2019
Rejtake Mijenede Ro Me Ekar M̧ōkaj Aer Ro̧o̧l N̄an M̧weo
Juļae 2019

Rejtake Mijenede Ro Me Ekar M̧ōkaj Aer Ro̧o̧l N̄an M̧weo

Jān Kevin Theriot, PhD

LDS Family Services

Jipan̄ ko n̄an kōketak kōmour ibwilijin mijenede ro me ekar m̧ōkaj aer ro̧o̧l n̄an m̧weo jān kar kōtmene.

Juon iaan bwebwenato ko rekaitoktok limo jān Bok in Mormon ej kōn 200 ritariņae ro an Hilamōn ro raar ikinejnej ilo tariņae (lale Alma 57:25). Ij ļōmņak ealikkar wōr men ko reier wōt juon ikōtaan 200 ritariņae ro im mijenede ro rainin me, kōn jabdewōt un ko, em̧ōkaj aer ro̧o̧l n̄an m̧weo jān kar kōtmene.

Men̄e 200 raar likūt kapijuknen ko aer kōn eļap itok limo ko, raar lo er make aer kar ineekļo̧k er jān jikin pata eo. Ij kōjatdikdik bwe raar lo er make āinwōt reperan, kar leļo̧k aolep aer, ak ij ba raar en̄jake pere āinwōt kajjitōk in etke raar jab kōjparok āinwōt ro m̧ōttaer.

Ejja āinwōt ritariņae ro an Hilamōn, mijenede ro me em̧ōkaj aer ro̧o̧l jān mijen ko aer emakijkij likjab lale m̧ool eo bwe raar baļentier im ilo̧k n̄an “tariņae,” kōn peran leļo̧k aolep men ko remaron̄e. Raar kōppopo n̄an mijen ko aer im raar obrak kōn eļap tōmak kōn juon ikdeleel n̄an jerbal n̄an Irooj. Ke raar “ikinejnej” (jelm̧ae, n̄an waanjon̄ok, jekjek ko kōn ājmour an ānbwin im kōļmenļo̧kjeņ), ekkā aer kalimjōk ta eo raar jab kadedeļo̧k im en̄jake inepata, jook, ak ebbweer. Remaron̄ kajjitikin im̧we eo me eaar tōlļo̧k er n̄an jerbal. Mijenede rein me raar ro̧o̧l remaron̄ inepata kōn an armej kalimjōk er ak em̧ool an Irooj kalimjōk er. Remaron̄ en̄jake āinwōt n̄e raar likjab ak jab tōprak im bōlen nana aer kalimjōk er make.

Mijenede ro me ekar m̧ōkaj aer ro̧o̧l n̄an m̧weo jān kar karōke eaikuji kijejeto ko an baam̧le eo, ro m̧ōttaer, ritōl ro, im membōr ro n̄an jipan̄ er “mour.” Errein jet iaan jipan̄ ko n̄an jim̧or mijenede ro rej ro̧o̧ltok im ro uwaan baam̧le ko aer, ritōl ro an Kabun̄ in, ro m̧ōttaer, im ro uwaan ward eo.

Iakwe Doon: 6 Men ko Komaron̄ Kōm̧m̧ani n̄an Jipan̄ Kōmour Mijenede ro raar Ro̧o̧ltok

  1. Pukotļo̧k er ilo iakwe n̄an kaenōm̧m̧an, kam̧ool, im kea kōn kajjojo mijenede ro raar ro̧o̧l im baam̧le eo an āinwōt n̄e kwon kar juon ritariņae eo ekar ikinejnej ilo tariņae. Kam̧m̧oolol er kōn jerbal eo raar kōm̧m̧ane, rōjan̄ er n̄an mije wōt ta eo raar kōm̧m̧ane, ejjab kōn ta eo raar jab kōm̧m̧ane.

  2. Kūr e āinwōt juon “mijenede eo ej ro̧o̧l ltok” im jab juon eo “ekar m̧ōkaj an ro̧o̧ļtok” ak “mijenede eo em̧ōkaj kar kōtļo̧ke.” Naan ko rem̧m̧an remaron̄ jipan̄ kōn ijo eaikuj in kōmouri im kamomo.

  3. Ron̄jake er ilo wāween eo em̧m̧antata komaron̄ jipan̄.

  4. Jipan̄ ro jineer im jemāer. Men in emaron̄ juon iaan apan̄ ko rejelet eddōkļo̧k in kōmour mijenede eo. Mejmejkaruo n̄an jab kowaan aikuj in en̄jake ko an eo jinen ak jemen an juon mijenede eo eaar ro̧o̧l.

  5. Pukot kapilōk an juon eo etijem̧ļo̧k eļan̄n̄e emenin aikuj. Ro retijem̧ļo̧k kōn nan̄inmej in kōmālij remaron̄ jipan̄ mijenede ro raar ro̧o̧ļtok okoktak n̄an mour ilo m̧weo im bōk mour eo an aolep raan. N̄e ewōr, LDS Family Services kōm̧m̧an lōn̄ļo̧k n̄an jiljino m̧wen̄an in ko̧o̧njeļ ko ejjeļo̧k wōņaer n̄e kajjitōk n̄an mijenede ro ekar m̧ōjkaj aer ro̧o̧ltok.

  6. Pukot tōl eo ilo jetōb. Jab pere kajoor eo an jar. Jar kōn tōl kōn ewi wāween eo ijo em̧m̧an tata komaron̄ rejtake kakūrm̧ool aikuj ko aer.

N̄an Mijenede ro raar Ro̧o̧ltok: 5 Mool ko n̄an Keememej ilo Am̧ Kamomo.

  1. Anij ej iakwe eok. Jej aolep iien en̄jake kapo ilo elōn̄ iien ko ilo mour in ad. Tōmak ilo Jisōs Kraist ejjab juon wā ņae kapo—ej juon pedped in katak me emaron̄ jipan̄ eok dipļo̧ke. Kōnke kōn en̄taan in pinmuur eo An, Kraist epād ippān kajoor eo ejjab n̄an wōt karreeoik kōj jān jerawiwi ak barāinwōt n̄an letok aenōm̧m̧an, meļeļe, kōmour, im jipan̄. (Lale Elder Jeffrey R. Holland kōnono eo an ilo kweilo̧k eo eļap, “Like a Broken Vessel.”)

  2. Jeje ko rekwojarjar rej kwaļo̧k kōn kōmour. Anij ej kōnono kōn Jetōb Kwojarjar, im juon iaan men ko jemaron̄ ron̄ jen Jetōb Kwojarjar eo ej kōn m̧ool in ekkatak im mour kake jeje ko rekwojarjar. Riit kōn ritariņae ro an Hilamōn, im ro jet raar ikinejnej ilo mour ko aer, n̄an pukot meļeļe. Pukōt waanjon̄ak ko jet kōn wāween an Jemedwōj Ilan̄ kar jerbal in karejar n̄an im jipan̄ kōmour ro raar pukot E m̧oktaļo̧k.

  3. Jerbal in ejipan̄ kōmour eok. Anij ekōņaan bwe kwon “kanooj m̧ōņōņō in poub” kōn tokjān (lale Katak im Bujen ko 58:27) kōnke en̄in ej ta eo enaaj jipan̄ kōmour eok. Kalimjōk ro jet im jar kōn iien ko rem̧m̧an n̄an jipan̄ ro jet.

  4. Jar emaron̄ kōļapļo̧k am̧ meļeļe. Kwaļo̧k kam̧m̧oolol n̄an Jemedwōj Ilan̄. Ej kōņaan jipan̄ kōmour eok. Kajjitōk Ippān n̄an kōkajoorļo̧k eok im jipan̄ eok kile men ko Eaar kōm̧m̧ani kadede n̄an kōjeraam̧m̧an im kōmour eok im bar kōn kajoor eo n̄an pukōt wāween ko jet n̄an kōjeraam̧m̧an ro jet.

  5. Ro jet remaron̄ jab meļeļe. Ejjab aolep renaaj meļeļe jekjek eo am̧, im remaron̄ ba men ko kōnke rejjab meļeļe. Ak jab kōtļo̧k bwe men in en kabbweer eok. Kalimjōk wōt kwaļo̧k kam̧m̧oolol n̄an ro rej kōkajoor eok, im jar kōn jipan̄ n̄an jeo̧rļo̧k an ro jet bōd eļan̄n̄e rejjab meļeļe jekjek eo am̧.