Feʻiloaki ʻa e kau Taki ʻo e Siasí mo e Toʻu Tupú
Ne toki ʻaʻahi ʻa ʻEletā mo Sisitā Uceda ki Nuʻu Sila, Tonga, mo ʻAositelēlia ke feʻiloaki mo e kāingalotú mo e kau faifekaú.
Ne lea ʻa ʻEletā Juan A. Uceda, ko ha mēmipa ʻo e Kau Palesitenisī ʻo e Kau Fitungofulú mo Palesiteni O. Vincent Haleck ʻi ha fakatahaʻanga fakalaumālie ʻo e toʻu tupú mo e kau taautaha lalahi kei talavoú ʻi Tonga ʻi Nōvema ʻo e taʻu kuo ʻosí.
Ne kau atu ki ai e ongo hoa ʻo ʻEletā Useta mo ʻEletā Hālekí, ʻa Maria Isabel Uceda mo Peggy Haleck. Ne kau atu foki ki ai mo ʻEletā ʻAisake Tukuafu, ko e Fitungofulu Faka-ʻĒliá mo hono uaifí ko Lose Tukuafu, mo Benhur Kīvalu, ko e Palesiteni ʻo e Siteiki Tonga Nukuʻalofa Harbour pea mo ʻĀnau Hala mei he Siteiki Tonga Nukuʻalofa Capital.
ʻI he fakatahá ne fakahoko ai ha fehuʻi mo e tali ʻa e toʻu tupú ki he kau taki ʻo e Siasí ʻenau fakakaukau ki he lotú, ngāue fakafaifekaú, faikaumeʻá, fakahoko ʻo e akó, mo e moihū fakafoʻituituí.
Ne ʻeke ʻe ʻEletā Useta, “ʻOku malava fēfē ke tūʻulutui ʻo fakataufolofola ki he ʻOtuá peá Ne fanongo mai?”
“ʻOku ʻikai ke u lava ʻo fakamatalaʻi atu ia kiate kimoutolu, ka ʻoku ou ʻiloʻi ʻoku moʻoni pea ʻoku fanongo mai e ʻOtua tatau pē ko iá ki hoʻomou lotú kotoa. Kapau te ke kole ʻe lava ke tali hoʻomou lotú.”
“Te ke lava ʻo tūʻulutui ʻi Tonga, Pelū pe Sōleki Siti. ʻOku mamaʻo tatau pē ia ki he ʻOtuá pea te ne fakahaaʻi atu e talí kiate koe.”
“Ko e meʻa pē ʻoku palopalema ʻi he lotú, ko koe. Te ke lava ʻo fakaleleiʻi ia ʻaki haʻo lotu. ʻOku hoko ia. ʻOku ou ʻilo ʻe hoko ia neongo he ʻikai ke u lava ʻo tala atu e anga ʻene hokó ka ʻoku ou ʻiloʻi ʻoku hoko ia.”
Ne ʻeke ʻe ha talavou ʻe taha ʻo pehē, “ʻE anga fēfē haʻaku ʻiloʻi pe te u ʻalu ʻo ngāue fakafaifekau pe ʻikai?”
Ne kau ʻa ʻEletā Hāleki ki he Siasí ʻi hono taʻu 17, peá ne loto ke ako ʻi he ʻUnivēsiti Pilikihami ʻIongi ʻi ʻIutaá. Naʻá ne maʻu ai ha ongoʻi mālohi ke ʻalu ʻo ngāue fakafaifekau ʻi ha taʻu ʻe ua maʻá e Siasí.
Naʻá ne pehē, “Ne hoko hono lau ʻo e Tohi ʻa Molomoná ko ha fakamoʻoni fakafoʻituitui ia kiate au ki he ongoongoleleí.”
Ne vahevahe ʻe Sisitā Maria Isabel Uceda ʻene fakaʻamu he taimi ne fāʻeleʻi ai ʻene fānaú ke nau lalahí pea tukutaha honau taimí ke ō kotoa ʻo ngāue fakafaifekau. “Ne nau teuteu pē talu mei heʻenau kei pēpē. Ne nau kau he polokalama seminelí mo ako ʻenau folofolá ko ha founga ia ke fakamālohia ai ʻenau tuí.”
ʻI he tali ki he fehuʻi, “Te u ʻiloʻi fēfē ko e tokotaha ʻokú ma teití ko e tokotaha totonu ia kiate aú?” Ne pehē ai ʻe Sisitā Peggy Haleck, “Lotu pea tuku ha taimi ke mo maheni lelei ai. Tuku ha taimi ke fevahevaheʻaki ai hoʻomo ngaahi ʻamanakí mo e fakaʻamú, kae pehē ki hoʻomo fakamoʻoni ki he tuí.”
ʻI ha tali ki ha fehuʻi tatau, ne pehē ai ʻe ʻEletā Tukuafu, “Fakaʻaongaʻi fakataha e taimí—ko ha taimi ʻo e teuteu. ʻE fie maʻu ke tukutaha hoʻo tokangá ki ha taumuʻa maʻongoʻonga ange.”