Te u ʻilo fēfē nai kuó u fakatomala kakato?

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo pehē “ʻoku ʻuhinga e fakatomalá ki he fai feinga ke liliu” pea ko e “liliu moʻoní ko ha toutou feinga ki ai.” Naʻá ne pehē foki “ke tau tafoki kakato ki he ʻEikí, kuo pau ke ʻoua naʻa toe siʻi hifo ia ʻi he fuakava ke talangofua kiate Iá,” ʻa ia ʻoku hā ʻi he fuakava ʻo e papitaisó mo e sākalamēnití (“Ko e Meʻaʻofa Fakalangi ʻo e Fakatomalá,” Liahona, Nōv. 2011, 39). ʻOku ʻuhinga foki ʻa e fakatomala kakató ki haʻo totongi huhuʻi ha mamahi naʻá ke fai ki he niʻihi kehé. ʻIkai ngata aí, kuo folofola ʻe he ʻEikí ko e tangata ʻe fakatomala kakato mei heʻene faiangahalá “te ne vete ia pea liʻaki ia” (T&F 58:43). ʻOku totonu ke ke vete kotoa hoʻo ngaahi angahalá mo e ngaahi faiangahala mamafá ki he Tamai Hēvaní mo hoʻo pīsopé foki. (ʻI hoʻo veiveiuá, talanoa ki hoʻo pīsopé. ʻOkú ne ʻi aí ke tokoniʻi koe.)

Hili hoʻo fai e ngaahi meʻá ni, ko e founga ke ke ʻilo ai pe kuó ke fakatomala kakató ko hoʻo vakaiʻi mo ongoʻi e ngaahi nunuʻa ʻo e fakatomalá—ngaahi liliu ʻi hoʻo ngaahi fie maʻú, fakafōtungá, ngaahi vaá mo e ʻulungāngá. Pea mahulu angé, ʻe ʻomi ʻe he fakatomala kakató ʻa e takaua ʻo e Laumālie Māʻoniʻoní.