Kiʻi Tohi Fakamatala ʻo e Konifelenisi ʻo ʻOkatopa 2017
“ʻIlonga ha meʻa kuó u lea ʻaki ʻe au ko e ʻEikí, kuó u lea ʻaki ia; … neongo pe ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē” (T&F 1:38 ).
ʻI hoʻomou toe fakamanatu e konifelenisi lahi ʻo ʻOkatopa 2017, ʻe lava ke mou fakaʻaongaʻi ʻa e ngaahi pēsí ni (mo e Kiʻi Tohi Fakamatala ʻo e Konifelenisí ʻi he ngaahi makasini he kahaʻú), ke tokoni atu ki hoʻomou ako mo fakaʻaongaʻi ʻa e ngaahi akonaki fakamuimuitaha ʻa e kau palōfita moʻuí mo e kau ʻaposetoló mo e kau taki kehe ʻo e Siasí.
“ʻE fakapapauʻi mai ʻe he Laumālié kiate kitautolu fakafoʻituitui ʻa hotau mahuʻinga fakalangí. …
“Tuku muʻa ke u fakamahinoʻi ʻa e fie maʻu ke fakafaikehekeheʻi ʻa e ongo foʻi lea matuʻaki mahuʻinga ko ʻení: mahuʻingá mo e tāú . ʻOku ʻikai ke na tatau. ʻOku ʻuhinga ʻa e mahuʻinga fakalaumālié ki heʻetau fakamahuʻingaʻi kitautolu ʻi he founga ʻoku fakamahuʻingaʻi ʻaki ʻe he Tamai Hēvaní kitautolú, kae ʻikai ko e founga ʻa e māmaní. Naʻe fakapapauʻi hotau mahuʻingá kimuʻa pea tau toki haʻu ki he māmaní. …
“ʻI he tafaʻaki ʻe tahá, ʻoku maʻu ʻa e moʻui tāú ʻi he talangofuá. Kapau te tau faiangahala, ʻoku tau taʻetaau, ka ʻoku ʻikai ʻaupito he taimi te tau taʻe-mahuʻinga ai! ʻOku hokohoko atu pē ʻetau fakatomalá mo ʻetau feinga ke hangē ko Sīsuú, mo kei kakato pē hotau mahuʻingá. … Te tau kei mahuʻinga pē ki he Tamai Hēvaní ʻo tatau ai pē. …
“… Kapau ʻoku lahi ʻetau ʻofa ki he Fakamoʻuí mo e meʻa naʻá Ne fai maʻatautolú ʻo lahi ange ia ʻi he ivi ʻoku tau ʻai ki he ngaahi vaivaí, tālafilí, pe tōʻonga koví, te Ne tokoniʻi leva kitautolu ke tau ikunaʻi ʻa e ngaahi meʻa fakatupu mamahi ʻi heʻetau moʻuí. ʻOkú Ne fakahaofi kitautolu mei hotau ngaahi vaivaí.”
“ʻI hoʻomou tauhi e ngaahi fekau [ʻa e ʻOtuá], te Ne lava ʻo ngāue ʻaki kimoutolu ʻi Heʻene ngāué. Ko ʻEne ngāué mo e nāunaú ko e hakeakiʻi mo e moʻui taʻengata ʻa e fefiné mo e tangatá.
“Siʻoku ngaahi tokoua, ʻoku ui mai e kau palōfitá kiate kitautolu. Te mou anga māʻoniʻoni nai? Te mou fakamahinoʻi nai hoʻomou tuí? Te mou lava nai ʻo kehe ʻaupito mo makehe? ʻE tohoakiʻi mai nai e niʻihi kehe ʻoku lelei mo fakaʻeiʻeiki mo fie maʻu homou fakakaungāmeʻá, ʻe hoʻomou fiefiá neongo homou ngaahi faingataʻá? Te mou fakaulo atu nai homou māmá? ʻOku ou fakamoʻoni ʻe muʻomuʻa e ʻEiki ko Sīsū Kalaisí ʻiate kitautolu pea ʻe ʻi hotau lotolotongá.”
Sharon Eubank, Tokoni ʻUluaki ʻi he Kau Palesitenisī Lahi ʻo e Fineʻofá, “Fakaulo Atu Hoʻomou Māmá Liahona, Nōvema 2017, 9.
Fakaʻaongaʻi ʻa e makasini ‘o Nōvema 2017 pe hū ki he conference.lds.org
“ʻE tokoniʻi kitautolu ʻe he Tamai Hēvaní ke tau ʻofa ʻo aʻu ki he niʻihi ʻoku tau pehē ʻoku faingataʻa ke ʻofaʻí, kapau te tau _________ ʻEne tokoní.” —Neill F. Marriott, “Nofo Maʻu ʻi he ʻOtuá pea Fakaleleiʻi ʻa e Maumaú
“ʻOku kau hatau tokolahi ki ha ngaahi hala fononga fakaofo ʻo e _________. … Fehuʻi loto pē kiate koe: Ko e hā hoʻo taumuʻa aofangatukú? … ʻOku fakatau nai hoʻo fonongá ki he “ngaahi tāpuaki liunga lahi” ko ia kuo talaʻofa mai ʻe he Fakamoʻuí?” —M. Russell Ballard, “ʻOku Hoko Atu e Fonongá!
Ko e Tohi ʻa Molomoná ko e taha ia e meʻafoaki mahuʻinga taha ʻa e ʻOtuá kiate kitautolú. Ko e heletā mo e pā fakatouʻosi ia—ʻokú ne ʻoatu e folofola ʻa e ʻOtuá he malaʻe taú ke maluʻi e loto ʻo e kau angatonú mo hoko ko ha _________ʻo e moʻoní.” —Tad R. Callister, “Ko e Fakamoʻoni Mālohi ʻa e ʻOtuá: Ko e Tohi ʻa Molomoná
Ngaahi Talí: 1. kolea; 2. fekumí; 3. taukapo
Ke lau, mamata pe fanongo ki he ngaahi lea ʻo e konifelenisi lahí, vakai ki heconference.lds.org