Maʻu ʻe he Fānau Akó ha Founga ke Foaki Ai
Ne tō mo toli ʻe he fānau ako foomu 4, 6 mo e 7 ʻo e ʻApiako Māʻolunga Sainehā ʻi Vavaʻú ʻoku ako ngoué ʻenau tematá ʻo foaki e lahi tahá maʻá e Falemahaki Pilinisi Uelingatoni Nguú.
Ne fakakakato ʻe he foomu 4 ako ngoué ʻenau ako ngāue ki hono teuteuʻi ʻo e konga kelekele ʻe tō mo fakahiki ki ai e tematá. Ne nau ako mo fakalakalaka ʻenau pōtoʻi ngāue ʻi hono teuteuʻi mo tokangaʻi ʻo e konga kelekelé.
Ne tokoni ʻa e kalasi ako ngoue he foomu 6 mo e 7 ki he fānau ako iiki angé ke fakahiki e ngaahi fuʻu ʻakau kei iiki ʻe 200 ki ha konga kelekele ofi mai.
ʻI he teemi hono tolu ʻo e taʻu fakaakó ne tupu e tematá ʻo lalahi pea matala ʻo aʻu ki heʻene fua.
Ne tokangaʻi mo toli e tematá ʻe he kalasi ako ngoue ʻo e foomu 7. Ne nau faʻo puha e tematá ʻo ʻave ia ki he falemahakí.
Ne hounga ki he kau toketā, neesi, mo e kau mahaki ʻo e falemahakí hono foaki atu ʻe he fānau akó e ngaahi fuʻu puha lalahi ʻo e temata fakaʻofoʻofá. Ne pehē ʻe ha taha ʻo e kau nēsí, “Ne ʻikai ke ngata pē heʻene kau lelei ki he kau mahakí, ka ko kimautolu kau ngāué ne mau ʻalu mo ha temata ki homau ngaahi fāmilí ke fai ʻaki ʻemau feimeʻatokoní.”
Ne maʻu ʻe he foomu 7 ha ʻofa lahi ki he kau mahaki ʻi he falemahakí ʻi heʻenau fengāueʻaki fakatahá. Ne pehē ʻe ha taha ʻo e fānau akó, “Ne ʻaonga ʻaupito e ngāue lahi mo e tokanga ne fai ki he ngoue tematá ke mau foaki ia ki he Falemahaki Nguú.”
ʻOku loto e ʻApiako Māʻolunga Sainehaá ke hokohoko atu e ngāue ko ʻení ʻi he kahaʻú. ʻE hanga ʻe he fānau ako ngoué he taʻu kotoa pē ʻo tō mo toli e tematá ke foaki ki he Falemahaki Nguú.