Walo ka Sugyot alang sa Pagbalanse sa mga Buluhaton sa Kinabuhi

Presidente M. Russell Ballard

Akting nga Presidente sa Korum sa Napulog Duha ka mga Apostoles

Gikan sa Abril 1987 nga pakigpulong sa kinatibuk-ang komperensya.

Duna koy pipila ka mga sugyot nga akong gilauman nga mahimong bililhon niadtong nabalaka sa pagbalanse sa mga buluhaton sa kinabuhi.

Una, hunahunaa ang mahitungod sa inyong kinabuhi ug ipahimutang ang inyong mga prayoridad. Pangita og mahilom nga panahon nga maghunahuna pag-ayo kanunay mahitungod kon asa na kamo paingon ug unsay inyong gikinahanglan aron makaabut didto. Si Jesus, ang atong ehemplo, sa kasagaran “mipahilit ngadto sa mga awaaw ug nag-ampo” (Lucas 5:16). Kinahanglan kitang mohimo sa samang butang panagsa aron mabag-o ang atong kaugalingon sa espirituhanong paagi sama sa Manluluwas. Isulat ang mga buluhaton nga gusto ninyong mahimo matag adlaw. Labing importante ibutang sa hunahuna ang sagrado nga mga pakigsaad nga inyong gihimo uban sa Ginoo sa inyong pagsulat sa inyong inadlaw nga mga iskedyul.
Ikaduha, paghimo og minugbo nga mga tumong nga inyong makab-ot. Pagtakda og mga tumong nga maayong pagkabalanse—dili daghan ra kaayo o gamay ra kaayo, ug dili taas ra kaayo o ubos ra kaayo. Isulat ang inyong makab-ot ra nga mga tumong ug trabahoa kini sumala sa ilang pagkaimportante. Pag-ampo alang sa balaan nga giya sa inyong paghimo og tumong.
Ikatulo, pinaagi sa maalamon nga pagbadyet, kontrola ang inyong tinuod nga mga panginahanglan ug sukda kini pag-ayo batok sa inyong daghang gusto sa kinabuhi. Daghan kaayong mga indibidwal ug mga pamilya ang daghan kaayo og utang. Pagbantay sa daghang madanihon nga mga tanyag sa paghulam og kwarta. Mas sayon kaayo ang paghulam og kwarta kay sa pagbayad niini. Walay mga pagpanglaktud sa pinansyal nga kasiguroan. Dili gayud kita makabalanse sa atong kinabuhi gawas kon ang atong mga panalapi sigurado nga nakontrol.

Hinumdumi ang kanunayng pagbayad sa hingpit nga ikapulo.
Ikaupat, pakigsuod sa inyong asawa, mga anak, mga paryente, ug mga higala. Makatabang sila nga mabalanse ang inyong kinabuhi. Lig-una ang relasyon uban sa inyong pamilya ug mga higala pinaagi sa bukas ug matinuoron nga komunikasyon.

Ang usa ka maayong kaminyoon ug maayong mga relasyon sa pamilya mahimong mamintenar pinaagi sa malumo, mahigugmaon, mahunahunaon nga komunikasyon. Hinumdumi nga sa kasagaran ang pagtan-aw, pagkidhat, ug pagyango, o paghikap makasulti og daghan kay sa mga pulong. Ang pagpangomedya ug pagpaminaw og maayo importante usab nga bahin sa maayong komunikasyon.
Ikalima, pagtuon sa mga kasulatan. Nagtanyag kini sa labing maayong tinubdan sa pagpakigsulti uban sa Espiritu sa Ginoo. Usa sa mga paagi nga ako nakaangkon sa akong sigurado nga kahibalo nga si Jesus mao ang Kristo mao ang pinaagi sa akong pagtuon sa mga kasulatan. Si Presidente Russell M. Nelson mihangyo sa mga miyembro sa Simbahan sa pagtuon nga mainampoon sa Basahon ni Mormon kada adlaw.
Ikaunom, kinahanglan mag-iskedyul kita sa atong inadlaw nga mga kalendaryo og igong pahulay, ehersisyo, ug pagpahayahay kon kita gusto og mahimsog ug balanse nga kinabuhi. Ang himsog nga panglawas ug maayong pamustura makapadugang sa atong kaligdong ug pagtahud sa kaugalingon.
Ikapito, paghimo og sinemana nga family home evening. Kinahanglan nga dili mawala kining espesyal nga oportunidad sa “pagtudlo sa usag usa sa doktrina sa gingharian” (D&P 88:77), nga mogiya sa mga pamilya ngadto sa kinabuhing dayon.

Si Satanas naglihok kanunay sa pagguba sa atong mga pagpamatuod, apan siya walay gahum sa pagtintal o pagsamok kanato lapas sa atong kusog sa pagbatok kon kita magtuon sa ebanghelyo ug magsunod sa mga sugo niini.
Ang akong katapusan nga sugyot mao ang pag-ampo kanunay. Makahibalo kamo sa sakto nga mga desisyon nga himoon matag adlaw pinaagi sa kanunay, sinsero nga pag-ampo. Kon ako nagpuyo subay sa ebanghelyo, akong namatikdan nga mas sayon nakong mabalanse ang tanan sa akong kinabuhi.

Nakaamgo ko nga ang ubang mga sugyot mahimong idugang ngadto niini. Hinoon, nagtuo ako nga kon magtutok kita sa pipila ka mahinungdanong katuyoan, mas madumala nato ang daghang panginahanglan sa kinabuhi. Hinumdumi, kon sobra ang bisan unsa sa kinabuhi mawala kita sa balanse. Sa samang higayon, kon gamay ra sa importante nga mga butang makahimo usab sa samang butang. Si Haring Benjamin mitambag “ang tanan niini nga mga butang mahimo diha sa kaalam ug kahusay” (Mosiah 4:27).

Sa kasagaran ang kakulang sa atong klaro nga direksyon ug mga tumong makausik sa atong panahon ug enerhiya ug makasalmot sa pagkadili balanse sa atong kinabuhi. Ang atong importante nga tumong mao ang pagpangita sa “pagka-imortal ug kinabuhi nga dayon” (Moises 1:39). Uban niini isip atong tumong, nganong dili nato isalikway gikan sa atong kinabuhi ang mga butang nga makalibug kanato ug makahurot sa atong mga hunahuna, mga pagbati, ug enerhiya nga walay nahimo sa atong pagkab-ot niana nga tumong?

Buhata lang ang pinakamaayo kutob sa mahimo matag adlaw. Buhata ang sukaranang mga butang ug, dili lang ninyo kini mabantayan nga, puno na ang inyong kinabuhi sa espirituhanong panabut nga mopamatuod kaninyo nga gihigugma kamo sa Langitnong Amahan. Kon mahibalo ang usa ka tawo niini, ang kinabuhi mapuno sa katuyoan ug kahulugan, nga mas sayon mamentinar ang pagkabalanse.