mahalo pē he ʻikai ke ke fanongo ʻoku lea ʻaki ia ʻe ha kakai tokolahi—ka ʻoku fakakaukau ki ai ha kakai tokolahi, neongo ʻoku ʻikai ke nau ʻiloʻi ia.
ʻI he taimi ʻokú ke ʻi ha vā fetuʻutaki ai ʻe iku ki he nofomalí, ʻe faingofua ke tau pehē (pe ʻamanaki taʻe-ʻilo pē) ʻe fio lelei hoʻomo ngaahi tuʻunga ʻulungāngá mo e taumuʻá ke mo faʻu ha fāmili fiefia. Ka ʻoku ʻikai faingofua pehē ʻi he taimi ʻe niʻihi. ʻE ʻaonga lahi kiate koe ha taimi fehuʻi mo e tali ʻiate koe pē, mo ho kaumeʻá, pe ko ha ongomeʻa mali foʻou fekauʻaki mo e meʻa ʻokú ke fiemaʻu moʻoní mo e vīsone ki ho fāmili ʻi he kahaʻú.
Ki he niʻihi ʻoku ʻamanaki ke mali pe toki mali foʻoú: Tali mo e tokotaha ʻokú ke feohi mo iá e ngaahi fehuʻi ʻi laló ke mo ʻilo lahi ange pe ʻokú mo faaitaha mo aleaʻi e founga ke mo toe faaitaha ange ai ʻi hoʻomo ngaahi taumuʻá.
Kapau ʻoku ʻikai ke ke lolotonga feohi fakamātoato feʻunga mo ha taha, ʻoua te ke hohaʻa ki ai; ʻe kei malava pē ke ke fakaʻaongaʻi e ngaahi fehuʻí kiate koe! ʻI hoʻo fakatupulaki hoʻo vīsoné ʻi he taimi ní, ʻe vave ʻaupito hoʻo fakatokangaʻi pe ʻoku fenāpasi hoʻo ngaahi palaní mo e tokotaha te ke malava ʻo mali mo ia ʻi he kahaʻú.
Fakakaukau pea aleaʻi e ngaahi fehuʻi ko ʻení:
-
Ko e hā ʻeta vīsone fakalūkufua ki he moʻui fakafāmilí mo hota fāmili taʻengatá? Ko e hā ʻoku mahuʻinga taha kiate kitauá?
-
Ko e hā ha ngaahi taumuʻa te ta lava ʻo fokotuʻu ke ne tokoniʻi kitaua ke ta aʻusia e vīsone ko ʻení?
-
ʻOku ʻi ai nai ha ngaahi palopalema ʻi he ongo vīsone ki he moʻui fakafāmilí Ko e hā ʻokú ta maʻu ai iá? ʻOkú ta loto fiemālie nai ke liliu ia?
-
Te ta lava fēfē ke fepoupouaki ʻi he akó, ngāue maʻuʻanga paʻangá, mo e moʻui fakafāmilí?
-
Te ta lava fēfē ke vahevahe e ngāue ʻi ʻapí?
-
ʻOkú ta loto fiemālie nai ke ta feilaulau maʻa hota ongo fāmilí?
-
ʻE founga fēfē haʻata fua e ngaahi fatongia kehekehe ʻi he fāmilí, mo kei hoko pe ko ha hoa ngāue tuʻunga tatau?
ʻOku ʻikai fie maʻu ia ke tatau ʻa hoʻo vīsoné mo e vīsone ʻa ho hoá, ka ʻe fie maʻu ke mo fakamoleki ha taimi ke talanoaʻi e ngaahi faikehekehe ʻokú mo mamata ki aí. ʻE lava ke mo toe faaitaha ange ʻi hoʻomo vā fetuʻutakí ʻaki haʻamo ngāueʻi ha vīsone tatau.