Mijenede Ro Eaar M̧ōkaj Aer Ro̧o̧l: Kom̧ij Jab Make Iaami
Rijeje eo, eo ej jān France, ej jikuuļ ilo Utah, USA.
Rūm̧m̧an Ded ro rej kwaļo̧k ekōjkan aer kar lo meļeļe eo im aenōm̧m̧an eo ālkin an m̧ōkaj aer kar ro̧o̧l n̄an m̧weo jān mijen ko aer im ekōjkan am̧ maron̄ barāinwōt.
Pija jān Tiffany Myloan Tong
Juon kumi eļap in mijenede ro rej jerbal aolep raan rej kajjion̄ kakūrm̧ool jerbal eo aer n̄an “karuwaineneik ro jet n̄an itok n̄an Kraist”1 ej bōktok “eļap kōjatdikdik im eļap m̧ōņōņō” (Alma 56:17) n̄an elōn̄. Mijenede rein, āinwōt wōt ritariņa ro ilo Bok in Mormon, tariņae aolep raan kōn “kajoor ekabwilōn̄lōn̄; im kōn maron̄ eļap” (Alma 56:56).
Bōtaab jekdo̧o̧n ilubwilijin 2,060 ritariņae ro, eaar wōr wōt 200 ro “raar ļotļo̧k kōnke jako im bōtōktōk” (Alma 57:25). Eaar ke kōm̧m̧an bwe en dik aer peran? Dikļo̧k aer kajoor? Dikļo̧k aer peran? Dikļo̧k aer erreo jān ro jet? Jaab n̄an jidik
Ejjeļo̧k oktak, ko̧m mijenede ro me ekar m̧ōkaj ami ro̧o̧l n̄an m̧weo kōn un ko kōn utam̧we an kōļmenļo̧kjeņ ak ānbwin ejjab dik aer peran, dik aer kajoor, dik aer peran, ak dik aer erreo. Ami kije ilo mālijjon̄ ko ami ej—im aikuj in—kabwilōn̄lōn̄. Em̧ōj kar kōjparok kom̧—bōlen kar ikinejnej, bōtaab kar kōjparok. Kinej ko ami, men̄e ilo ānbwin ak kōļmenļo̧kjeņ, ak jetōb, kiiō aikuj in lolorjaki (lale Alma 57:28 N̄an ro me raar ro̧o̧l n̄an m̧weo kōn un ko ikkijine erreo, ukweļo̧k enaaj juon m̧ōttan aorōk an kemour eo am̧.
Ilo ami karōk ami kōn ami pād m̧weo, kanooj lale bwe kom̧ij kōtļo̧k jidik iien n̄an kemour im keememej n̄an aolep iien lōke ilo Anij (lale Alma 57:27). Eaar kakememej kōj: “N̄e Ij lewōj juon kien n̄an jabdewōt ian m̧aan ro [ak kōrā ro] nejin armej n̄an kōm̧m̧ane juon jerbal n̄an Eta”—n̄an waanjon̄ak, jerbale juon mijen—“im m̧aan ro [kōrā ro] nejin armej raņ rej etal kōn aolepān aer maron̄ im kōn aolepān ewōr ippāer n̄an kom̧m̧ane jerbal en, im jab bōjrak ilo aer laļn̄ijn̄ij, im rikōjdat ro aer”—ilo jet jekjek, nan̄inmej ilo ābwin ak kōļmenļo̧kjeņ ak jorrāān ko jet—“itok ioer im pinej er jān kōm̧m̧ane jerbal en, lo, ekkar n̄an Eō n̄an jab aikuji jerbal eo ļo̧k wōt jān [peier] … , ak n̄an bōk joortak ko aer” (Katak im Bujen ko 124:49).
Jekdo̧o̧n ta kijen ko kwar ineeki—ak kar bar āliji—ilo jikin mijen, eļan̄n̄e kom̧ij jerbal ilo erreo ak kar lukkuun in ukweļo̧k, jipan̄ eo ami eaar menin aikuj im kar bōk jān Irooj.
Pija ko jān Getty Images
Riiti bwebwenato kein emaron̄ jipan̄ kom̧ lo kemour eo jān jeļā bwe kom̧ij jab makeļo̧k im bwe kwaļo̧k bwebwenato eo ami emaron̄ jipan̄ ro jet.
Kile Bwe Rilo̧mo̧o̧r eo Eaar En̄jake Metak eo Ami
Ioon baļuun eo n̄an mijen eo aō, iaar ļōmņak ta naaj kar iien ro̧o̧l eo n̄an m̧weo ālkin mijen eo aō. Baam̧le eo aō im ro m̧ōtta renaaj pinnik im atbo̧kwōj eō, im inaaj kar mour aenōm̧m̧an ilo aolepān mour eo aō, lem̧ōņōņō kōn aolep kōjeraam̧m̧an me raar itok āinwōt juon mijenede kar ro̧o̧l kōn uteij.
Jon̄ouljuon allōn̄ ko tokālik, ioon baļuun eo n̄an m̧weo, aolep iien kar joļo̧k ilo inepata kōn te eo enaaj waļo̧k tokālik. Baam̧le eo aō eaar kōttar, im men̄e raar pinnik im atbo̧kwōj eō, ejjab to, iaar makeļo̧k kōn ejjeļo̧k jeļā kōn jekļaj eo aō.
Rilo̧mo̧o̧r eo eaar lo iien ko aō reppen. Eaar jeļā ekōjkan aō kar en̄jake ilo aō kar babu ilo kijeeō ium̧win jilu wiik ko jar im kiki kōn jekjek iaar pād ie. Eaar jeļā inaaj kar aikuji An kajoor kōnke ejjeļo̧k bar juon ipeļaakū emaron̄ kar meļeļe ak jekdo̧o̧n kwaļo̧k en̄jake ippān kōn ta eo iaar ioone. Bōtaab Eaar. Iban kar wōnm̧aanļo̧k ilo mijen eo aō ak m̧ōkaj aō ro̧o̧l n̄an m̧weo n̄e ejjab E.
Ali Boaza, Queensland, Australia
M̧ōn̄ōņō n̄an Ļoor Ankilan Irooj
Aolep men raar em̧m̧an ilo mijen eo aō. Iaar bōk en̄jake ko rekabwilōn̄lōn̄ me renaaj iien otemjej ļap meļeļeier n̄an n̄a. Mekarta, ālkin ruwalitōk allōn̄ ko, eaar jino wōr aō nan̄inmej. Ālkin eļap jitļo̧k im jar, kar kōro̧o̧l eō n̄an m̧weo. Iaar ienpata. Iaar ļōmņak aolep men eaar aō bōd. Eaar bōjrak aō riiti jeje ko rekwojarjar aō im jar emakijkij. Iaar ļōmņak eļan̄n̄e iaar kōm̧m̧ani aolep men ko me imaron̄ kar n̄an pād wōt.
Bōtaab iaar kile bwe kar mālijjon̄ eō n̄an lale eļan̄n̄e imaron̄ in kar m̧ool wōt n̄an Irooj. Eaar pen, bōtaab iaar likūt aō lōke ilo E, im iaar bar ro̧o̧l n̄an jikin mijen, ijo iaar bar juon alen bōk en̄jake ko rekabwilōn̄lōn̄.
Innām, nan̄inmej ko aō raar bar jepļaaktok. Bōtaab ilo iien in eaar ļapļo̧k aō m̧ōņōņō n̄an ļoor ankilan Jemedwōj Ilan̄. Kōn menin iaar ro̧o̧l n̄an m̧weo alen kein karuo. Eaar pen, bōtaab ijeļā bwe imaron̄ ekkatak jān aolep men ko iaar dibuki.
Em̧ool jekdo̧o̧n iaar jab jerbal ium̧win 24 allōn̄ ko, ijeļā bwe iaar jerbal juon mijen ilo utiej. Ijeļā bwe iien eo iaar jerbal n̄an Irooj eaar ļap tokjān n̄an n̄a im n̄an armej ro iaar jipan̄ er. Ij kam̧m̧oolol aō Rilo̧mo̧o̧r kōn Pinmuur eo An ejjeļo̧k jem̧ļo̧kin. Ejeļā kajjojo apan̄ ko ad. Im eļan̄n̄e jej pedped ilo E kōn aolep m̧oot otemjej, jejjamin naaj makeļo̧k.
Fillipe Hoffman, Goiás, Brazil
Jab Jerwaane Iiien Ļōmņak Etke
Kar ļōmņak eo kōn m̧ōkaj in ro̧o̧l n̄an m̧weo eaar kaenepata. Ālkin wōt an rikakpilōklōk eo elmakote ro̧o̧l n̄an m̧weo, iaar en̄jake eļap kapokpok in en̄jake ko: Jook. Deoor. Bōd. Aenōm̧m̧an. Būrom̧ōj. Aolep ilo juon wōt iien.
Ijeļā bwe Anij eaar rie eō kōnke ilo jet wāween iaar dibuk wiik eo kein kajuon ilo m̧weo. Innām iaar dibuk bar juon wiik. Im bar juon. M̧ae iien eo iaar āliktata maron̄ en̄jake n̄a make āinwōt m̧okta. Jema eaar jipan̄ eo aō eļap tata im lukkuun kar kanooj lale bwe iaar bōk ta iaar aikuji. Eaar iien otemjej kōņaan kōnono im joļo̧k iien ippa. Eaar jab kappukōt n̄an jeļā etke eaar “m̧ōkaj aō ro̧o̧l n̄an m̧weo” ak n̄an lale ejiet aō kar mour.
Ke jema eaar mej ilo juon jorrāān jān tallōn̄ ilo toļ jet allōn̄ tok ālki, iaar jeļā kōn ejjeļo̧k pere bwe Anij eaar wōr an karōk n̄an n̄a. Maron̄ pād ippān jema ium̧win allōn̄ ko āliktata in mour eo an eaar kōkajoorļo̧k naan in kam̧ool eo aō kōn karōk in lo̧mo̧o̧r eo Ijjan̄in de meļeļe aolepān un ko etke iaar ro̧o̧l n̄an m̧weo ke iaar, bōtaab iaar barāinwōt ekkatak bwe eļan̄n̄e kwoj joļo̧k eļap iien ļōmņak etke, innām kwoj likjab jān kabwilōn̄lōn̄ ko raiboojoj Anij eaar kōpooji n̄an kwe aolep raan.
Kristen Watabe, Ohio, USA
Ukukōt Kōtmene ko Ami
Ke iaar jino lukkuun in nan̄inmej n̄an wōnm̧aanļo̧k wōt ilo mijen eo aō, iaar jeļā bwe Anij eaar kōņaan bwe in ro̧o̧l n̄an m̧weo, bōtaab eaar lukkuun oktak jān ta eo iaar kōņaan. Iaar barāinwōt inepata kōn m̧ōkaj in aō kar nan̄inemj, eo tok ālik kar kwaļo̧k kōn jinoin juon utam̧we ilo ānbwin (disable) ej wōnm̧aanļo̧k (Chronic).
Ilo aō jino jeļā kōn nan̄inmej eo aō, iaar en̄jake an jako jibadbad eo aō. Iaar aikuj eļap jipan̄ im kar en̄jake ejjeļo̧k men imaron̄ kōm̧m̧ane. Bōtaab iaar jeļā iaar aikuj in wōnm̧aanļo̧k wōt kōjerbal tōmak eo aō, kōn menin iaar ekkatak wōt, jar wōt, im kajjion̄ ļoor Jetōb eo. Ke iaar ekkatak Kallim̧ur Ekāāl juon raan, iaar lo juon pija jān James Tissot kar taitōļ in Jisōs ej Jiron̄ Rijilōk ro n̄an Kakkije. Pija in jān Mark 6:30–31 em̧ōkaj an ekar m̧ōkaj an kaikōn̄ eō. Ke iaar lo an Kraist mije rikarejeran ro An rej kakije, iaar en̄jake ewi jon̄an An kar iakwe er. Im n̄a.
Āliktata, iaar ekkatak bwe kōtmene ko iaar kōm̧m̧ani n̄an n̄a make raar jab āinwōt kōtmene ko ewōr an Anij n̄an n̄a. Ilo jet wāween ko, ko An raar ļapļo̧k aer kapan̄pan̄ an make, bōtaab eļapļo̧k An meļeļe kōn aikuj ko aō. Ekanooj ļap aō kam̧m̧oolol kōn wāween eo Ej katakin eō n̄an kōļapļo̧k aō bōk An jipan̄ im An iakwe eweppān. An tōmak ilo n̄an eletok n̄an eō kōjatdikdik eo ij aikuji n̄an wōnm̧aanļo̧k wōt.
Sabrina Maxwell, Utah, USA
Pād Wōt ioon Iaļ in Gospel eo
Eaar m̧ōkaj aō ro̧o̧l n̄an m̧weo jān Philippines Cebu East Mijen. Āliji ļōmņak kōn jekjek eo im ļōmņak ta eo imaron̄ kar kōm̧m̧ane eoktak im āinwōt ijjab en̄jake in ļoor jon̄an eo ekka kar kōtmene jān mijenede ro kōn m̧ōkaj in ro̧o̧l n̄an m̧weo. Jān ke iaar jerbal ilo laļ eo aō, iaar kakkōt kōn ļōmņak eo bwe iaar jab kabun̄ būruwōn branch eo aō im jeļā bwe iaar jab tōpar kōtmene ko aer. Keidi n̄a make n̄an mijenede ro rej jerbale aolepān aitokan mijen ko aer kar kōm̧m̧an bwe in lo eō make āinwōt edik tokjān ak āinwōt juon rinana.
Āliktata, Irooj eaar katakin eō bwe juon mijen ej baj juon iaan elōn̄ wāween ko n̄an jerbal n̄an E. Ejjab ijo ak ewi aitokan bōtaab ekōjkan am̧ jerbal me ej aorōk. Eaar katakin eō bwe in ettā im n̄an pād wōt ioon iaļ in gospel eo jekdo̧o̧n eļan̄n̄e men ko rej erom eppen im jab itok āinwōt aō kar kōņaan.
Jasper Gapuz, Philippines
Reilo̧k n̄an Jemedwōj Ilan̄ im Jisōs Kraist
Kar kūr eō n̄an jerbal ilo New Zealand Wellington Mijen. Ke iaar jeļā eaar aikuj m̧ōkaj aō ro̧o̧l n̄an m̧weo, iaar en̄jake āinwōt iaar jab kabun̄ būruwōn Jema Ilan̄ im ro jinō im jema.
Eaar kanooj ļap aō ekkatak jān mijen eo aō im jān jekjek in. Iaar jab aikuj in pedped ioon Jemawōj Ilan̄ im Pinmuur eo an Rilo̧mo̧o̧r eo āinwōt iaar ke eaar m̧ōkaj aō ro̧o̧l n̄an m̧weo. Iaar aikuj in ļōke Anij im bōk ta jabdewōt Eaar kōņaan bwe in dibuki im ekkatak. Ijjab maron̄ kaarmejete kajoor in Pinmuur eo im ekōjkan aō kar itok n̄an jeļā bwe Jisōs Kraist ej aō Rilo̧mo̧o̧r. Iaar ekkatak bwe Anij ej kōttāik eō im katakin eō kōn m̧ōjņo̧ ko aō im iien ko reppen.
Jekdo̧o̧n ta ia eo ij pād ie, ak eļan̄n̄e ewōr juon aō neim̧ tāāk (name tag) ioon ubō, ij juon rikaļoor wōt an Jisōs Kraist. Ijeļā bwe Irooj ej iakwe wōt eō im ej pād ippa, im Ej kōņaan wōt bwe in jerbal wōt n̄an ro jet. Im jekdo̧o̧n ij pād m̧weo, ijeļā ijjab likjab kōnke Ej jipan̄ eō erom juon armej em̧m̧anļo̧k jān en̄jake in.
Natasha Krisanalome, Thailand
Kōkajoorļo̧k Jemjerā eo Ami ippān Rilo̧mo̧o̧r eo
Eaar wōr aō iien em̧m̧an n̄an jerbale mijen eo aō ilo Anchorage, Alaska, USA. Eaar rup būruwō n̄an m̧ōkaj aō ro̧o̧l n̄an m̧weo kōn jorrāān ko jān an in̄rōk jim̧or ān̄kōļ ko im ne. Em̧ool eaar jab pidodo, bōtaab eaar lōn̄ en̄jake ko aō me kar katakin eō aorōk eo an katak ko an mour. Iaar ekkatak bwe Jemedwōj Ilan̄ ewōr juon an karōk n̄an aolep me ko rej waļo̧k ilo mour ko ad. Iaar barāinwōt ekkatak ekōjkan dibuk mālijjon̄ ko kōn juon kōļmenļo̧kjeņ em̧m̧anļo̧k. Kadkad eo aō ippān Rilo̧mo̧o̧r eo eaar erom kajoorļo̧k jān kar m̧okta kōke iaar ekkatak ekōjkan kōjerbal kajoor in kemour eo an Pinmuur eo An.
Jemedwōj Ilan̄ em̧ool eaar jipan̄ eō dibuk iien in epen. Em̧ool jekdo̧o̧n ta ij kakkōt wōt jet iien, ijeļā bwe Jemedwōj Ilan̄ ej eddo in im bwe E ejeļā ta eo ij aikuji ilo mour eo aō eļapļo̧k jān n̄a.
Amber Bangerter, Utah, USA
Jeļā Bwe Jerbal in Mijenede Ej Wōnm̧aanļo̧k Wōt Jekdo̧o̧n Ia Kom̧ij Pād Ie
Iaar jerbal ilo Hungary Budapest Mijen. Ke eaar m̧ōkaj aō ro̧o̧l n̄an m̧weo, eaar pen kōnke aolepān kōmpānien ro m̧ōtta aar pād wōt ilo mijen ko aer im iaar būrom̧ōj kōn aō jab juon mijenede. Iaar barāinwōt mijak bwe ro jet uwaan Kabun̄ in renaaj kar ekejete eō, bōtaab jeraam̧m̧an, aolep raar kōm̧m̧an n̄an eō kōn iakwe im meļeļe jekjek eo aō.
Ke iien eaar eļļāļo̧k, eaar em̧m̧anļo̧k aō mour. Iaar riiti juon bwebwenato ilo Liaona eo kōn mijenede ro eaar m̧ōkaj aer ro̧o̧l me raar jipan̄ eo en̄jake em̧m̧anļo̧k kōnke iaar jab en̄jake iaar makeļo̧k aō n̄an jidik (lael Destiny Yarbro, “Home Earlier Than Planned,” Liahona, Jān. 2018, 44–47). Im iaar barāinwōt m̧ool ilo bōk ta eo kōrā eo nej jinō eaar ba;“Jerbal in mijenede ej wōnm̧aanļo̧k wōt jekdo̧o̧ņ ia eo jej pād ie.”
Lucas Ludwig Saito, São Paulo, Brazil
Jepooļ Eok Make kōn Em̧m̧an.
Ijjan̄in kar ļōmņak enaaj kar m̧ōkaj aō ro̧o̧l n̄an m̧weo jā mijen eo aō, im iaar jook im ikūm̧kūm̧ kōn jelm̧ae aolep. Men̄e eaar juon iaan iien ko reppen tata ilo mour eo aō, iaar barāinwōt eddōkļo̧k jān en̄jake eo. Eaar āāik eō n̄an juon armej em̧m̧anļo̧k.
Iaar ro̧o̧l n̄an m̧weo n̄an dibuk jekjek eo an ukweļo̧k. Jet iaan kāālet ko iaar kōm̧m̧ani m̧okta jān mijen eo aō raar jab jokkun wōt juon ippān katak ko an gospel eo im kien ko. Kōnke kōn aō jook im kōņaan dāpij wōt jekjek eo aō ilo Kabun̄ in, iaar jab dibuk jekjek eo an ukweļo̧k ippān bisop eo aō m̧okta jān aō kar etal in mijen. Bōtaab ilowaan wōt allōn̄ ko jet im̧aan, iaar en̄jake aikuj eo n̄an ro̧o̧l n̄an m̧weo n̄an ukweļo̧k bwe in maron̄ jerbal kōn utiej im m̧ool.
Men ko e raar lukkuun kōketak eō ke iaar ro̧o̧l n̄an m̧weo raar bōk kuņaō ilo m̧akūtkūt ko ilo jetōb rekōbakak. Ta eo eaar jipan̄ eō eļap tata, mekarta, eaar armej ro ipeļakū—baam̧le, jet m̧ōtta, im em̧ool armej ro ijjan̄in kar ioon er m̧okta raar kwaļo̧k iakwe im jouj n̄an n̄a.
Ilōn̄ in men otemjej, kōn jipan̄ eo an Irooj im waanjon̄ak ko āinwōt ko an Kraist ipeļakū, iaar maron̄ bar ro̧o̧l n̄an Florida n̄an kam̧ōjļo̧k mijen eo aō. Kōjatdikdik eo aō ej bwe jenaaj aolep kajjion̄ n̄an eromļo̧k āinwōt Krasit n̄an ro jet, men̄e eaar m̧ōkaj ro̧o̧l n̄an m̧weo ak rej pād ilo aikuj.
Caigen Stuart, Utah, USA
Pedped ioon Rilo̧mo̧o̧r eo
Iaar bōk mijen kūr eo aō n̄an Zambia Lusaka Mijen. Juon iaan men ko reppen tata kōn m̧ōkaj in ro̧o̧l n̄an m̧weo eaar an membōr ro meļeļe mijenede ro em̧ōkaj aer ro̧o̧l.
Ke iaar ro̧o̧l, iaar aikuj in pād ilo aujpitōl ium̧win jilu wiik ko, im ejjeļo̧k membōr ro jān kabun̄ in kar ko̧o̧ļ ak lotok. Armej eo wōt eaar itok eaar juon ritōl in kumi im mijenede ro n̄an kōjeraam̧m̧an kwojkwoj eo n̄an n̄a aolep Jabōt—im bwe eaar kōnke iaar kajjitōk ippāer n̄an itok. Imaron̄ in kar lukkuun kōjerbal jipan̄ eo an membōr ro kalōk kajoor eo aō im tōmak eo ailo Jisōs Kraist ilo wiik ko jet im̧aan ilo m̧weo, bōtaab iaar aikuj in kōm̧m̧an makeļo̧k.
Irooj ej wōnm̧aanļo̧k wōt n̄an katakin eō aolep raan kōn etke em̧ōkaj aō pād m̧weo jān kōtmene, em̧ool jekdo̧o̧n ej pen wōt n̄an meļeļe jet men ko. Ij kiiō kile bwe m̧ōkaj in ro̧o̧l n̄an m̧weo eaar kōm̧m̧an bwe in lo jema im baam̧le eo an im kalōk juon jemjerā ikōtaer. Eaar kōm̧m̧an bwe in lo bwe ewōr juon aō nan̄inmej me ej wōnm̧aanļo̧k n̄an m̧ōttan mour eo aō. Im iaar ekkatak ta kajoor ko aō im wōjņo̧ ko rej—n̄an waanjon̄ak, , ekōjkan ba “jaab.” M̧okta, eaar kanooj pen n̄an n̄a n̄a ba jaab n̄an jabdewōt men ak jabdewōt armej. Iaar aolep iien m̧ōņōņō n̄an kōm̧m̧ani men ko im likūt rojet m̧okta, jekdo̧o̧n ta ewi jon̄an aō poub ak mōk—eo ejjab bōd, bōtaab kōnke kōn mālijjon̄ in, iaar ekkatak bwe jet iien ij aikuj likūt n̄a m̧okta.
Ij wōnm̧aanļo̧k wōt in lo men ko rekāāl kōn Irooj im etke iaar aikuj m̧ōkaj in ro̧o̧l n̄an m̧weo. Bōtaab elōn̄ iaan kōjeraam̧m̧an ko raar waļo̧k, im iaar pedped ioon Irooj raan otemjej. Em̧ool jekdo̧o̧n epen jet iien im armej rejjab aolep iien meļeļe, ijeļā bwe Rilo̧mo̧o̧r eo ejeļā. Im ij wōnm̧aanļo̧k wōt n̄an pedped Ioon im Pinmuur eo An ejjeļo̧k jem̧ļo̧kin.
Lindi Chibase, Gauteng, South Africa
Kallim̧ur eo loe ilo lete in mijenede kūr eo am̧, kar kōm̧m̧ane n̄an kwe ilo am̧ kar jokāālet n̄an erom m̧ōttan jerbal in, naaj kakūrm̧ool: “Irooj enaaj kōjeraam̧m̧an eok kōn mour jim̧we im jerbal tiljek.” Kōn wujlepļo̧k im kea, kinej ko am̧ remaron̄ po im erom juon wāween n̄an eok n̄an am̧ maron̄ jipan̄ ro jet itok n̄an Kraist. En̄in bwe, ālkin men otemjeļo̧k, jerbal eo an mijenede ro.