Ngaahi ʻAta ʻo e Tuí
Christian Karlsson
Buskerud, Norway
ʻI he taimi naʻe maʻu ai ʻe Kalisitiane e ʻū hi tohinoa ʻa ʻene kui tangatá, naʻe ʻikai te ne lavelaveʻiloa ʻe mahuʻinga fau kiate ia mo hono fāmilí.
taha faitaá, Cody Bell
Naʻe ʻomai ʻe heʻeku faʻeé ha puha ʻo ha ʻū tā motuʻa. Ko e taha ʻo e ngaahi meʻa fakaʻohovale ʻi he puha ko ʻení ko e tohinoa ʻa ʻeku kui tangatá. Naʻe tohi ai ha fanga kiʻi fakamatala nounou pea kau ai mo e fanga kiʻi meʻa iiki hangē ko e mahuʻinga ʻo e penisiní, siainé pe ko e iká.
Fakataha mo ʻene tohinoá, ko e meʻa lelei tahá, ko hono hiki fakalelei ʻo e ngaahi malanga naʻe fai ʻe heʻeku Kui Tangatá ʻi he lotú.
Naʻe kau ʻeku Kui Tangatá ki he Siasí, hili hano akoʻi ia ʻi ha ngaahi taʻu lahi. Naʻá ne ngāue faivelenga pea naʻá ne hoko ko ha paionia mateaki mo moʻui angatonu. Kimuʻa pea fokotuʻu ha siteiki ʻi Noaueí, naʻá ne hoko ko ha tokoni ki he kau palesitenisī ʻo e Kau Talavoú ʻi Noauei kotoa. Naʻá ne hoko ko ha tokoni ʻi he kau palesitenisī ʻo e Temipale Sitokihoma Suetení ʻi he taimi naʻe mālōlō ai ʻi he taʻu 1986.
Naʻe kamata e kaumeʻa ʻeku ongo kuí kimuʻa pea kau ʻeku Kui Tangatá ki he Siasí. Naʻe tala ange ʻe heʻeku Kui Fefiné ʻoku ʻikai faingamālie ia ʻi he ngaahi ʻaho Sāpaté mo ha ngaahi efiafi lahi ʻi he lolotonga ʻo e uiké. ʻI he kamataʻangá naʻe fakakaukau ia ke ʻeva ki ha taha kehe koeʻuhí ko ʻene femoʻuekiná. Naʻá ne toki fakamatalaʻi ange, “Ko ha mēmipa au ʻo ha Siasi ʻoku teʻeki ke ke fanongo ai.”
Naʻe tali ange leva ʻe heʻeku Kui Tangatá, “ʻIo, ko hoʻo ʻuhingá ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní?” Naʻe moʻutāfuʻua ʻeku Kui Fefiné—naʻá ne pehē naʻá ne muimuiʻi ia! Ka naʻá ne ʻosi fanongo he Siasí kimuʻa.
ʻI he taʻu 19 ʻeku Kui Tangatá, naʻe fai ange ha kole kiate ia ke ne tokoni ʻi he tohi kakaí koeʻuhí ko ʻene mataʻitohi leleí. ʻI he taimi naʻá ne ʻeke ange ai ki ha fefine ʻa ʻene tui fakalotú naʻá ne pehē ange, “Ko ha mēmipa au ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.” Ko e toki hingoa lōlōa taha ia ʻo ha tui fakalotu kuó ne fanongo ai. Naʻá ne manatuʻi maʻu pē e hingoá. ʻI he taimi naʻe tala ange ai ʻe heʻeku Kui Fefiné ʻoku kau ki ha siasi ʻoku hangehangē ʻoku ʻikai ke ne ʻiló, naʻá ne ʻosi manatuʻi e hingoá.
ʻI heʻene ngaahi malangá, naʻe vahevahe ʻe heʻeku Kui Tangatá ʻene ngaahi fakakaukau mo e ngaahi ongo mo e faingataʻaʻia naʻe fehangahangai mo ia ʻi hono akoʻi ia ki he Siasí. Naʻá ne loto fakatōkilalo ke lotu fekauʻaki mo ʻene kau ki he Siasí. Naʻá ne maʻu ha tali pea naʻá ne talangofua ki ai.
ʻOku fakaofo hono vahevahe e ngaahi talanoa ʻa ʻeku Kui Tangatá mo hoku uaifí mo e fānaú. Kuo teʻeki ke nau fetaulaki mo ia, ka ʻoku nau fanongo ki heʻene ngaahi leá hili ha taʻu ʻe 30 mei heʻene mālōloó.
ʻOku fiefia e fāmili Kalisoní ʻi ha keimi manakoa ʻoku ui ko e “Fakapona ʻo e Fāmilí”. Ke vaʻingá, ʻoku tuʻu takatakai ʻa e tokotaha kotoa ʻo fepikinima kae hū ki tuʻa mei he lokí ha tokotaha ʻoku ui ko e “tokotaha fakaleleí.” ʻOku nau fepukeʻaki nima leva kae ʻikai motuhia ʻenau fepiki nimá. ʻOku vete leva ʻe he “tokotaha fakaleleí” e fakapona ʻo e fāmilí.
ʻIlisapeti (toʻomataʻu), Mia (loto-mālie), mo Meti (toʻohema) ʻoku nau taʻo ha laʻi mā ngaohi ʻi ʻapi.
Ko e fāʻofua ʻa Mikaele mo Mia hili e ʻekitivitī ʻo e efiafi fakafāmilí. Kuo faʻu ʻe he taimi ʻoku fakataha ai e fāmili Kalisoní ha ngaahi vā fetuʻutaki mālohi.
ʻOku sio ʻa Kalisitiane mo ʻene fānaú ʻi ha ʻū tā fakafāmili. ʻOku houngaʻia ʻa Kalisitiane ʻi he faingamālie ʻokú ne maʻu ke fakafehokotaki ai ʻene fānaú ki heʻenau ngaahi kuí.
ʻOku tataki ʻe Mia hono fāmilí ʻi ha ʻeva ki ha vaoʻakau ʻi honau kaungāʻapí.
ʻOku ʻomi ʻe he fatongia fakamātuʻá ha fiefia kia Kalisitiane mo ʻIlisapeti.
ʻOku tuʻu e fāmili Kalisoní ʻi ha feituʻu faiʻanga vaʻinga. Ko e kaka hake ʻa Meti (toʻomataʻú) ʻi he fuʻu painí mo talanoa ki hono ongo tokouá ko Mekinusi (toʻohema) mo Mikaela (loto-mālie).
ʻOku fafa ʻa Mia ʻi he uma ʻo ʻene tamaí ʻi he foki ʻa e fāmilí ki ʻapí.