2019
Ekōjkan Kōm̧m̧ane juon Résumé kōn ejjab Ļap Imminene
Juļae 2019

Ekōjkan Kōm̧m̧ane juon Résumé kōn ejjab Ļap Imminene

Jān Heather White Claridge

Māākjiin ko an Kabun̄ in

Ejjab ke kanooj ļap n̄an likūti ilo Résumé eo am̧? Lale kūr ko am̧ ilo Kabun̄ in!

Jet jekjen ko me ekkā aer walo̧k ilo Résumé ko rej “Imminene in jerbal,” “Iminene in Baļintier,” “Jeļāļo̧kjeņ,” im “Kapeel ko.” Men̄e ej juon laajrak ekadu, āinwōt ejjab lōn̄ iminene ko ilo eria kein emaron̄ in erom kamijak. Bōtaab jab ebbwer! Emaron̄ lōn̄ļo̧k am̧ imminene jen am̧ ļōmņake—eļaptata ilo kūr ko am̧ ilo Kabun̄ in remaron̄ in lewaj n̄an eok imminene eo aorōk. Jej kakūrm̧ool im kajjieon̄ kōļapļo̧k kūr ko ad ilo Kabun̄ in kōn iakwe n̄an Irooj im juon ikdeelel n̄an jipan̄ ro Nejin, bōtaab kapeel ko jej būki jān kōm̧m̧ane āindein emaron̄ jipan̄ kōjenoļo̧k kōj ilo kappukōt juon jerbal barāinwōt.

Kōlaajraki Jerbal ko im Emakijkijier

Jekdo̧o̧n kūr rot ko am̧ ilo Kabun̄ in, bōlen ewōr am̧ tōprak ko im kapeel ko kwar ekkatak me komaron̄ kobaiki ilo résumé eo am̧. Kōm̧m̧ane juon laajrak in jerbal ko kwaar kōm̧m̧ani ilo kajjojo kūr ko im je ewi emakijkij in am̧ kar kōm̧m̧ani jerbal kein im ewi lōn̄in armej ro raar iiaio̧ ippāer.

Ennaan in Tōbrak ko

Eo tok juon, ejaake “ennaan in tōprak ko.” Men kein rej tukadu in kōmeļeļe eo an ennaan ko kōn ta eo kwar kadedeļo̧k ilo iien kūr eo am̧. Rej waļo̧k ilo résumé eo am̧ ilo juon laajrak in ium̧win kajjojo imminene.

Jino kajjojo ennaan kōn juon “verb naan in jerbal”—verb naan ko rekajoor āinwōt tōl, kōkōm̧anm̧anļo̧k, katakin, ko eierļo̧k wōt.

Waanjon̄ok ko

Erkein rej ennaan in tōbrak ko pedped ioon jet iaan kūr ko im ekoba jerbal ko, emakijkijin, im oraņ ro ekkā aer ekkeijeļo̧k ippān kūr ko.

  • Eļan̄n̄e juon rūkaki:

    • Kōpooj juon katak wiik otemjej jen ekkatak bok in katakin ko im jeje ko rekwojarjar im aini kein jipan̄ ko im imminene ko an juon make.

      • Kōn emakijkijin, mekarta kōlaajrake emakijkijin am̧ kōm̧m̧ane jerbal—wiik otemjej, ruo katten ilo juon allōn̄, ko jet.

    • Katakin juon kūlaaj jiljino uwaan dettaer 14- n̄an 16 wiik otemjej ium̧win 50 minit ko.

      • Jon̄an kūlaaj eo im ro rej pād ie enaaj pedped wōt ioon kūr eo am̧.

  • Eļan̄n̄e ilo juon būreejtōnji:

    • Ejaake n̄an tōpare allōn̄ otemjej im kōttōbar ko aitok kitier n̄an kumi eo.

    • Kea kōn jeraam̧m̧an eo an 30 ro uwaan ilo doulul eo.

    • Kamineneik ritōl ro im rūkaki ro kōn eddo ko aer.

    • Ļōmake im karōk m̧akūtkūt ko allōn̄ otemjej n̄an 26 armej ro.

    • Ejaake im ļoore juon bajet an allōn̄ otemjej.

  • Eļan̄n̄e juon ritōl al:

    • Karōk juon būrookram̧ in al wiik otemjej.

    • Karōk juon iien al kōm̧m̧ane jān ro uwaan jarlepju eo.

    • Karōk būrookram̧ in al ko ilo iien kakkije ko im iien ko reļļap.

  • Eļan̄n̄e kwaar jerbale juon mijen:

    • Karōk im kadedeļo̧k kōttōbar ko an katakin aitok kitien im kōkōm̧anm̧anļo̧k an juon-make wiik otemjej.

    • Katakin dettan eo 16 armej ro im kumi ko kajjojo wiik kōn ekōjkan kōkōm̧anm̧anļo̧k mour ko aer kōn eddo im ekkatak eo an juon make.

    • Eļan̄n̄e juon rikaminene: Kamineneik im kapilōk mijenede ro rekāāl ilo katakin im ukukōt n̄an juon jikejuuļ epen.

    • Eļan̄n̄e juon sister ej kaminene, district, ak ritōl eo an zone eo: Eddo n̄an kaļijur, etale, riboote eddōkļo̧k eo an, im kea kōn 14 mijenede ro.

    • Eļan̄n̄e ilo juon laļ ilikin: Jokwe ilo [juon laļ ilikin] ium̧win [juon iien aitok] im kōļapļo̧k aō jeļā kōn m̧anit eo aer.

    • Eļan̄n̄e kwoj kōnono bar juon kajin, kōm̧m̧an juon kakeememej bwe kwaar ajeļo̧k eok ilo kōnono kajin eo im jon̄an iien eo.

    • Errein waanjon̄ok ko relukkuun alikkar, ak lukkuun pedped wōt ioon ta eo kwaar kōttōbrake im an ļapļo̧k am̧ ekkejel n̄an jerbal eo kwoj kōņaan, résumé eo am enaaj bar.

Kōm̧m̧ane Résumé eo Am̧

Kobaik laajrak eo am̧ kōn kūr ko im tōprak in ennaan in tōprak ko am̧ n̄an résumé eo am̧. N̄an jipan̄ kūr ko am̧ bwe ren jejjet n̄an résumé eo am̧, kwoj aikuj kōm̧m̧ani oktak ko rein juon n̄an résumé eo am̧ n̄an an jetjet n̄an kōmeļeļe eo an jerbal eo kwoj kanne n̄ane.

Kōmeļeļe ko an jerbal eo enan̄in aolep iien ekkā an wōr ie naan ko raorōk ilo er. Naan kein raorōk rej men ko rejeno̧lok me jikin jerbal eo ej pukoti ippān armej eo rej kōjerbale, im kwonaaj lukkuun lale n̄an kōjerbali naan kein raorōk ilo résumé eo am̧. Kwonaaj barāinwōt kōņaan kwaļo̧k kūr ko am̧ me eļap wōt aer jetjet n̄an kōmeļeļe eo an jerbal eo. Eļan̄n̄e kwoj kanne n̄an erom juon rijipan̄ an juon armej, kōmejajaik kūr ko me eaar koba kapeel ko an juon doulul, ak eļan̄n̄e kwoj kanne n̄an erom juon ribōk jikin juon rūkaki, kōlaajrake kūr ko me eaar koba katakin.

Kakkobaba in Jipan̄ ko

  • Kōlaajraki kūr ko am̧ ium̧win “Volunteer Experience” jekjen eo.

  • Kōlaajraki doulul eo āinwōt “Kabun̄ eo an Jisōs Kraist im Armej ro Rekwojarjar ilo Raan-ko Āliktata.”

  • Kōlaajraki etan kūr eo am̧ āinwōt taitōļ in jerbal eo.

  • Kōjerbal naan ko im eoon ko reļļap āinwōt jarlepju ijeļo̧kin ward ak branch im m̧akūtkūt ko an jodikdik wiik otemjej ijeļo̧kin Mutual.

  • Kōmeļeļeik doulul ko me armej ro remaron̄ in jab jeļā kake.

    • N̄an waanjon̄ok, kōmeļeļeik Doulul eo an Kōrā ro āinwōt juon doulul eo eļap an kōrā aolepān laļ in. Komaron̄ ba Doulul eo an Kōrā ro ilo ward ak branch eo am̧ āinwōt juon kurup ak iunit ijo jokwe ie an doulul eo.

Komaron̄ bar bōk pedped in katak ko ilōn̄ n̄an kalikkar kapeel ko im imminene ko jān jerbal in baļentier ko, jerbal ko, im m̧akūtkūt ko kwaar kōm̧m̧ane. Ej aorōk n̄an kwaļo̧k elōn̄ imminene ko rōkooktaktak me rej jerbal n̄an jerbal eo kwoj kōņaan bōke. Kōn menin, ippānļo̧k kūr ko am̧ ilo Kabun̄ in, kajjion̄ kobaik jon̄an eo wot ejetjet imminene ko jon̄an wōt am̧ maron̄ ilo résumé eo am̧. Jekdo̧o̧n eļan̄n̄e ejjab maron̄ m̧ōkaj am̧ kile, eļap ijo kwoj leļo̧ke, kōn menin jab pere eok make.