Ko Hotau Uiuiʻi ke Ngāue mo Maʻu ha Tokoní
ʻI ha faʻahitaʻu māfana ʻe taha, ne puke hoku fāmilí ʻi ha kiʻi mahaki pipihi. Naʻe tākoto ʻeku ongomātuʻá mo e toenga ʻo e fānaú, ne nau fuʻu felangaaki mo mofi ke nau lava ʻo ngaue holo. Ko au pē naʻe haó. Ko ia naʻá ku fai kotoa e feimeʻatokoní, fakamaau falé, mo hono tokangaʻi e kau mēmipa faingataʻaʻia ʻo hoku fāmilí.
Ka naʻá ku puke mo au, hili ha ngaahi ʻaho mei ai.
Naʻe ongo atu kuo ʻikai ha taha ʻi homau fāmilí ʻe moʻui lelei ke feimeʻatokoni pe fai ʻemau fakataú. Naʻe fakatuʻupakē kuo lōfia homau falé ʻi he meʻakai mei ha kau Fineʻofa tokolahi ʻi homau uōtí.
Naʻe faivelenga ʻaupito ʻa Sisitā Tomisoni ʻi heʻene tokoní. Naʻá ne ʻomi ha kai pongipongi ʻi he ʻaho Mōnité, kai hoʻatā ʻi he Tūsité, pea kai efiafi ʻi he Pulelulú mo e Tuʻapulelulú fakatouʻosi. ʻI he efiafi Tuapulelulú, hili hono tuku ʻe Sisitā Tomisoni ʻene supo nūtolo moá mo e maá ʻi he falekaí, naʻá ku ongoʻi ha tukituki ʻi he matapaá. Naʻe tuʻu ai ʻa Sisitā Uiliami mo ha kulo kiki mo e kato mā ngaohi mei he mahoaʻa koané.
Naʻá ne ʻeke mai pe kuo kai hoku fāmilí ʻi heʻene fakatokangaʻi e meʻakai ʻi he tēpile ʻi hoku tuʻá. Naʻá ku tala ange ʻikai, ʻoku teʻeki ke mau kai, ka naʻe toki tuku mai ʻe Sisitā Tomisoni ha kai efiafi.
“Kuó ne ʻomi meʻakai kiate kimoutolu ʻi he uiké kotoa, ko ia?” Ko e ʻeke mai ia ʻa Sisitā Uiliamí.
Naʻá ku tali ange, “ʻIo, ko ia.” “Kuo mau maʻu ha meʻakai lahi fau.”
Naʻe fakafulofula ʻa Sisitā Uiliami mo teke vakavaka. “Sai, ʻi he taimi hoko te ke sio ai kia Sisitā Tomisoní, tala ange ki ai ke kiʻi mālōlō pea tuku ke mau kau mo kimautolu ʻi he vahevahe he ngaahi tāpuakí!”
Naʻá ku malimali ʻi heʻene loto fakapapaú. Naʻá ku maʻu ha loto fakatōkilalo ʻi he angaʻofa kuo faitokoniaʻaki homau kiʻi fāmilí, pea talu mei ai mo ʻeku lava ʻo fakahoungaʻi moʻoni e ʻuhinga ʻo e kupuʻi lea, “vahevahe e ngaahi tāpuakí.”
ʻI he taimi ʻoku tau tokoni ai ki he niʻihi kehé, ʻoku tau vahevahe e ngaahi tāpuaki kuo foaki mai ʻe he Tamai Hēvaní maʻatautolú. ʻI he taimi ʻoku tau fakaʻatā ai e niʻihi kehé ʻi he loto fakatōkilalo mo e loto houngaʻia ke nau tokoniʻi kitautolú, ʻe lava ke nau vahevahe ʻi he ngaahi tāpuaki fakalangi kuo talaʻofa ʻe he ʻEikí maʻanautolu ʻoku ʻofa mo fetokoniʻakí.
Neongo pe ʻokú ke foaki ha ʻofa (mo ha meʻakai!) pe maʻu ia, ʻe lava ke tau maʻu e ngaahi tāpuaki fakaofo koʻení—mo ha ngaahi tāpuaki kehe—ke tau vahevahe ai.