Kae ʻOua Ke Tau Toe Feʻiloaki
Te Ne Fakamaʻamaʻa ʻEtau Ngaahi Kavengá
Fai ʻe ʻEletā Robert D. Hales (1932–2017)
ʻO e Kōlomu ʻo e Kau ʻAposetolo ʻe Toko Hongofulu Mā Uá
Mei he “Special Witnesses of Christ,” Liahona, Apr. 2001, 12–13. Ke mamata he pōpoaki ko ʻeni ʻa ʻEletā Heilí, “Jesus Christ Is the Perfect Example of Obedience,” vakai ki he prophets.lds.org pea fili ʻa e “Special Witnesses of Christ.”
ʻE liliu ʻe he māfimafi huhuʻi ʻo e Fakamoʻuí e faʻahinga ʻo e tangatá kapau te tau loto ki ai.
ʻAtá mei he Getty Images
ʻOku ou manako ʻaupito ʻi he folofolá. ʻOku ou manako he lau fekauʻaki mo e moʻui fakamatelie ʻa Sīsū Kalaisí. ʻOku lahi ha ngaahi meʻa ʻi Heʻene moʻuí te ne lava ʻo hiki hake mo ueʻi, pea fakamālohia kitautolu ʻi he ngaahi taimi ʻo ʻetau faingataʻaʻiá. Kiate au, ko e taha ʻo e ngaahi vahe toputapu taha ʻi he folofolá kotoa ko e Sione vahe 17. Ko e vahé kotoa ko ha lotu hūfekina ia naʻe fai ʻe Sīsū Kalaisi ki Heʻene Tamaí. Naʻá Ne folofola ʻo pehē, “Kapau naʻe ʻilo Koe ʻe he māmaní ʻo hangē ko ʻeku ʻiloʻi Koé.” Naʻá ne fakahā ki Heʻene Tamaí kuó Ne fai e meʻa kotoa pē kuo fekauʻi Ia ke faí.
ʻI he taimi ʻe niʻihi ʻoku ngalo ʻiate kitautolu ʻa e fakaofo e talangofua naʻe maʻu ʻe he Fakamoʻuí. Naʻá Ne fai e meʻa kotoa mo folofola ʻaki e meʻa kotoa ʻi he talangofua ki Heʻene Tamaí. ʻI Heʻene fekumi mo ʻofa ki he masivá, ko hono ui ʻEne kau ākongá, ko ʻEne ngaahi akonaki ʻi he fonua ko Palesitainé pea mo ʻAmeliká fakatouʻosi—naʻe fai kotoa ʻeni koeʻuhí naʻe fekauʻi Ia Heʻene Tamaí ke fakahoko kinautolu. Naʻe ʻikai Haʻane fokotuʻutuʻu fakafoʻituitui. Naʻá Ne folofola ʻo pehē, “[ʻOku ʻikai te u] fai ha meʻa ʻiate au pē; [ka ko ia kuo] akoʻi au ki ai ʻe heʻeku Tamaí” (Sione 8:28). Ko ha faʻifaʻitakiʻanga lelei ia ʻo e talangofuá!
ʻOku fie maʻu ke tau ʻiloʻi ʻa e Fakamoʻuí ʻi he ngaahi fili ʻoku tau fakahoko ʻi he moʻui ní. ʻE lava ke liliu Heʻene naʻinaʻi “Haʻu … ʻo muimui ʻiate aú” (Mātiu 19:21) e faʻahinga ʻo e tangatá kapau te nau loto ki ai. ʻOkú Ne maʻu ʻa e mālohi ke fakamaʻamaʻa ʻetau ngaahi kavengá kapau te tau tafoki kiate Ia.
ʻI heʻeku hoko ko ha ʻAposetolo ʻa e ʻEiki ko Sīsū Kalaisí, ʻoku ou maʻu ʻa e faingamālie ke fakahā ʻeku fakamoʻoni toputapu ki he Fakamoʻuí. Ko ʻeku fakaʻamu taupotu tahá ke fakatōkakano ʻeku fakamoʻoní ki he loto ʻo kinautolu ʻoku nau fanongo ki aí.
ʻOku ou ʻilo ʻoku moʻui ʻa Sīsū Kalaisi. ʻOku ou ʻilo ʻokú Ne fakahinohino mo tataki Hono Siasí ʻi he fakahā ʻo fakafou ʻi Heʻene palōfita ʻi he kuonga mo e taimi ko ʻení. Kapau te tau tui ki hotau Fakamoʻuí, te Ne tokoniʻi kitautolu ʻi hotau ngaahi faingataʻá mo e ʻahiʻahí, pea te tau lava ʻo kātaki ki he ngataʻangá mo foki hake ki Hono ʻafioʻangá hili e ngaahi ʻahiʻahi fakataimí ni. ʻOkú Ne moʻui mo ʻafioʻi mo ʻofa ʻiate kitautolu takitaha. ʻOkú Ne finangalo ke tāpuekina kitautolu kapau te tau haʻu kiate Ia.