Ngaahi Tefitoʻi Moʻoni ʻo e Faiako ʻAʻahí

Lotua e Fineʻofa Takitaha ʻaki Honau Hingoá

ʻE tupulaki ʻetau ʻofa mo e ueʻi fakalaumālie kiate kinautolu ʻoku tau faiako ʻaʻahi ki aí ʻi he taimi ʻoku tau lotu ai maʻá e fineʻofa takitaha ʻaki honau hingoá ʻi he loto-fakatōkilalo.

visiting teaching companions praying together

Naʻe talamai ʻe ha fineʻofa ʻe taha lolotonga ha vahaʻataimi faingataʻa ʻi heʻene moʻuí, naʻá ne faʻa maʻu ha tā telefoni pe ko ha pōpoaki ʻi he telefoní mei heʻene ongo faiako ʻaʻahí ʻi hono “ngaahi ʻaho faingataʻa tahá” Hangē ne na ʻilo pē ʻe kinaua e taimi naʻá ne fie maʻu tokoni aí. Naʻá ne ʻilo naʻá na lotua ia lolotonga ʻena ʻaʻahí pea ʻiate kinaua pē foki.

ʻOku vahevahe ʻe he folofolá ha ngaahi sīpinga lahi ʻo e kakai tangata mo e kau fafine ne nau lotu maʻá e niʻihi kehé ʻaki honau hingoá. Naʻe kau e tamai ʻa ʻAlamā ko e Siʻí ʻi ha kakai naʻe makehe ʻaupito. Naʻe fakahā ʻe ha ʻāngelo kia ʻAlamā ko e Siʻi, ʻo tala ange “kuo lotu [hoʻo tamaí] ʻi he tui lahi koeʻuhí ko koe … ; ko ia, ko hono ʻuhinga ʻeni kuó u haʻu ai ke fakamahino kiate koe ʻa e māfimafi mo e mafai ʻo e ʻOtuá, koeʻuhí ke lava ʻo tali ʻa e ngaahi lotu ʻa ʻene kau tamaioʻeikí ʻo fakatatau mo ʻenau tuí” (Mosaia 27:14).

ʻOku fakaava hotau ngaahi lotó ʻi heʻetau felotuʻakí ke tau maʻu e ngaahi tāpuaki ʻoku finangalo ʻa e ʻEikí ke foaki maʻatautolú. “ʻOku ʻikai ko e taumuʻa ʻo e lotú ke liliu ʻa e finangalo ʻo e ʻOtuá, ka ke maʻu mai maʻatautolu mo ha niʻihi kehe foki ʻa e ngaahi tāpuaki kuo ʻosi finangalo pē ʻa e ʻOtuá ke foaki maí, ka kuo pau pē ke tau kole pea tau toki maʻu ia.”¹

Naʻe pehē ʻe Suli B. Peki, ko e Palesiteni Lahi mālōlō ʻo e Fineʻofá, “Fakakaukau ki he mālohi te tau maʻu fakalūkufua kapau ʻe lotu fakamātoato e fineʻofa kotoa ʻi he pongipongi mo e efiafi kotoa pē pe, lotu maʻu pē ʻo hangē ko ia kuo fekau ʻe he ʻEikí.”² ʻOku fakamālohia kitautolu fakataautaha mo ʻetau hoko ko e kakai fefine ʻo e Kāingalotu ʻi he Ngaahi ʻAho Kimui ní ʻi heʻetau lotua ʻa kinautolu ʻoku tau faiako ʻaʻahi ki aí.

Naʻe pehē ʻe Palesiteni Henelī B. ʻAealingi, Tokoni ʻUluaki ʻi he Kau Palesitenisī ʻUluakí: “Te ke lotua ai e founga ke ʻiloʻi ʻa e lotó. … ʻE fie maʻu ke ke ʻiloʻi ʻa e finangalo ʻo e ʻOtuá ke ke fai ke tokoniʻi kinautolú pea fakahoko kotoa ia fakatatau mo e meʻa te ke lavá, ʻo ongoʻi e ʻofa ʻa e ʻOtuá kiate kinautolú.”³

Tuí, Fāmilí, Fakafiemālié

Relief Society seal

Maʻuʻanga Fakamatalá

1. Fakahinohino ki he Ngaahi Folofolá, “Lotú.”

2. Julie B. Beck, “What Latter-day Saint Women Do Best: Stand Strong and Immovable,” Liahona, Nov. 2007, 110.

3. Henry B. Eyring, “Lakanga Fakataulaʻeikí mo e Lotu Fakafoʻituituí,” Liahona, Mē 2015, 85.

Fakakaukau ki he Meʻá ni

Ko e hā ha ongo fakalaumālie pe ngaahi fakakaukau kuó ke maʻu ʻi hoʻo lotu maʻá e kau fineʻofa fakataautaha ʻokú ke faiako ʻaʻahi ki aí?

Ngāue Fakatauhi

ʻE ʻomai ʻe he peesi ko ko ʻení ha tefitoʻi moʻoni kehekehe ʻi he māhina takitaha kae ʻikai ko hano ʻomai ha pōpōaki makehe pē, ke tokoniʻi kitautolu ketau toe feakoʻaki lelei ange. ʻI hoʻo lotua mo fekumi ki he ueʻi fakalaumālié, te ke ʻilo ai ʻa e pōpoaki fakalaumālie mo e tokoni ki he fiemaʻu ʻa e fefine takitaha.