Kuo Ngalo Nai Au ʻi he ʻOtuá?
Edwin F. Smith
Utah, USA
Tā fakatātā ʻa Allen Garns
Kuó u fekumi ʻi he feituʻu kotoa pē. Kuó u fakaʻuli tuʻo ua mei he ʻōfisí ki he ngāueʻangá ʻi hono kumi e ngaahi konga mahuʻinga naʻe fie maʻu ke fakakakato ʻaki ha loli hiki meʻa mamafa ne mau fakafolau ki hono langa ʻo ha ʻapitanga sōtia. Naʻe fakataimitēpileʻi ia ke fakafolau atu ʻi ha ʻaho ʻe ua—ke feʻunga tonu mo e taimi naʻe fie maʻu ki aí. ʻE fehangahangai ʻeku kautahá mo ha ngaahi tautea lahi kapau he ʻikai ke mau lavaʻi ʻemau tukupaá.
Naʻá ku hū atu ki he loki tukuʻanga meʻa ʻo e ʻōfisí peá u toe fakasio e konga naʻe puliá. Naʻá ku sivi e puha takitaha mo toe fakapapauʻi naʻe ʻota kotoa e ʻū kongokongá. Kuo tōmui ke toe ʻota e ʻū kongokongá pea kei maʻu pē e taimi naʻe fie maʻu ki aí. Naʻá ku loto-foʻi. Naʻá ku foki ki ʻapi mo kei feinga pē ke fakakaukauʻi e founga ke fakaleleiʻi ʻaki e palopalemá.
Naʻá ku fai ha kiʻi lotu nounou naʻe ʻikai ke ʻuhingamālie kiate au kimuʻa peá u feinga ke mohé. Naʻá ku toe fakakaukau ki he ngaahi meʻa naʻá ku fai lolotonga e ʻahó, mo ʻamanaki pē te u manatuʻi ha meʻa naʻe ʻikai ke u fai. Naʻe aʻu ki he hoko ʻa e 3 hengihengi naʻe ʻikai ke u lava ʻo mohe lelei.
Naʻe faifai peá u tangutu ki ʻolunga. Naʻá ku sio hifo ki he pilo naʻá ku tuku he falikí ke fakamanatuʻi mai ke u lotú. Naʻe ʻikai ke u ongoʻi ʻoku ou fie lotu. Kuó u lotu he ʻahó kotoa ka naʻá ku ongoʻi ʻoku ʻikai ha ʻaonga ʻo e ngaahi meʻa naʻá ku lea ʻakí. Kuo Ngalo Nai Au ʻi he ʻOtuá?
ʻI he ʻikai ha toe meʻa ke u tafoki ki aí, naʻá ku tūʻulutui hifo ʻo kamata ke u lotu. Naʻá ku kole ki he Tamai Hēvaní pe ʻokú Ne ʻafioʻi e tūkunga ʻoku ou ʻi aí. Naʻá ku kole ange, “Tamai Hēvani, ʻokú Ke ʻafioʻi e feituʻu ʻoku ʻi ai e ʻū kongokonga ʻoku molé. ʻE lava nai ke Ke fakahā mai ia kiate au foki—ʻi he ʻahó ni?”
Kimui ange ʻi he pongipongi ko iá, naʻá ku hū atu ki hoku ʻōfisí. Naʻá ku tuku ʻeku kató ʻi he funga tēpilé peá u ongoʻi ʻoku totonu ke u vakaiʻi fakaʻosi e loki tukuʻanga meʻá. Naʻá ku hū atu ki he loki tukuʻanga meʻá peá u fakasio ʻi he ngaahi puha naʻá ku ʻosi fakasio mo toutou fakasio ʻi he ʻaho kimuʻá. Naʻá ku fakatokangaʻi ha puha lahi. Naʻe ʻi ai ha meʻa naʻe ngali kehe.
ʻI heʻeku sio fakalelei hifó, naʻe ʻikai ko ha puha pē ʻe taha ka ko ha puha ʻe ua ʻoku faʻo fakataha kinaua. Naʻá ku hiki hake e puha ʻi ʻolungá mei he puha ʻi laló. Naʻá ku maʻu e ʻū kongokongá ʻi he puha ʻi laló. Naʻá ku fai ha lotu fakafetaʻi mo foki ki hoku ʻōfisí ke fakahā ki he kau foʻu ukameá kuo maʻu e ʻū kongokonga naʻe puliá.
Naʻe fakafokifā ʻeku fakatokangaʻi, naʻe ʻikai ko e ʻū kongokongá pē naʻá ku maʻú, ka kuó u ʻiloʻi foki naʻe ʻafioʻi ʻe he Tamai Hēvaní hoku tūkungá pea naʻá ku mahuʻinga kiate Ia. ʻOku ʻikai ngalo au ʻi he ʻOtuá, pea he ʻikai te u ngalo ʻiate Ia.