Spirit I Lidim Mi, bifo Mi Iven Save
Spirit i bin lidim mi plante taem bifo mi lanem wanem nao hem i revelesen.
Taem mi bin gat 17 yia, mi bin sta go long wan Protestan jos we mi bin faenem tu yia bifo. Hem i bin fas ples we mi bin lanem abaot God mo Jisas Kraes. Raon long tetaem ia , mi bin stap ron long wan bas, wan dei, mo wan man i kam sidaon narasaed long mi. Hem i talem long mi se oli jes rilisim hem long kalabus mo i tokbaot we hem i filim se bae hem i neva save go insaed long wan jos bakegen. Stret long tetaem ia, mi bin save se God i bin sendem mi long ples ia blong mitim man ia, mo mi leftemap tingting blong hem, mi talem long hem blong mas faenem wan jos.
Taem mitufala i stap toktok i go, mi talem long hem se mi stap stadi blong go long skul blong stadi long tingting blong man. Be afta, mi talem se maet bae mi stadi long wok blong junalis. Hem i talem: “Yu luk olsem wan junalis—!I gud yu mekem hemia!” Mi faenem se i defren smol from se mi neva ting se bae mi save kam wan junalis. Tingting ia, olsem se i kamaot samples nomo.
Tu manis afta, tes ia we bae i mekem se mi save go long yunivesiti blong stadi long tingting blong man, i stap kam kolosap. Wan naet, mi luksave se mi no save stret long saed blong desisen blong mi. Mi sek, from se mi no intres blong mi stadi long wan nara samting. Afta nao, mi tingbaot storian blong mi wetem man ia long bas. Mi no save eni samting abaot ol skul blong kam junalis, be mi faenem wan websaet blong wan skul we i stap insaed long stet blong mi. I hapen se, dei ia, i bin las dei blong rejista. Mi no tingting tu taem, mi tekem janis ia. Mo blong katem longfala stori: mi jes finisim skul blong kam junalis.
Faenemaot Trutok
Mi no bin luksave long tetaem ia, be mi save naoia se God i bin stap lidim mi tru long revelesen we Hem i givim long miwan, blong mi disaed wanem nao blong stadi long hem. Mi filim se mi gat blesing ia blong save wanem God i wantem mi blong mekem—wanem kaen janis mo situesen Hem i putum long laef blong mi blong soem long mi rod ia we Hem i wantem mi blong folem.
Fo yia afta, mi faenem Jos mo mi bin baptaes, mo hemia tu, tru long Tabu Spirit we i stap lidim mi. Mo long en, mi bin lanem wanem nao hem i revelesen we i blong miwan taem mi bin ridim Doktrin mo Ol Kavenan Wan dei afta long baptaes blong mi, mi bin stap ridim Buk blong Momon from se ol misinari oli bin askem mi. Kwiktaem, mi disaed blong rid i go moa, mo mi no save wanem risen; mekem se mi go long 2 Nifae 31, long ples ia we Nifae i tokbaot baptaes blong Jisas Kraes. Nomata we mi no bin prea yet abaot Buk blong Momon, be mi filim save se Papa long Heven i bin stap traem blong talem long mi abaot baptaes. Nekis japta tu i pulum tingting blong mi, long taem ia we mi bin ridim se Tabu Spirit i save soem long yumi, evri samting we yumi nidim blong mekem (luk long 2 Nifae 32). Ol toktok ia oli kam moa klia mo oli stret gud long laef blong mi.
Wanem we i tru, i we, oltaem mi luksave se, sapos mi stap long tudak, God i bin wantem se bae mi karem sam laet i go ia. Taem we mi bin lanem abaot Josef Smit, mi bin luk se i gat sam samting we oli semmak bitwin mitufala. Mi bin lanem blong lukluk i go long God blong kasem ol ansa. Long taem we mi smol pikinini, we mi no stap go long Jos, oltaem mi bin stap prea, we i bin givim mi insperesen blong sakem sin, blong save wet longtaem, mo blong traem blong stap kaen mo gat lav long ol narawan.
Long wan wei, oltaem nomo mi bin save se God i bin stap lisin long mi. Taem mi bin stap go long jos taem mi gat 15 yia, mo mi bin lanem abaot Baebol, mi lukluk i gobak long plante eksperiens mo mi bin save se, save ia we mi bin kasem taem mi bin stap prea, i bin kam long God.
Stap Andastanem Wanem I Revelesen
Long 2 Nifae 32:5, Nifae i stap tijim se: “Sapos yufala i go tru long rod, mo kasem Tabu Spirit, bae hem i soem long yufala evri samting we bae yufala i mas mekem.” Hemia i bin wan samting we mi ting se mi bin andastanem kasem taem we, afta long baptaes blong mi, ol misinari oli bin askem mi sapos mi bin save wanem nao i revelesen. Mi no bin save hemia long stret nem blong hem, be mi talem se mi ting se i wan filing we mi bin filim plante taem, olsem se God i stap toktok wetem mi insaed long maen blong mi, mo i bin stap ansarem ol kwestin mo ol tingting blong mi. Oli talem se mi bin raet.
Wetem save ia abaot revelesen mo wetem presen we i Tabu Spirit, mi bin faenem bakegen, hat mo tingting ia blong ridim Baebol. Mi stat blong faenem plante samting we i gat mining long ples ia—mi bin luksave se i from Spirit i bin stap lidim mi. Mi bin laekem tumas blong ridim ol leta blong Pol, mo luk eksampol blong hem we Spirit i bin tijim hem tru long ol aksen blong hem mo strong tras blong hem long Sevya. Olgeta samting ia oli ol samting we mi bin luksave taem mi stap gat eksperiens wetem Jos ia we i bin kambak.
Mekem se, long en, i nomata wanem yia yu gat, weaples yu stap laef long hem, o iven, hamas save yu gat abaot ol samting blong God. Evri samting we yu nidim, i blong folem hym ia: “Talem se mi redi blong go Masta, long maonten o long ovasi” (STSP, pej 46–47). Laef folem, mo serem ol naes samting we Spirit i putum insaed long hat blong yu, from se Spirit bae i soem long yu, rod ia, blong blesem ol narawan, mo blong kasem ol blesing ia blong yuwan long laef ia.