Ko ʻEku Misi Naʻe Hoko ʻo Moʻoní

Valencia Hung

Niu Sauele, ʻAositelēlia

Naʻe fanauʻi au ʻi Hongo Kongo, Siaina. ʻI heʻeku kei talavoú, naʻá ku fakaʻānaua ke u nofo ʻi ha fonua fakaʻofoʻofa ʻoku ʻātakaiʻi ʻe natula.

Hili ʻeku tupu haké mo malí, ne u hiki mo hoku husepānití ki ʻAositelēlia. Naʻá ne hoko ko ha tokotaha ʻenisinia taukei pea foaki ange ai haʻane visa ngāue, ʻa ia naʻe malava ai ke ma nofo ʻi ʻAositelēlia ʻi ha taʻu ʻe fā. ʻI he taimi naʻá ma fakatou ngāue aí, ne toe tānaki mai mo ha taʻu kehe ʻe fā ki heʻema visá.

Lolotonga e taimi ko ʻení, ne ma ngāue ke fakatupulaki homa tūkungá kae malava ke ma kole haʻama ngofua ke ma nofo fonua. Naʻe ʻikai ke ma lava ʻo totongi ha kalasi lea faka-Pilitania, ka naʻe tokoni mai ha tangata mo ha fefine ʻi homau uōtí ke ma ako. Ka, ʻi he hili ʻa e taʻu ʻe valú, ne ngalingali ʻe fie maʻu ke ma mavahe mei ʻAositelēlia. Naʻá ma ʻaukai mo lotu ki ha founga ʻe lava ai ke ma nofo. Naʻe ʻaukai mo lotu foki mo e uōtí maʻamaua.

Naʻe ngali ʻe ʻikai ha fakatuʻamelie ki homa tūkungá. Naʻe kamata leva ke fakamāʻopoʻopo ʻema ʻū meʻá pea palani ʻema foki ki Hongo Kongó. ʻI ha pō ʻe taha ne tā mai ai homa kaungāmeʻa ʻo fehuʻi fekauʻaki mo ʻema visá. Naʻá ma fakamatalaʻi ange homa tūkungá peá ne talamai ʻokú ne ʻilo ha fakafofonga ki he hikifonuá ʻe malava ke tokoni mai.

Naʻá ma ʻaʻahi atu leva ki he fakafofongá ʻi he ʻaho hono hokó. Naʻe ʻikai fuoloa kuó ne fakafiemālieʻi ʻema fakakaukaú. Te ne fakahū ʻema ngaahi meʻa fakapepá ke fakalōloa ia kae ngāue ʻaki ha kalasi visa kehe—ko ha visa nofo fonua ʻe fie maʻu ai ke ma hiki mei Senē ki he kauʻāfonua ki ʻuta ʻo e fonuá.

Ne ma hiki ki ha kolo ne fakafuofua hono mamaʻó ki ha houa ʻe taha mo e konga mei Senē. Ne ma maʻu ai ha ʻapi ne ofi pe ki he falelotú, ʻa ia naʻe takatakaiʻi ʻe ha ʻakau tuʻufonua ʻo ʻAositelēlia. Ne ma saiʻia ʻi homa ʻapi foʻoú mo e uōtí.

Ne ʻikai fuoloa mei ai kuo tali mai haʻama visa fakataimi pē. Naʻe hokohoko atu pē ʻeku lotu mo hoku husepānití. Naʻá ne ʻaukai he Sāpate kotoa pē ʻi ha māhina ʻe ono. Ne ma lau fakaʻaho ʻa e folofolá peá ma ʻalu fakauike ki he temipalé.

Pea ʻi he ʻaho ʻe taha ne ma maʻu ai ha telefoni mei he fakafofonga hikifonuá. Naʻe fie maʻu ke ma foki ki he ʻōfisi ʻi Seneé ʻo fakahū ange ʻema ongo paasipōtí. Naʻe fakafoki mai ia kuo ʻosi sitapaʻi ki ai ʻa hono tali ke ma nofo fonuá. Naʻá ma fakafetaʻi ki he Tamai Hēvaní koeʻuhi ko e tāpuaki ko iá. Naʻá ma maʻu ha tui ʻe tali ʻema ngaahi lotú, pea naʻe tali ia. Pea naʻe hoko ʻo moʻoni ʻeku fakaʻānaua ke u nofo ʻi ha fonua ne ʻātakaiʻi ʻe natulá.