Pukot Lan̄lōn̄ ilo Kraist Kōjekdo̧o̧n Em̧ōkaj Aō Ro̧o̧l jān Mijen eo Aō
Ke ekar m̧ōkaj aō ro̧o̧ltok jen mijen eo aō, iaar ļōmņak iban kar bar lo lan̄lōn̄. Ak ikar. Im komaron̄ barāinwōt.
Rijeje eo ej jokwe ilo Utah, USA.
Etal n̄an juon mijen epen. Ijoke, ro̧o̧ltok jān juon mijen ebar pen, eļaptata n̄e kwoj m̧ōkaj in ro̧o̧ltok jān iien eo kar karōke. Kwoj inepata kōn ta eo ro jet renaaj ba ak elmen aer naaj m̧akūtkūt ipeļaakum̧. Renaaj ke kajjitōkin? Inepata? Lāj? Kwoj inepata bwe kwoj en̄jake kwojjab lukkuun em̧m̧an ak kajoor. Kwoj ļōmņak eļan̄n̄e jet men ebōd ippam̧ ak eļan̄n̄e kwaar kōm̧m̧ane kālet eo ebōd ilo em̧ool ilo̧k. Iaar inepata kōn aolep men kein.
Ke iaar kālet n̄an jerbale juon mijen, iaar bwilōn̄. Ikar jeļā en̄in ta eo Irooj ekōņaan bwe in kōm̧m̧ane. Allōn̄ ko tok jet raar jet iien ko relem̧ōņōņō tata ilo mour eo aō, im ālkin bōk juon en̄jake eļap ilo jikin kaminene an mijenede eo, iaar ļōmņak kōn aolepen mijen eo aō ilo Argentina enaaj bar em̧m̧an. Ekar jab.
Iaar obrak kōn inepata, mijak, im ejjeļo̧k kōjatdikdik ilo mijen eo aō—men ko me iaar jab en̄jaki m̧okta, ilo jon̄an eo iaar en̄jake m̧okta. Mijen būreejtōn eo aō eaar kajjieon̄ aolep men n̄an jipan̄ eō. Āliktata, iaar kālet n̄an ro̧o̧l. Kālet eo eaar pidodo kōm̧m̧ane ilo tōre eo, bōtaab pād ilo m̧weo, aolep kajjitōk kein ilōn̄ rekar jino itok n̄an n̄a.
Iaar ekkatak bwe ilo iien ko mekarta, Rilo̧mo̧o̧r eo ej bōktok jim̧or kōmour im kalimjōk eļan̄n̄e kwoj m̧ool pukote aolepāer. Ij lukkuun tōmak bwe ewōr juon katak n̄an ekkatak ilo aolep en̄jake ko an mour in, men̄e rem̧m̧an ak renana. Im ilo iien eo an Irooj, Eaar katakin eō jet katak ko raorōk me kiiō ij kaorōki.
Etal n̄an juon mijen eaar juon men em̧m̧an ippa. Ak kōn elōn̄ wun ko, iaar jab maron̄ in pād ium̧win 18 allōn̄ ko. Ebar wōr an Anij karōk n̄an eō. Ijjab lukkuun in jeļā ia eo n̄an kōmour mour eo aō, bōtaab Em̧m̧an ibba. Ta eo ijeļā ej bwe ij kōm̧m̧ane ta eo Ej kōņaan bwe in kōm̧m̧ane kiiō. Ilo allōn̄ ko emān in aō pād ilo Argentina, naan in kam̧ool im oktak eo aō raar penļo̧k. Iaar ioon armej ro rem̧m̧an, im iaar maron̄ in un̄ur mour ko Eaar kōņaan bwe in un̄uri. Ejako aō ajļo̧k kōn en̄jake eo aō ak kōņaan eo ekar oktak. Eaar ta eo ejejjet iaar aikuji im eaar erom̧ aorōk n̄an eō.
Ejjab to iaar riit juon kōnono jān Elder Neal A Maxwell (1926–2004) jen Doulul eo an Jon̄oulruo Rijilōk ro me eaar likūt en̄jake eo aō ilo em̧m̧an. Eaar ba:
“Mour an juon . . . ejjab maro jim̧or obrak kōn tōmak im deeor jān- inepata. . . .
“Kōn menin, ekōjkan am̧ im n̄a maron̄ lukkuun kōtmene n̄an baj ilo̧k ilo mour, āinwōt eļan̄n̄e n̄an ba, ‘Irooj, letok n̄an eō en̄jake, bōtaab ejjab liājļō, ejjab būrom̧ōj, ejjab metak, ejjab jum̧ae, ejjab liakeļo̧k, im em̧ool ejjab n̄an eļļo̧kļo̧k jene. Dāpij jen eō, Irooj, aolep en̄jake ko me rekar kōm̧m̧an bwe ta Kwe! Innām kōm̧m̧an bwe in iwōj im pād Ippām im lukkuun bōk lan̄lōn̄ eo Am̧!’” (“Lest Ye Be Wearied and Faint in Your Minds,” Ensign, May 1991, 88).
Rilo̧mo̧o̧r eo eaar jab erom wōn E kōjekdo̧o̧n ta mālijjon̄ ko Eaar jelm̧ai. Eaar erom wōn E kōnke kōn mālijjon̄ ko. Raar jipan̄ ļōme piktok eo An, im raar leļo̧k n̄an E maron̄ eo n̄an en̄jake lan̄lōn̄ eo Ej en̄jake kiiō. Ij en̄jake uteej eo n̄an wōr juon piktok in en̄jake in ļōme eo. Eaar jab ta eo iaar kajjitōk kake; ak em̧ool eaar jab ta eo iaar kōņaan; ak Anij ejeļā aorōk eo aō, im Ej kōņaan bwe in kwaļo̧k lan̄lōn̄ eo An. Lan̄lōn̄ jab in ej juon men ijjab maron̄ keidi ilo an jako barāinwōt jeļā liājlō, būrom̧ōj, metak, im jum̧ae. Mōkaj in ro̧o̧ltok eaar juon iaan men ko reppentata iaar diplo̧kki, ak kōn kalimjōk eo im jipan̄ eo an Rilo̧mo̧o̧r, kiiō ej āinwōt juon wōnāān eo edik n̄an kōļļāiki kōn ta eo iaar bōke n̄an kōro̧o̧le.
Kōn menin bōk tōmak. Lōke am̧ Rilo̧mo̧o̧r. Im kwon kōjatdikdik! Mour ejjamin naaj ilo̧k ilo jetjet in ekōjkan am̧ karōke. Eban ejjeļo̧k metak ak ejjeļo̧k-inepata. Ak lan̄lōn̄ eo ej kōttar eok ālkin iien ko reppen. Lan̄lōn̄ ej ta eo Ej kōņaan n̄an kwe.