Gigiyahan sa Espiritu, sa wala pa Gani Ako Nasayud Niini
Nagiyahan ako pinaagi sa Espiritu sa makadaghan kaayo nga mga panahon sa wala pa makahibalo kon unsa gayud ang pagpadayag.
Sa dihang ako 17, nagtambong ako og usa ka Protestante nga simbahan nga akong nakaplagan duha ka tuig ang milabay. Kini mao ang unang dapit diin pormal akong nakakat-on mahitungod sa Dios ug ni Jesukristo. Nianang panahona, ako mibiyahe sakay sa bus usa ka adlaw sa dihang usa ka lalaki milingkod tupad kanako. Siya misulti kanako nga siya bag-o lamang gibuhian gikan sa bilanggoan ug nagsulti mahitungod sa pagbati nga siya dili na gayud makasulod sa bisan unsa nga simbahan pag-usab. Nianang higayona, ako nasayud nga ang Dios mipadala kanako didto aron mahimamat kana nga tawo, ug giawhag ko siya, nagsulti kaniya nga siya kinahanglang mangita og simbahan.
Samtang kami nag-istorya, misulti ako kaniya nga ako nagtuon sa pag-eskwela og psychology. Apan kalit akong misulti nga tingali mo-eskwela ko og journalism. Siya miingon, “Mura ka gyud og tinuod nga journalist—kinahanglan nga imo kanang buhaton!” Nakita ko kana nga katingalahan tungod kay wala gyud ako maghunahuna mahitungod sa pagka-journalist kaniadto. Ang hunahuna daw miabut gikan sa bisan diin.
Duha ka bulan ang milabay, ang eksamen nga motugot kanako sa pag-adto sa unibersidad aron sa pagtuon og psychology nagsingabut. Usa ka gabii nakaamgo ako nga dili na ako sigurado mahitungod sa akong desisyon. Nakuratan ako tungod kay dili ako interesado sa pagpadayon og bisan unsa pa. Dayon akong nahinumduman ang panagsultihanay uban niadtong tawo sa bus. Wala ako masayud og bisan unsa mahitungod sa mga eskwelahan sa journalism, apan akong nakaplagan ang website alang sa usa sa akong estado. Naatol, nianang adlawa mao ang katapusan nga adlaw sa pagparehistro. Sa walay pagduhaduha, namasin ako. Ug sa pagmubo sa istorya: bag-o lamang akong nahuman sa pag-eskwela og journalism.
Pagdiskubre sa Kamatuoran
Ako wala makaamgo niini niana nga panahon, apan ako nasayud karon nga ang Dios migiya kanako pinaagi sa personal nga pagpadayag sa paghukom kon unsa ang tun-an. Gibati nako nga ako kanunay nga gipanalanginan uban sa kahibalo alang sa unsay gusto sa Dios alang kanako—unsa nga mga matang sa oportunidad ug mga sitwasyon nga Siya mipahimutang sa akong kinabuhi aron sa pagpakita kanako sa dalan nga gusto Niya nga akong sundon.
Upat ka tuig ang milabay, akong nakaplagan ang Simbahan ug nabunyagan, usab pinaagi sa paggiya sa Espiritu Santo. Ug sa katapusan akong nahibaloan unsa ang personal nga pagpadayag gikan sa pagbasa sa Doktrina ug mga Pakigsaad. Usa ka adlaw sa wala pa ang akong bunyag, nagbasa ako sa Basahon ni Mormon tungod kay ang mga misyonaryo mihangyo kanako sa pagbasa. Sa kalit lamang mihukom ako sa pagbasa og una tungod sa pipila ka mga rason, sa 2 Nephi 31, diin gihulagway ni Nephi ang bunyag ni Jesukristo. Bisan tuod og ako wala pa mag-ampo mahitungod sa Basahon ni Mormon, gibati nako nga ang Langitnong Amahan gusto nga mosulti kanako mahitungod sa bunyag. Ang sunod nga kapitulo usab nakakuha sa akong atensyon, diin akong nabasa nga ang Espiritu Santo makapakita kanato sa tanan nga mga butang nga kinahanglan natong buhaton (tan-awa sa 2 Nephi 32). Kadto nga mga pulong naghimo og dakong kahulugan sa akong kinabuhi.
Sa pagkatinuod, ang usa ka butang nga kanunay nakong naamguhan mao nga kon makita nako ang akong kaugalingon diha sa kangitngit, ang Dios nagpaabut kanako sa pagdala og pipila ka matang sa kahayag gikan niini. Sa dihang ako nakakat-on mahitungod ni Joseph Smith, nakakita ko og mga pagkasusama tali kanamo. Nakakat-on ko sa pagpangita sa Dios alang sa mga tubag. Sa panahon sa akong pagkabata, bisan dili mosimba, ako nag-ampo sa kanunay, nga midasig kanako sa paghinulsol, pagkamapailubon, ug pagpaningkamot nga magmabination ug magmahigugmaon ngadto sa tanan.
Hinoon ako sa kanunay nasayud nga ang Dios naminaw kanako. Sa dihang sa katapusan miadto ako og usa ka simbahan sa edad nga 15 ug nakakat-on mahitungod sa Biblia, akong gihinumduman ang daghang mga kasinatian ug nasayud nga ang kahibalo nga akong nadawat gikan sa pag-ampo gikan sa Dios.
Pagsabut sa Pinadayag
Sa 2 Nephi 32:5, nagtudlo si Nephi, “Kon kamo mosulod pinaagi sa agianan, ug modawat sa Espiritu Santo, kini mopakita nganha kaninyo sa tanan nga mga butang nga kinahanglan inyong buhaton.” Kadto usa ka butang nga nagtuo ko nga akong nasabtan hangtud, human sa akong bunyag, ang mga misyonaryo nangutana kanako kon ako nakahibalo ba og unsay pagpadayag. Wala ako kahibalo niini pinaagi sa ngalan, apan ako miingon nga ako naghunahuna nga kini usa ka pagbati nga akong gibati sa makadaghang higayon, sama sa Dios nga nakigsulti kanako diha sa akong hunahuna, nagtubag sa akong mga pangutana ug mga hunahuna. Miingon sila nga ako husto.
Uban sa kahibalo mahitungod sa pagpadayag ug sa gasa sa Espiritu Santo, ako adunay usa ka bag-ong nakaplagan nga tinguha sa pagbasa sa Biblia. Nagsugod ako sa pagkakita og daghang mga makahuluganon nga mga butang—akong naamguhan nga kini tungod kay ako gigiyahan sa Espiritu. Ako gustong mobasa sa sulat ni Pablo ug nakakita sa iyang ehemplo sa pagkatinudloan sa Espiritu diha sa iyang mga lihok ug sa iyang lig-on nga pagsalig sa Manluluwas. Kadto ang mga butang nga ako nakaamgo pinaagi sa pagsinati sa gipahiuli nga Simbahan.
Busa sa katapusan, dili igsapayan ang inyong edad, diin kamo nagpuyo, o gani unsa ka daghan ang inyong kahibalo mahitungod sa mga butang sa Dios. Ang tanan nimong buhaton mao ang pagsunod sa himno: “I’ll go where you want me to go, dear Lord, … ; I’ll be what you want me to be” (Hymns, no. 270). Pagpuyo ug pakigbahin og nindot nga mga butang nga ang Espiritu nagpahimutang diha sa imong kasingkasing, tungod kay ang Espiritu mopakita kanimo sa dalan aron sa pagpanalangin sa uban ug sa pagdawat og mga panalangin sa imong kaugalingon mismo niini nga kinabuhi.