Ko e Fili ke Tohí
ʻOku nofo ʻa e tokotaha naʻá ne faʻú ʻi Lainileni-Palatineti, Siamane.
“Pea ʻoku nau tauʻatāina ke fili” (2 Nīfai 2:27).
Ne toe kiʻi mafao hake ʻa e tangutu ʻa Susitina ʻi hono seá. Naʻá ne hili ʻene ʻū peni vahevahe foʻoú ʻi heʻene funga tesí. Ko e fuofua ʻaho ʻeni ʻo e akó. Ne ʻosi fetaulaki mo hono kaungāakó ʻo nau tā ha fakatātā fakafiefia.
Pea pehē atu ʻe Mīsisi Uena, “Kuo taimi ke fai ʻetau tohí!” Naʻe tufotufa leva ʻe Mīsisi Uena ha ʻū laʻi pepa ki he kalasí. “Te u tuku atu pē ha miniti ʻe 30 ke ke ngāueʻi ai ʻeni. Hili pē iá pea tau malōlō taimi siʻi leva.”
Naʻe fakaʻohovale ia kia Susitina. Naʻá ne fakakaukau, “ʻOiauē. Kuo taimi e tohí ia?”
Naʻe fuʻu faingataʻaʻia ʻa Susitina ʻi he laukongá mo e faitohí ʻi he taʻu kuo ʻosí. Ka ko e kotoa ʻo hono ngaahi kaungāmeʻá ne nau ngali saiʻia kinautolu ai. Naʻe ʻikai ke fuʻu faingataʻa ia kiate kinautolu. Fēfē nai kapau ʻe tatau pe taʻú ni ia mo e taʻu kuo ʻosí?
Naʻe toʻo hake leva ʻe Susitina ʻene peni vahevahé. Naʻá ne sio ki heʻene laʻi pepá. Naʻá ne loto-tailiili. Naʻe tohi e toenga ia ʻo e kau akó. Tuku kehe pē ia.
Naʻá ne loto ke ne fakatalanoa kia Mīsisi Uena. Te ne ʻita nai ʻi he faingataʻaʻia ʻa Susitiná? Pea kapau ʻe ʻita, ʻoku kei laka ange pē ia ʻi he tohí.
Naʻe lue atu leva ʻa Susitina ki he tesi ʻa e faiakó. “ʻE Mīsisi Uena? ʻOku faingataʻa ange ʻeni ia ʻi he meʻa naʻá ku ʻai ʻi he taʻu kuo ʻosí. ʻOku ʻikai ke u tui te u lavaʻi ia.”
Naʻe ʻikai hā mei he fofonga ʻo Mīsisi Uena haʻane loto-mamahi. Naʻá ne malimali pē kia Susitina. “Fai pē meʻa te ke lavá. Mahalo pē te ke ʻohovale ʻi he ngaahi meʻa te ke lavá! He ʻikai te ke fili maʻu pē ki he meʻa ʻokú ke sai aí. Ka te ke lava maʻu pē ʻo fili pe ko e hā e lahi hoʻo feingá.”
Naʻe foki leva ʻa Susitina ki hono tesí. Naʻá ne fakakaukau ki he meʻa naʻe lea ʻaki ʻe Mīsisi Uená. “Te u lava ʻo fili ke u feinga.” Naʻe tatau ia mo e meʻa naʻá ne ako ʻi he Palaimelí. Naʻe lau heʻenau kalasí ha potu folofola naʻe pehē “tauʻatāina ke filí.” ʻOku ʻuhinga ia te tau lava ke fai pe haʻatau ngaahi fili. ʻOku falala mai ʻa e Tamai Hēvaní ke tau fai ha ngaahi fili ʻoku leleí. ʻOkú Ne talaʻofa mai te Ne tokoniʻi kitautolu ʻi heʻetau fai ha ngaahi fehalākí.
ʻE kehe nai e akó ʻi he taʻú ni? Mahalo pē te ne fili ke ʻai ia ke kehe! Naʻe toʻo hake ʻe Susitina ʻene peni vahevahé. Naʻá ne sio ki heʻene laʻi pepá. Naʻá ne ongoʻi fiemālie. Naʻá ne fakakaukau ʻo pehē, “Sai. Te u fai ʻeni.”
Naʻe tā e fafangu malōlō siʻí. Naʻe teʻeki ai ke ʻosi ʻa Susitina. Ka kuo laka hake ʻi he vaeuá ʻa e meʻa kuó ne lavaʻí! Naʻá ne hiki hake hono nimá. “ʻE lava nai ke u nofo pe heni ʻo hoko atu ʻeku ngāué? ʻOku toe siʻi pē pea ʻosi!”
Naʻe malimali ʻa Mīsisi Uena mo kamokamo pē hono ʻulú.
Naʻe faifai pē pea ʻoatu ʻe Susitina ʻene laʻi pepá. Ne kiʻi langa hono nimá. Kae pehē foki ki hono ʻulú! Ka naʻá ne malimali pē. Kuo teʻeki ai ke ne ngāue mālohi pehē ʻi he faitohí kimuʻa.
ʻI he ʻaho hono hokó naʻe ngāue ʻa e kalasí ki he laukongá. Naʻe kole ange ʻe Mīsisi Uena ki he kalasí ke nau laukonga ʻi ha miniti ʻe 20. Naʻe toe feinga pē ʻa Susitina. Naʻá ne fakaava hake ʻene tohí pea ne lau leʻo lahi ʻa e ngaahi foʻi leá.
Naʻe kamata ke fai ʻe Susitina ha ngaahi fili ʻi he ʻaho kotoa pē. Naʻá ne fili ke ne laukonga. Naʻá ne fili ke ne faitohi. Tā ʻoku ʻikai ko ha fuʻu loko meʻa ʻa e laukongá mo e faitohí.
Naʻá ne fili foki ke ʻalu ki he laipelí. Naʻá ne ʻave ha ʻū tohi mei ai. Naʻe ʻikai ke ne teitei fai ia ʻi he taʻu kuo ʻosí. Ne ʻikai fuoloa mei ai kuó ne laukonga ʻi he taimi kotoa pē. Pea naʻe fakafiefia moʻoni! Pea ko e lahi ange ko ia ʻene laukongá, ko e lelei ange ia ʻene faitohí.
ʻI he taimi naʻe lahi hake ai ʻa Susitiná, naʻá ne ongoʻi fiefia ʻi heʻene fili ke ngāue mālohi ʻi heʻene laukongá mo e faitohí. He kuo hoko ia he taimí ni ko ha konga ʻo e ngaahi meʻa ʻoku manako hono faí.