ʻAi Hangatonu

Ko e fili malí ko ha meʻa mahuʻinga ia, pea ʻokú ne ʻai au ke u loto-siʻi. Te u ʻilo fēfē kuó u fai e fili totonú?

Ko e fili ko ia e tokotaha ke mali mo iá ko ha meʻa ia te ne liliu hoʻo fiefiá ʻi he moʻuí ni pea mo e taʻengatá. Ka ʻoku ʻikai totonu ke ke tailiili ai ʻo hoko ko ha meʻa ke ke faingataʻaʻia ai. ʻE lava ke ke maʻu ha fiemālie mo ha fiefia ʻi he fili ko ʻení kapau te ke tauhi e ngaahi fekaú mo muimui he ngaahi faleʻi totonú. Ko ha ngaahi meʻa ʻeni ʻe niʻihi kuo faʻa akoʻi mai ʻe he kau taki ʻo e Siasí fekauʻaki mo e meʻá ni:

ʻOku lahi ha ngaahi fili ʻe “tonu” ki he tokotaha te ke lava ʻo mali mo iá. Feinga ke ke maheni mo ha kakai tokolahi. Faikaumeʻa mo ha kakai ʻoku nau maʻu ha ngaahi tuʻunga moʻui māʻolunga. Moʻui taau. ʻI hoʻo ʻi he kakai lalahi kei talavoú, faikaumeʻa mo ha kakai te ke lava ʻo ʻalu mo ia ki he temipalé. ʻOku totonu ke hoko e tokotaha te ke lava ʻo mali mo iá ko ha tokotaha ʻokú ke ʻilo lelei te ke lava ʻo fuakava mo ia mo e Tamai Hēvaní. Kumi faleʻi mei hoʻo ongomātuʻá. “Fakakaukauʻi ia ʻi ho ʻatamaí” pea “fehuʻi [ki he ʻOtuá] pe ʻoku totonu ia” (T&F 9:8). ʻE lava ke fakapapauʻi atu ia ʻi ha ngaahi founga kehekehe, ka kuo pau ke maʻu foki ʻe he tokotaha ʻe tahá mo ha fakapapau. Ko e taimi pē kuó mo fefakapapauʻaki aí, mo feinga leva ke mo hoko “ʻo taha.”