Pagbalik sa Dalan human sa Akong Wala Maplano nga Pagmabdos
Nag-inusara ako ug mabdos. Apan ako nakaamgo nga gusto ko og usa ka lahi nga kinabuhi. Gusto ko nga magpuyo alang kang Kristo, ug gusto ko nga mahimong takus sa mga panalangin sa templo.
Mihukom ako nga magpabiling duol sa panimalay inig ka kolehiyo. Naghinam-hinam ako nga magdula og sport nga akong ganahan sa sunod nga ang-ang samtang nakahibalo nga ang akong pamilya anaa sa estadyum nagtan-aw ug nagsuporta kanako. Ako gikan sa usa ka maayong pamilya, ug ang akong mga ginikanan mitudlo kanamo sa mga hiyas ug mga sumbanan sa ebanghelyo ni Jesukristo.
Apan isip 20 anyos nga estudyanteng magdudula sa football ug nagpuyo “sa kinabuhi nga kolehiyo,” akong gibiyaan ang mga baruganan nga gitudlo kanako. Moadto ako sa klase ug modula og football Lunes hangtud Biyernes ug dayon motambong og mga party sa katapusan sa semana, nagtuo nga ako nakakaplag sa tinuod nga kalipay. Unsa ako ka sayop! Apan mao kana ang binuhatan ni Satanas—himoon niya ang sayop nga mga butang nga makaagni pag-ayo nga sa dili madugay kini matan-aw nga husto.
Ang akong kinabuhi dili na makontrolar sa akong ikatulo nga tuig sa kolehiyo. Ako naghimo og dili maayong mga pagpili ug nahibaloan nga ako mabdos. Ang akong tibuok nga panan-aw mahitungod sa kinabuhi nausab. Kini dili na mahitungod kanako, apan mahitungod sa bata nga akong gimabdos. Ang mga pulong sa Alma 36:17–21 namulong direkta ngadto sa akong kalag tungod kay akong gibati ang hilabihan nga diosnong kasubo ug kapait sa akong mga pagpili, susama sa unsay gibati ni Alma.
Ang proseso sa paghinulsol malisud ug alantuson. Naglisud ako sa pag-angkon nga nasayop ako ug nakahimo og kasaypanan. Nag-atubang niadtong akong gihigugma ug nagsulti kanila nga ako mabdos mao ang usa sa labing makahahadlok nga mga higayon sa akong kinabuhi. Ako usab nakigkita sa akong bishop ug kinahanglan nga moatubang sa konseho sa pagdisiplina, nga mihukom sa pagdili kanako sa pag-ambit sa sakramento og dugay-dugay. Gusto ko lamang nga molayas ug magpakaaron-ingnon nga dili kini tinuod nga kinabuhi. Apan kini tinuod. Mao kini ang akong bag-ong kamatuoran. Ako adunay usa ka malisud nga dalan sa unahan nga kinahanglan akong agian.
Ang akong pamilya napakyas sa akong mga pagpili, apan sila usab nahigugma kanako ug gusto sa labing maayo alang kanako, sama sa atong Langitnong Amahan. Makadaghan gipangutana ko ang akong kaugalingon kon unsaon Niya ako sa pagpasaylo human sa wala pagsunod sa sumbanan sa ebanghelyo sa makadaghang higayon. Ang tubag nga akong nadawat sa matag higayon mao, tungod kay Siya nahigugma kanako ug gusto kanako nga mobalik ngadto Kaniya. Nasayud ako nga akong gipakyas ang akong yutan-ong mga ginikanan, apan sa paghunahuna kon giunsa nako pagpakyas ang akong Amahan sa Langit hilabihan ka lisud.
Sa gihapon, gibati ko ang pag-inusara ug pagkahisalaag sa unang duha ka mga bulan sa akong pagmabdos, dili sigurado kon unsa ang akong sunod nga buhaton. Samtang ako misugod sa pag-ampo nga mas kinasingkasing ngadto sa Langitnong Amahan alang sa giya ug tabang, akong nakat-unan nga ako wala gayud sa tinuod mag-inusara. Siya anaa kanunay naghulat lamang kanako nga motawag Kaniya. Ako dihay maisugon nga kausaban sa kasingkasing. Gusto ko nga magpuyo og lahi nga kinabuhi. Gusto ko nga magpuyo alang ni Kristo. Gusto ko nga mahimong takus nga moambit pag usab sa sakramento. Gusto ko nga mahimong takus sa pagminyo sa templo sa pipila ka adlaw, usa ka butang nga ako nagtuo nga dili na mahimo tungod sa akong mga sayop.
Diha niana ako nakakat-on sa tinuod nga gahum ni Jesukristo isip akong Manluluwas. Ako nakakita sa daghang malumong kalooy gikan sa Ginoo atol niadtong mubo nga siyam ka bulan. Mas nakabaton ako og hugot nga pagtuo nga sukad wa nako natagmtaman sa tibook nako kinabuhi. Mao kanang hugot nga pagtuo diha ni Jesukristo nga mitugot kanako sa pagpili sa pagpasagop sa akong nindot nga batang babaye. Ang kasakit sa pagbutang sa akong anak nga babaye nga ipasagop hilabihan ka grabe. Apan ang hingpit nga kalipay nga akong gibati sa pagtabang og laing anak nga babaye sa Dios nga makaangkon sa iyang mahangturong pamilya gani mas labaw pa. Nahimo akong mas maayo gikan niana nga kasinatian, ingon nga kitang tanan makahimo kon kita sa tinuoray nagbasol ug naghinulsol—nagtugot sa Ginoo sa paghimo kanato nga mamaayo pag-usab.
Kada adlaw sukad niadto ako napanalanginan.
Abi ninyo, ako usab gisagop isip usa ka bata, ug unom ka bulan human sa pagbutang sa akong anak nga babaye alang sa pagsagop, akong nakaplagan ug nakahiusa ang akong tinuod nga inahan. Kini sama sa usa ka milagro. Wala madugay human niana, nahimamat nako ang akong umaabut nga bana nga sa wala madugay ako giminyoan sa templo. Ako karon inahan sa upat ka laing matahum nga mga anak.
Ang pagmabdos nga wala planoha ug pagbutang sa akong unang natawo aron ipasagop nakapausab sa akong kinabuhi sa hangtud. Ako nakakat-on og daghan mahitungod sa akong kaugalingon ug mahitungod sa gugma sa Dios ug ni Jesukristo alang kanako ug alang sa matag usa kanato. Pinaagi sa kaguol, kasakit, mga luha, wala masulti nga mga pag-ampo, ug tubag sa mga pag-ampo, ako nakakaplag og paglaum, gugma, pagpasaylo, kalooy, ug grasya. Akong nakat-unan nga ang pagpasagop mahitungod sa gugma. Akong nakat-unan ang paghatag og bili sa pag-ambit sa sakramento. Akong nakat-unan nga wala ako hingpit nga nawala—kinahanglan lamang ako nga mobalik sa dalan gikan diin ako nahisalaag. Samtang ako sinserong naghinulsol sa akong mga sala ug nakakat-on sa pagsalig ug sa pagbaton og hugot nga pagtuo diha kang Kristo, Siya midala kanako balik ngadto sa Iyang panon ug mipanalangin sa akong kinabuhi nga dili masukod. Ang Pag-ula ni Jesukristo tinuod, ug ang Iyang grasya igo alang kanatong tanan (tan-awa sa Ether 12:27).