Olsem Wanem Mi Kambak long Rod afta we Mi Gat Bel we Mi No Plan From
Mi bin stap miwan, mo mi gat bel. Be mi bin luksave se mi bin wantem wan defren kaen laef. Mi bin wantem blong laef from Kraes, mo mi bin wantem blong stap klin inaf blong kasem ol blesing blong tempol.
Mi bin disaed blong stap kolosap long hom blong save go long skul. Mi bin glad tumas blong save plei spot we mi laekem long wan level we i hae smol, mo semtaem, save se famli blong mi i stap long stan mo oli stap lukluk mi mo stap sapotem mi. Mi kamaot long wan gudfala famli tumas, mo papa mo mama blong mi oli bin tijim mifala ol valiu mo ol standet blong gospel blong Jisas Kraes.
Be, olsem wan spotwoman we mi gat 20 yia, we mi stap plei futbol mo stap laef “folem laef blong yunivesiti laef,” mi lego olgeta prinsipol ia we oli bin tijim mi. Mi bin go long klas mo plei futbol long ol dei blong wik, mo afta, mi bin stap pati long ol wiken, mo mi bin stap biliv se mi faenem tru hapines ia nao. !O, be mi rong evriwan! Be, hemia nao wanem Setan i stap mekem—hem i mekem ol rong samting oli swit tumas, mekem se, afta sam taem, yu luk se i oraet nomo.
Mi nomo gat kontrol long laef blong mi long nambatri yia blong yunivesiti. Mi stap mekem ol joes we oli pua, oli no gud tumas, mo mi faenem se mi gat bel. Ful lukluk blong mi i jenis wantaem. I nomo jes mi nomo, be i abaot bebi ia we mi stap karem long bel blong mi. Ol toktok long Alma 36:17–21 oli toktok stret i kam long sol blong mi, from se mi bin filim plante sore olsem hemia blong God, mo mi bin filim se mi rong long ol joes blong mi, semmak olsem Alma i bin filim.
Rod ia i go tru long fasin blong sakem sin, i save kam had mo i save stap traem yu. Mi bin faenem i had blong talemaot se i tru se mi rong, mo mi bin mekem wan mistek. Blong fesem olgeta we mi lavem mo talem long olgeta se mi mi gat bel, i bin wan taem we mi bin fraet we mi bin fraet long hem long ful laef blong mi. Mo tu, mi bin mitim bisop mo mi mas fesem wan disiplin kaonsel we i mekem se bae mi no save tekem sakramen blong wan longfala taem smol. Mi jes wantem ronwe mo priten se hemia i no ril laef. Be, hem i bin ril laef. Hemia i niufala ril laef blong mi. Mi gat wan had rod blong folem long fored blong mi, nomata wanem we i stap.
Famli blong mi i bin harem nogud long ol joes blong mi, be tu, oli bin lavem mi mo oli bin wantem wanem i bes blong mi, semmak olsem Papa blong yumi long Heven. Plante taem, mi bin askem miwan se bae olsem wanem nao bae Hem i fogivim mi afta we mi bin foldaon plante taem. Ansa we mi bin kasem evri taem i we: from se Hem i lavem mi mo Hem i wantem mi blong gobak long Hem. Mi bin save se mi mekem papa mo mama blong mi long wol ia i harem nogud tumas; be tingting ia se mi mekem Papa blong mi long Heven i harem nogud tumas, i tantanem kat blong mi.
Be yet, mi bin filim se mi stap miwan mo mi filim se mi lus long ol fas manis we mi gat bel, mo mi no save stret se bae mi go wea. Taem mi stat blong prea wetem moa tru tingting long Papa long Heven blong Hem i lidim mo helpem mi, mi bin lanem se mi neva bin stap miwan. Oltaem nomo, Hem i bin stap ia, i stap wet se bae mi lukaotem Hem. Mi gat wan bigfala jenis long hat. Mi wantem blong stap laef long wol ia folem wan defren laef. Mi wantem blong stap laef from Kraes. Mi wantem blong stap klin inaf blong tekem mo kakae sakramen bakegen. Mi wantem blong stap klin inaf blong save mared insaed long tempol wan dei, we i bin wan samting we mi ting se bae mi no save kasem from se mi bin mekem olgeta mistek.
Long tetaem ia nao mi bin lanem tru paoa blong Jisas Kraes olsem Sevya blong mi. Mi bin luk plante sore fasin we oli kaen, we i kam long Lod, long ol sotfala naen manis ia. Mi winim moa fet bitim mi bin gat bifo long laef blong mi. Fet ia nao long Jisas Kraes, i bin letem mi blong mi jusum blong oli adoptem swit bebi gel blong mi. Soa ia, blong givim gel blong mi long adopsen, i bin bigwan tumas. Be, glad ia we mi bin filim, blong stap helpem wan nara gel blong God blong kasem wan famli blong hem we i no save finis, i bin bigwan moa. Tru long eksperiens ia, mi bin jenis i kam gud moa, olsem we yumi evriwan i save mekem sapos yumi sore tru mo sakem sin wetem tru tingting—long wei ia, yumi letem Lod i mekem yumi kam oraet evriwan bakegen.
Evri dei, stat long tetaem ia, mi bin kasem blesing.
Yu luk. Mi tu, oli adoptem mi taem mi bin wan smol bebi, mo sikis manis afta we mi givim gel blong mi blong oli adoptem hem, mi bin faenem mo mi kam blong save stret mama we i bin bonem mi i kam long wol ia. Hemia i wan merikel wantaem. I no longtaem afta long hemia, mi bin mitim fiuja hasban blong mi, mo mi bin maredem hem insaed long tempol. Naoia, mi mama blong fofala naes pikinini.
Blong gat bel we mi no bin plan from, mo blong putum fasbon pikinini blong mi long adopsen, i bin jenisim laef blong mi blong oltaem. Mi bin lanem plante abaot miwan, mo abaot lav ia we God mo Jisas Kraes, Tufala i gat long mi mo long wanwan long yumi. Tru long hat we i soa, sobodi, ol krae, ol saelen prea, mo ol prea we Hem i ansarem, mi bin faenem hop, lav, fogivnes, sore mo gladhat. Mi bin lanem se, adopsen, i abaot lav. Mi bin lanem blong tingting hevi long fasin blong tekem mo kakae sakramen. Mi bin lanem se mi no bin lus evriwan—mi jes nidim blong gobak long rod ia we mi bin aot long hem. Taem mi bin sakem ol sin blong mi wetem tru tingting mo mi bin lanem blong stap dipen long Kraes mo gat fet long Kraes, Hem i bin tekem mi i kambak long yad blong Hem mo i bin blesem laef blong mi i bitim mak. Atonmen blong Jisas Kraes i ril, mo gladhat blong Hem i inaf blong yumi evriwan (luk long Ita 12:27).