Te Oki Rikaaki iaon te Kawai imwiin Bikoukou ae Aki Barongaki
I tiku n tii ngai ao I bikoukou. Ma I a ataia ae I tangira te bitaki n te maiu. I tangiria ni maiu ibukin Kristo, ao I tangiria bwa N na tau ibukin kakabwaia n te tembora.
I baireia bwa N na kaan nakon te auti man au reirei. I rang ni kukurei n takakaro n te takakaro are I tatangiria n te mwaneka are iaona ngkai I ataia bwa au utu a na bae ni mataku man aia tabo ao ni boutokaai. I roko man te utu ae tamaroa, ao au karo a reireinai aroaro ao kainibaire n ana euangkerio Iesu Kristo.
Ma ngke ai 20 ana ririki ataein te reirei ae tia butibooro ni maiuakina“te maiu ni kaoreti,” I a katikui reirei aike Ia tia n reireinaki. I kaei au kiraati ao I takakaro n te butibooro inanon bongin te wiiki ao imwiina ti kaei bootaki n te wiikente, are I kakoaua bwa I a kunea raoi iai te kukurei ni koaua. Ai kairuara ngai! Bwa anne ae e karaoia Tatan—e karaoi bwaai aika a kairua ni kamwaneira bwa tina tarai ao n taku bwa a bon tara n eti.
E minotaki maiu n au kateniua n ririki n te kaoreti. I a karaoi babaire aika kairua ao I a kunea bwa I a bikoukou. Au kantaninga ni kabane inanou maiu a bane ni bitaki. Ai tiaki bon ibukiu, ma ibukin te ataei are I a uouotia. Taeka ake n Aramwa 36:17–21 a taetae ni kaineti nakoiu ibukina bwa I rang namakina te nanokaawaki ao te kairua n au rinerine, n titebo ma aron ana namakin Aramwa.
Te kawai ni karaoan te rairannano e kona ni kangaanga ao n te kataaki. I noora kangangana ni kaotia bwa I kairua ao I a tia ni karaoa te bure. Kaitarakiia naake I tangiriia ao tuangakiia bwa I a bikoukou bon te tai ae moan te kakamaaku inanon maiu. I kaitibo naba ma au bitiobi ao I kaitara te kauntira ni kaetieti, are n tokina e uotai nakon aki kanakin te toa n te tai ae maan. I tii kan birinako ao ni bakaea are angkoa e aki koaua aei. Ma e bon koaua. Anne te bwai ae boou are I a kaitara. E matoa te kawai are N na toua n aki taraia bwa tera arona.
Au utu a rangi n un n au rinerine, ma a bon tangirai naba ao a tangira te bwai ae te kabanea n tamaroa ibukiu, n ai aron Tamara are i Karawa. I titirakinai n te tai ae mwaiti bwa e kanga ni kabwara au bure imwiin au kabwaka ni maiuakinan te kainibaire n te euangkerio n taai aika a mwaiti. Te kaeka are I karekea n tainako, ibukina bwa E tangirai ao e tangiria bwa N na oki nakoIna. I ataia bwa a tia n un irou au karo iaon te aba, ma te iango are mwaitira are I a tia ni kauna iai Tamau are i Karawa e bon rang aki raoiroi.
I teimatoa, n namakina te maroa ao te bua inanon uoua namwakaina n au tai ni bikoukou, n aki ataia bwa tera ae N na karaoia imwiina. Ngke I a waaki n tataro ma nanou nakon Tamara are i Karawa ibukin ana kairiiri ao ana ibuobuoki, I reiakinna bwa I bon aki tiku ni maroa. E bon teimatoa n tataningaai bwa N na ukoukoria. E korakora te bitaki inanou. I tangiria ni maiuakina te maiu ae kaokoro. I tangiria ni maiu ibukin Kristo. I tangiria bwa N na tau ni manga ana te toa. I tangiria n tau n te mare n te tembora n te bong teuana, te bwai ae I taku bwa e na rangi ni kangaanga imwiin karaoan au kairua.
Man te tai anne are I a reiakina iai mwaakan Iesu Kristo ae au Tia Kamaiu ni koaua. I noori nanoanga aika a mwaiti mairoun au Uea inanon ruaiwa namwakaina aika kimototo akanne. I a karekea riki te onimaki nakon are I a tia ni karekea mai imwaina inanon maiu. Bon onimakinan Iesu Kristo are I a kona iai n rineia bwa e na tabekaki natiu te aine ae tangiraki. Te maraki ni kanakoan natiu bwa e na tabekaki e bon rang kangaanga. Ma te kimwareirei ni buokakin te nati te aine temanna ae natin te Atua ni karekea ana utu ae akea tokina e bon korakora riki. I a bitaki nakon ae tamaroa riki man te taneiai anne, ngkai ti bon bane ni kona n namakina te kairua ao n rairannano ni koaua—ni kariaia te Uea bwa e na manga kaoka arora nakon are mai imwaina.
Ni katoabong imwiina I a tia ni kakabwaiaki.
Ko nooria, ngai naba I tabekaki ngke I uarereke, ao onoua te namwakaina imwiin kanakoan natiu te aine bwa e na tabekaki, I kunea ao ni manga ikotaki ma tinau are e bungiai. Aio are bon titebo ma te kakai. E aki rang maan imwiin anne, I kaitibo ma te aomata are N na iein ma ngaia ao n tokin te tai ti mareaki n te tembora. N te tai aei I a riki bwa tinaia ataei aika aman.
Karekean te bikoukou ae aki barongaaki ao kanakoan au moan nati bwa e na tabekaki e bita maiu n aki toki. I a tia n reiakina rongorongou ae mwaiti ao n te tangira are te Atua ao Iesu are karekea ibukiu ao ibukira n tatabemaniira ae moan te bati. Rinanon te maraki n nano, maraki, rannimata, tataro ake aki taekinaki, ao kaekaan tataro, I kunea te kantaninga, tangira, kabwaran bure, nanoanga ao te akoi. I reiakinna bwa te tabetabe bon taekan te tangira. I reiakina kakaawakin kanakin te toa. I reiakinna bwa I bon aki bua—I tii riai n okira te kawai are I a tia ni mwaninganako mai iai. Ngkai I rairannano ni koaua man au bure ao n reiakina ni katan ao ni karekea te onimaki iroun Kristo, E uotai rikaaki nakon Ana nanai ao ni kakabwaia maiu n ae bati. Ana mwakuri ni kamaiu Iesu Kristo e bon koaua, ao Ana akoi e tau ibukira ni kabane (taraa Ita 12:27).