Stap Jusum Taem we I No Save Finis
Mi bin save se naoia i taem blong mi blong jusum sapos, yes o no, bae mi folem gud ol standet o valiu blong laef blong mi.
Taem mi bin harem se mi bin winim wan skolasip blong mekem kalja trip long Ajentina, mo hemia mi stap drim long hem oltaem, mi neva ting se hemia bae i stat blong wan bigfala jenis insaed long laef blong mi.
Mi kasem Rosario, Ajentina, mo long ples ia mi stap wetem wan famli we i bin memba blong Jos Ia blong Jisas Kraes Ia blong Ol Lata-dei Sent. Mo olsem ia nao mi statem wan yia blong wokbaot long saed blong spirit, mo mi toktok wetem ol misinari, mo stap go long seminari mo institiut. Mi bin wantem blong save evri samting, mo mi save filim we, wanem we mi bin stap lanem abaot gospel, i bin wan blesing long mi long plante wei.
Long wan sot taem, mi bin save kasem wan strong testemoni se ol doktrin ia we oli bin stap tijim mi, oli tru: fet, lav, fasin blong save wet longtaem, jareti, tras, mo fasin blong stap obei long ol komanmen blong Lod, we Hem i bin givim long yumi blong protektem yumi long harem nogud.
Hem i no wantem se yumi harem nogud from wan samting we i no gat mining. Hem i lavem yumi tumas, mo Hem i wantem pruvum hemia tumas long yumi. Be samtaem, tru long joes blong yumi nomo, yumi sarem doa ia, yumi seperetem yumi long Hem, mo afta, i stap long han blong yumi. Yumi mas mekem fas step ia blong kam gud bakegen mo kasem pis insaed long hat blong yumi. Hemia i wan samting we bae mi gotru long hem, we i blong miwan.
Afta plante manis blong lanem samting, ol misinari lesen, mo ol klas, mi fesem wanem i kam agens long wan wei we i bin soa tumas—ol samting we oli kam agens oli putum yu long fored blong ol filing we oli blong bifo, i temtem yu blong mekem ol desisen we oli no stret long taem naoia, mo i traem blong spolem gud fiuja blong yu, we yu bin stap drim long hem. Mi bin lanem se ol hadtaem, samtaem (mo plante taem ) oli kam long wan ples we yu no ting long hem nomo.
Blong stap klin inaf mo gat klin fasin long saed blong tingting mo aksen, oltaem i pat blong huia mi, kam kasem naoia. Mi bin save se, ol samting we bae mi stap rere blong mekem, oli no oraet, se ol pipol we mi bin trastem long wan taem, oli stap kamaot long rod, mo mi stat blong putum spes bitwin mi mo Papa blong mi long Heven. Mi bin save se naoia i taem blong mi blong jusum sapos, yes o no, bae mi gohed blong folem rod ia, o bae mi folem gud ol standet o valiu we mi bin stap folem. Mekem se mi mas faenem paoa insaed long mi, we i bin talem long mi se mi no save spolem ol drim ia, long wan isi wei nomo olsem. Mi no save spolem hop blong mi blong gat wan famli we i no save finis, mo wan hasban we i lavem mi. Wan samting insaed long laef blong mi i bin rong, mo mi bin save se i mas jenis.
Filing ia, tugeta wetem yang testemoni ia we i stat blong tekem flaoa insaed long hat blong mi, mo ol tru enjel insaed long laef blong mi we oli bin stap ia oltaem blong helpem mi, i bin sevem mi blong mi no lus mo oli mekem mi mi kam strong moa bakegen blong save jusum blong tanem mi i gobak i go long Lod long stret taem. Mo mi save se Hem i stap ia oltaem, i stap blesem mi from ol hadwok blong mi blong lisin long voes blong Hem mo blong stap klin inaf from ol blesing we oli no save finis.
Taem mi stap tingting abaot taem ia we mi gotru long hem, mi tingting long strong paoa long tingting we i bin mekem se mi no sarenda; mi tingting long strong paoa long tingting ia we i mekem mi soemaot oltaem ol valiu o standet blong mi, mo fet ia we mi bin gat mo mi gat yet i stap.
I nomata se taem blong sakem sin we i bin kam afta, i bin wan taem we mi harem i soa tumas, we i blong luksave ol rong filing, mo ol sot spesel taem, mo i blong gat tingting i stap daon, be mi mi glad tumas from hemia—mo oltaem bae mi glad from. Mi talem tangkyu from se, long stret taem, mi bin save filim se Papa long Heven i bin fogivim mi, se Hem i gohed blong lavem mi, mo bae oltaem Hem i lavem mi.
Pat ia we mi pem praes from, i blong mi lan blong fogivim miwan. Mi tingbaot se mi filim se mi no klin inaf nating, mo mi no naes nating, tugeta, insaed mo aotsaed. Be Sevya blong mi i bin stap ia oltaem, i givim paoa long mi mo i givim insperesen. Hem i bin putum ol stret pipol long rod blong mi, mo oli bin helpem mi blong lanem plante moa samting abaot Jos, from se mi mas gobak long Beljiom. Oli bin lavem mi from huia mi, mo oli bin helpem mi blong lavem miwan bakegen mo luksave se, eksperiens ia, i no wan soa we mi mas karem long baksaed blong mi blong ful laef. Mi bin save luk janis we mi bin gat blong mekem joes, blong luk eksperiens ia se testemoni blong mi i strong o no, taem mi bin stap difendem ol standet blong mi. Naoia, mi luk se, from se mi bin wok blong mekem testemoni blong mi i kam strong moa tru long eksperiens ia, mi save stap olsem wan blesing insaed long laef blong plante moa pipol, olgeta we oli stap kolosap mo olgeta we oli stap longwe.
No fraet. Neva givap, mo oltaem difendem ol standet blong yu. Oltaem, kipim insaed long maen blong yu se yu yu naes, mo i wan blesing blong serem lav ia yumi gat long Sevya mo gat stret lav blong Hem olsem fandesen ia we bae yumi bildimap wan rilesensip mo wan fiuja famli antap long hem. Sapos yu jusum blong stap obei, mo yu jusum Papa long Heven long evri samting, bae i no longtaem, ol blesing we oli no save finis bae oli kam. Yu no wari sapos yu no save luk olgeta blesing ia naoia, be yu trastem se, evri dei, smol smol, bae yu luk han blong Lod insaed long laef blong yu. Springtaem i stat insaed long hat blong yumi, mo ol flaoa we oli no save finis bae oli stat blong open.
Mi bin baptaes long 16 Maj 2019 insaed long wod blong mi long Beljiom, mo mi mi hapi tumas se mi bin tekem fas step ia long rod blong mi i go long taem we i no save finis. Yes, bae mi fesem moa jalenj long rod ia i go—yumi evriwan bae i fesem—be wetem testemoni blong mi we i stap long hat blong mi, mi mi rere blong fesem olgeta jalenj ia, from se mi save Huia blong jusum.