Ko e Tokoni kia ʻAná

Margaret S. Lifferth

ʻIutā, USA

ʻI he ngaahi taʻu kuohilí, naʻá ku faiako ai ki he fānau taʻu ono ʻi he Palamelí. Naʻe kau e hingoa ʻo ʻAná ʻi he lisi tali uí. Naʻá ku maheni mo e fāmilí ke u ʻilo ne ʻosi māvae ʻene ongomātuʻá pea naʻá ne nofo mo ʻene tamaí. Naʻe tātātaha ke na haʻu ki he lotú.

Naʻá ku tuʻu atu ʻi hona ʻapí ke fetaulaki mo ʻAna mo ʻene tamaí pea mo fakaafeʻi ʻa ʻAna ki he Palaimelí. Naʻe hangē naʻe fie haʻu ʻa ʻAná, ka naʻe ʻikai pē ke haʻu ia. Naʻá ku tā ki hono ʻapí ʻi he pongipongi Sāpate kotoa ʻi ha ngaahi uike lahi, ke fakaafeʻi ia ki he Palaimelí. Naʻe ʻikai tali mai ʻe ha taha ʻa e telefoní, ka naʻá ku tuku maʻu pē ha fekau ʻo fakahā ange kia ʻAna ʻeku fiefia kapau te u sio ki ai ʻi he Palaimelí.

ʻI ha pongipongi Sāpate ʻe taha, ne ʻi ai ʻa ʻAna. Naʻe tokoni ʻene tamaí ke teuteuʻi ia ki he Palaimelí ʻaki hono fakatui e kofu lelei taha ne taau mo e Sāpaté pea ne ʻomi ia ki he lotú. ʻI heʻeku fiefia ke u vakai kiate iá, ne u talitali lelei ia peá u tokoni ke ne maheni mo e fānau kehe ʻi he kalasí.

Naʻe fai ʻemau lēsoní, hiva ha ngaahi hiva, pea fai ha ʻekitivtī tā valivali ʻi he fakaʻosinga e kalasí. ʻI he foki atu ʻa e fānaú, naʻe haʻu ʻa ʻAna kiate au ʻo ne ʻomai ha kiʻi laʻi pepa ki hoku nimá. Ne u ʻuluaki fakakaukau ko ha kiʻi laʻi veve. Naʻe ʻamanaki ke u lī ia, ka naʻe ueʻi au ʻe he Laumālié ke u fola hake ia. Naʻe hiki ʻe ʻAna ha kiʻi fakamatala ʻi he laʻi pepá maʻaku. ʻI he mataʻi tohi ʻo ha kiʻi leka taʻu ono, naʻá ne tohi ʻo pehē, “ʻOku ou ʻofa ʻiate koe.”

Naʻe ʻikai ke fuʻu ʻiloʻi lelei au ia ʻe ʻAna ke ne ʻofa ʻiate au. Ko e meʻa pē naʻá ne ʻilo fekauʻaki mo aú ko ha leʻo ʻi he mīsini tuku fekaú ʻi heʻeku fakaafeʻi ia ki he Palamelí. Ka ko e kiʻi ngāue siʻisiʻi ke tokoniʻi iá, naʻá ne ʻai ʻa ʻAna ke ne ʻilo ʻoku ʻi ai ha taha ʻoku tokanga mo tokoniʻi ia ke ne ongoʻi ʻa e ʻofa ʻa e Fakamoʻuí.

Naʻá ku sio kia ʻAna ʻi he Palaimelí hili ha ngaahi taimi pea kamata ke haʻu foki mo ʻene tamaí ki he lotú. Ka ʻi he toe liliu e ngaahi tūkunga ki hona fāmilí, naʻe tātātaha leva ʻemau sio kiate kinauá.

Kuó u faʻa fakakaukau kia ʻAna ʻi he ngaahi taʻu kuohilí. ʻOku ou ʻamanaki atu ʻaki e kotoa hoku lotó ʻokú ne manatu ki hono taimi ʻi he Palaimelí. Mahalo te ne manatuʻi e ngaahi meʻa naʻá ne akó, ka ʻoku ou ʻamanaki pē ʻe toe mahulu ange ʻene manatuʻi ʻene ongoʻi e ʻofa ʻa e ʻEikí, ʻa e fakafiemālie ʻo e Laumālié mo e ʻofa ʻa ha faiako.