Yu No Save Pusum Man blong Sakem Sin Hariap
Blong kam gud moa, mi bin nidim blong jenisim teknik blong mi blong save sakem sin.
“Amen.”
Mi kipim hed blong mi i stap daon taem oli stap pasem sakramen. Mi talem wan prea, mi talem long Papa long Heven ol samting we mi bin mekem long las wik, we oli rong, mo mi talem ol wei we mi sapos blong mekem i gud moa. Mi promes blong mi jenis. Mi tingting long Sevya. Mi tekem sakramen. Afta, mi mekem stret samting ia bakegen long nekis wik blong hem, mo mi ripitim ol semfala samting.
Blong wan longfala taem, hemia nao wanem mi stap tingting abaot sakramen: i blong tingting abaot Sevya, i blong sakem sin, mo i blong promesem se bae wik ia, bae i defren.
Mi no bin save gud se, rod ia, i no bin stap helpem mi blong progres. Evri wik, i no bin defren tumas long wik bifo. Long taem we bae mi prea, mi stap ripitim sem samting mo mi no stap mekem prea oltaem. Mi stil gat nogud tingting long ol pipol we oli toktok laod long tren long moning. Mi stil wajem tumas TV long taem blong spel afta long wok. Ol kaen aotsaed fasin ia, i luk olsem se oli stap olwe; mo iven we mi filim nogud long olgeta, mi no bin sua se bae mi mekem wanem moa blong nomo mekem olgeta. Be i klia nomo se wan samting i nogat. Mi jes no save nomo se hem i wanem.
Ansa
Long taem blong jeneral konfrens, mi bin faenem samting ia we i no stap. Presiden Dallin H. Oaks, Fas Kaonsela long Fas Presidensi, i bin tijim: “Wan nara ples blong leftemap mo mekem yumi gro long saed blong spirit, i praktis blong gogohed blong sakem sin, iven long ol smol rod blong brekem loa. … Kaen wei ia blong sakem sin, i mas hapen bifo yumi tekem sakramen long evri wik.”1
Wantaem nomo, i bin klia long mi se, from wanem nao mi gat hadtaem: Mi bin stap sakem sin nomo long Ol Sandei. Taem we mi bin stap tingtingbak long ol sin blong mi, long sam minit ia nomo long taem blong sakramen, mi bin stap letem mi mi no strong, o ting nating, long wik we i stap, mo long en, i stap blokem mi blong mi jenis.
Tijing blong Presiden Oaks i bin helpem mi blong faenemaot trifala wei we mi save putum samting ia we mi no bin gat, i kam insaed long rod blong mi blong sakem sin.
Wanem Nao Yumi Kaontem Olsem Wan Sin
Atonmen blong Jisas Kraes, hem i blong evri samting, iven ol fasin nogud blong evri dei , o ol samting blong wol we oli pulum tingting blong yumi—hem i eni samting we i stap blokem yumi blong kam moa olsem Hem. Sevya i bin andastanem se, iven ol smol samting we i smol evriwan, long en, bae i save lidim yumi blong aot long rod blong Hem, mekem se Hem i wantem helpem yumi blong winim olgeta samting ia tu. Blong mi letem Hem blong mekem hemia, mi bin disaed blong stat tingting abaot ol samting ia long wan defren wei—mi luk olgeta olsem ol samting we oli stap holemtaet mi blong go kolosap moa long Sevya.
Taem mi bin mekem hemia, i bin helpem mi blong luk klia se mi sot wea, mo hemia i bin helpem mi blong tingting moa series long olgeta. Mi filim se mi mas hariap blong sakemaot olgeta, mo gat wan niu hop we i bin kam tru long save ia, se Kraes i save helpem mi wetem hemia. Mi bin luk se i stret se, sapos mi wantem seksekemaot ol fasin nogud blong evri dei ia, bae i no naf blong prea abaot olgeta wan taem long wan wik. Mi nidim blong toktok long Lod evri dei.
Blong Stap Invaetem Sevya blong Help
Blong sakem sin evri dei, i letem yumi blong luklukgud long ril progres blong yumi, mo ripot i gobak long Papa long Heven. Yumi save luk klia moa se wiknes blong yumi i stap wea, mo blong askem spesifik help long Hem, mo semtaem askem fogivnes. Taem mi bin fesem ol smol samting ia we oli bin stap mekem se mi bin stap longwe long Sevya evri dei, ol prea blong mi oli bin jenis, mo ol aksen blong mi tu. Mi nomo stap glad from nomol samting blong mekem taem wik i bin stap go, be mi bin filim bigwan insaed long mi, blong mi mas mekem gud moa. Mi bin filim Spirit i lidim ol desisen blong mi. Mi bin gat moa paoa long tingting blong wantem “jusum raet ia we i moa had,”2 we mi bin save se i kam tru long paoa blong Atonmen blong Kraes we i mekem hemia i posibol.
I nomata se mi bin gat ol gudfala tingting taem mi bin traem blong lukluk long ol sin blong mi, miwan, be taem mi bin stap dipen long God truaot long wik, i wanem i bin mekem evri samting i kam defren. Taem mi mekem hemia, mi filim Hem i stap kolosap long mi taem mi stap traem blong jenis; mi nomo filim se Hem i stap wet nomo long en blong longfala tanel ia.
Wan Niu Wei blong Lukluk long Sakramen
Olsem we Presiden Oaks i bin eksplenem, sakramen i no kavremap ful fasin blong sakem sin—hem i wan step we yumi mekem long ful wik, mo yumi ripripitim evri wik. Sakramen, hem i wan taem blong yumi skelem wik blong yumi, blong talemaot tangkyu blong yumi long Sevya, mo blong komitim yumi bakegen blong mekem i gud moa. Taem mi stap sakem sin evri dei, sakramen i kam blong tekem wan niu mining long mi. Mi nomo nid blong talemaot evri sin blong mi mo sakem sin long 10 minit taem. Be, mi stap tingting long sakrifaes blong Kraes mo mi lukluk mo tingting bigwan long lav mo sore blong Hem we i no gat en. Taem mi stap tekem mo kakae long bred mo wota ia, mi rili filim se mi kam klin, mo mi rere blong kam gud moa long nekis wik we i stap kam.
Blong stap sakem sin truaot long wik i givim yumi wan janis blong glad mo talem tangkyu from merikel ia, we i sakramen. Taem mi andastanem se fasin blong sakem sin i wan rod blong folem evri dei, hemia i bin givim mi paoa blong fesem ol samting we mi no strong long olgeta wetem strong paoa long tingting mo wetem hop. Mi nomo filim se mi mi stap miwan wetem ol problem blong mi. Mi nomo filim se samting i pusum mi daon, mo mi nomo filim blong slakem ol samting, be mi save kasem hop mo glad ia bakegen we mi bin gat long taem blong baptaes blong mi.