Ngāue ʻi he Siasí
Feituʻu te tau Maʻu ai ʻa e Fakafiemālié
ʻOku nofo ʻa e taha naʻá ne faʻú ʻi ʻIutā, USA.
Ko e Fineʻofá ko ha feituʻu ia ʻoku totonu pea ʻe lava ke maʻu ai ʻe he kau fineʻofa ʻo e ngaahi tūkunga kotoa pē ha fakafiemālie ʻi heʻenau fepoupouaki, fetokoniʻaki mo feʻofaʻakí.
Tā fakatātaaʻi ʻe Emily Shay
Naʻá ku hoko ko ha palesiteni Fineʻofa ʻi homau uōtí ʻi heʻeku kei nofo mo hoku fāmilí ʻi Lasi Veikasi, Nevata, USA. Naʻá ku tupulaki ʻi heʻeku feohi mo e kau fineʻofa lelei ʻi homau uōtí. Naʻá ku manako ʻi hono palani e ngaahi ʻekitivitī naʻe fakatupu langaki moʻuí, tataki e houalotu Fineʻofá, kau atu ki he ngaahi fakataha mo e kau taki ʻo e uōtí mo tokoni ki he ngaahi fāmilí.
Naʻá ku fakaʻaongaʻi ha taimi lahi ke u ʻaʻahi ai ki he kau fineʻofá ʻi honau ngaahi ʻapí. Naʻá ku tokoni foki ki he ngaahi faʻē ne nau ongosiá, puke pe ongoʻi lōmekiná—kau fineʻofa ne nau fie maʻu ha fakafiemālie fakalaumālie mo fakatuʻasinó fakatouʻosi. Makehe mei hoku ngaahi fatongia ko ha faʻē kei talavou ki ha fānau ʻe toko onó, naʻá ku ongoʻi lavameʻa mo ongoʻi ʻoku fie maʻu au.
Pea naʻe fakafokifā e liliu ʻeku moʻuí.
Naʻe tali ʻe hoku husepānití ha ngāue ʻi ha siteiti ʻe taha. ʻI loto ʻi ha māhina ʻe taha ne mau fakamāʻopoʻopo pea hiki mei homau ʻapi ʻi Lasi Vēkasí ki ha kiʻi fale nofo totongi ʻi he feituʻu momoko ʻo Kesipā, Uaiōmingí. ʻI he uike tatau pē ne mau hiki aí, ne u ʻiloʻi ʻoku ou feitama—ko ha ongo māhanga!
Naʻá ku puke lahi ʻaupito ʻi he pō ne mau tūʻuta ai ki homau ʻapi nofo totongí. ʻOku ou manatuʻi ʻeku tokoto ʻi he mohengá ʻo ʻikai toe fuʻu lava ke ʻunu holo kae tokangaʻi ʻe hoku huesepānití ʻema fānaú mo fetuku hifo ʻemau utá mei he veeni fetukutukú. Ko e kamataʻanga ia ʻo e faingataʻaʻia fakatuʻasino ʻo ʻeku moʻuí. ʻI he māhina ʻe fā hono hokó, naʻe ʻikai ke u lava ʻo kai taʻe te u lua ʻaki ia pea naʻe ʻikai mei ʻi ai haʻaku ivi ke tokoni ki hoku fāmilí, tokangaʻi ʻema fānaú, pea—taimi ʻe niʻihi—ke feimeʻatokoni.
ʻI he kei fakaangaanga hoku husepānití ki heʻene ngāue foʻoú, naʻá ku feinga au ke u feangai mo homau koló mo fakahū ʻema fānau ʻe toko faá ki he akó. Naʻe ʻefiʻefi ʻaupito homau kiʻi fale nofo totongí, pea ne mau toki kumi pē e ʻū meʻa ne mau fie maʻú mei he ngaahi puhá. Te u fakahū ʻeku fānaú he matapaá he pongipongi kotoa ke nau ʻalu ki he akó pea ʻi he toenga ʻo e ʻahó ne u tokoto ʻi he seá kae vaʻinga pē ʻeku ongo kiʻi tamaiki īkí ʻi he tafaʻakí.
ʻI ha pongipongi ʻe taha hili e mavahe atu ʻa e kauleká ki he akó, naʻe tatangi e fafangu ʻo e matapaá. Naʻe fakaava ʻe ha taha ʻo ʻeku ongo kiʻi tamaikí e matapaá, pea naʻe tuʻu ai ha fineʻofa mei he kau palesitenisī ʻo e Kau Fineʻofa ʻo homau uooti foʻoú. Naʻá ne pukepuke ha kato naʻe faʻo ai ha ngaahi meʻa pea naʻe haʻu mo ʻene taʻahiné. Naʻá ne haʻu ke talitali lelei au ki he uōtí.
Naʻá ku fakamāʻia.
Naʻá ku kei ʻi hoku vala mohé pē ʻo tokoto he seá mo ha kane ʻi hoku tafaʻakí. Naʻe vaʻinga ʻeku ongo kiʻi tamaikí taʻekofu ʻi he falikí, ʻa ia naʻe kei felefele ʻi he ngaahi puha naʻe kei fie maʻu ke fakamaau fakaleleí.
Naʻe hū mai e fineʻofa lelei ko ʻení ʻo tuku hifo ʻene kató ʻi ha tuliki ʻo e tēpilé. Pea naʻá ne tangutu hifo ʻi homau lotofale felefelé ʻo ma talanoa—ʻo ne ʻekeʻeke fekauʻaki mo au mo homau fāmilí.
Naʻá ku ongoʻi loto-fakatōkilalo ʻi heʻema talanoá. ʻI he māhina ʻe taha kuohilí, naʻá ku ʻi hono tuʻungá, ʻo ʻaʻahi ki he kakaí mo tokoni. ʻI he taimi ní, kuo liliu e tūkungá ia. Naʻá ku tokoto pē ʻi ha fale moveuveu ʻo fuʻu fie maʻu ha fakafiemālie. Naʻá ku tuenoa, ongoʻi lōmekina mo feʻao mo ha tūkunga naʻe laka ange ʻi hoku iví. Naʻá ku kau au ʻi he kau fineʻofa naʻe fie maʻu tokoní. Kuo fakamanatu mai ʻe he ʻEikí ʻoku ou fie maʻu Ia mo e tokoni ʻoku fakafou mai ʻi Heʻene kau tamaioʻeikí.
Hili ʻene mavahé, naʻá ku maʻu ha ongoʻi fiemālie ʻi heʻeku vakai atu ki heʻene kiʻi kato talitali lelei ne hili ʻi he funga tēpilé. ʻI he ngaahi uike hoko maí, naʻá ku ifoʻia ʻi he meʻa ne ʻi he loto kató peá u houngaʻia ʻi he toutou ʻaʻahi mai ʻa e Palestemi Fineʻofá ʻo tokoni mo poupou mai lolotonga e ngaahi māhina faingataʻa ko iá. Naʻá ku ongoʻi houngaʻia ʻi he ʻamanaki lelei mo e fakafiemālie ʻoku lava ke foaki ʻe ha fineʻofa ʻe taha ki ha fineʻofa kehe.
Hili ha ngaahi māhina siʻi mei ai naʻá ma fakatau ha ʻapi nofoʻanga naʻe lahi feʻunga ki homau fāmilí. Naʻe iku ʻeku feitama faingataʻaʻiá ʻo fāʻeleʻi ha ongo māhanga fakaʻofoʻofa. Pea naʻe hoko e fineʻofa angaleleí ko hoku kaungāmeʻa ofi pea hokohoko atu ʻene poupouʻi mo langaki hake au ʻaki ʻene fakamoʻoní mo e sīpingá. ʻOku ou faʻa fakakaukau ki he pongipongi faingataʻa naʻe ʻaʻahi mai aí peá u ongoʻi houngaʻia ʻi heʻene fakahoko hono fatongiá.
ʻOku ou fakamoʻoni ko ha “kau paea kotoa pē” kitautolu ʻi he ʻao ʻo e ʻOtuá (vakai, Mosaia 4:19). ʻE lava ke liliu hotau ngaahi tūkungá ʻi ha faʻahinga taimi pē, ʻo tau fakatokangaʻi ai ʻetau fuʻu fie maʻu ʻetau Tamaí—mo kinautolu ʻoku nau tokonia kitautolu Maʻaná. Kuó u ʻilo ʻeni ʻo lahi ange ʻi ha toe taimi ko e Fineʻofá ko ha feituʻu ia ʻe lava pea ʻoku totonu ke maʻu ai ʻe he kau fineʻofa ʻo e ngaahi tuʻunga kotoa pē ha fakafiemālie ʻi heʻenau tokanga, tokoni, mo feʻofaʻakí.