Teuteu ke Fanongo ki he Leʻo ʻo e ʻOtuá

Naʻe fakamatala ʻa Palesiteni ʻUkitofa ki he ʻuluaki meʻa naʻe fai ʻe he ʻOtuá hili ʻene faʻu ʻa e tangatá mo e fefiné, ko ʻene folofola kiate kinaua mo ʻoange ha fakamatala mo ha ngaahi fakahinohino mahuʻinga. ʻOku tau maʻu ʻa e tāpuaki tatau ʻi ʻEpeleli mo ʻOkatopa ʻi he konifelenisi lahí, ʻi he taimi ʻoku lea mai ai ʻa e kau taki ʻo e Siasí mo ʻomi e akonaki ʻoku finangalo e ʻEikí ke tau fanongo ki aí.

Kuó ke ʻosi fanongo nai ki he leʻo ʻo e ʻOtuá ʻo fakafou ʻi Heʻene kau tamaioʻeikí ʻi he konifelenisi lahí? Kuó ke ongoʻi nai hano ʻoatu ʻe ha pōpoaki ʻa e tali ki he fehuʻi kuo fuoloa hoʻo fekumi ki aí? ʻI hoʻo tohinoá, te ke lava ʻo tohi e aʻusia ko iá mo e founga naʻá ne tokoniʻi ai koé. Pea teuteu ke ke fanongo ki he leʻo ʻo e ʻEikí ʻi he konifelenisi hokó, ʻaki haʻo hiki e ngaahi fehuʻi ʻokú ke maʻú mo ako kinautolu lolotonga hoʻo ako e folofolá. Lotu ki he Tamai Hēvaní, kole ke ke maʻu ha ngaahi tali mo ha ngaahi fakakaukau lolotonga e konifelenisí. ʻI hoʻo fanongo ki he kau tamaioʻeiki ʻa e ʻOtuá, tuku taha hoʻo tokangá ki he ngaahi ueʻi fakalaumālie fakafoʻituituí. Ko e hā kuó ke akó? Naʻá ke ongoʻi fēfē ʻi hono ueʻi koe ke ke liliú? Hiki e ngaahi ueʻi ko iá koeʻuhí ko e Laumālié ia ʻoku lea atu kiate koé!

Manatuʻi maʻu pē ʻoku ʻofa ʻa e Tamai Hēvaní ʻiate koe pea te Ne tataki koe ʻi he hala ʻoku totonú. ʻI hoʻo feinga ke fanongo ki Hono leʻó ʻo fakafou ʻi Heʻene kau tamaioʻeikí, ʻe tapuakiʻi mo fakamaama ai koe.