Ataakina E Raoiroi ma E Aki Tau

Iroun Steven C. Harper

Burobeetia n te Kamatebwai iaon Rongorongon te Aro ao Reirei, Brigham Young Iuniwetiri

Aikai tabeua rongorongoia membwa n te Ekaretia rimoa ake a ongo taian koaua mai irouia taan kakoaua n Ana Boki Moomon.

Korotamnei iroun Dan Burr

Ongoraeakinan koaua mai iroun te tia kakoaua Ana Boki Moomon kanga bon aron te bwai ae e kaan nakon noran te bwatua koora ke te anera. A mwaiti membwa n te Ekaretia rimoa ae e reke anne irouia.

Rongorongo aika ana taekinaki aikai bon rongorongoia membwa aika a mwaiti ake a taetae ma te tia kakoaua iaon Ana Boki Moomon. Ti na karekea ara atatai, ma ibukin, are e reirei Beretitenti Russell M. Nelson, bwa karekean te koaua iaon Ana Boki Moomon e bon “tamaroa, ma e aki tau!”¹

Rebecca Williams: “A Kakoauaaki Aia Taeka”

Rebecca Swain Williams e ongo irouia taan kakoaua aika a mwaiti iaon Ana Boki Moomon i Ohio ni moa man 1830. E taekina ana koaua nakon tamana ao mwanena: “I a tia n ongo te rongorongo ae aekakin anne mai irouia aika a mwaiti man te utu ae te [Timiti] ao taan kakoaua aika teniman. I ongo ae a taekinna i mataia aomata n tain te bootaki bwa a nora te Anera ae Tabu n ruo mai karawa ao n uota te bwatua ao ni kawenea i mataia.”

Ngke kain ana utu a aki butimwaea ana koaua, e aki maaku Rebecca. E reitinako n tangiriia, n tataro ibukiia, ao ni kawakina ana reirei tamana aika raraoi. E bon reitanako naba ana kakoaua nakoina ae taan kakoaua n Ana Boki Moomona a bon taekina te koaua: “Bon mwaane aika a raraoi kateia ao e kakoauaaki aia taeka. … A tia n nora ana anera te Atua ao a taetae ma ngaia.”²

Inanon rabanen 1830, te tai are e a korakora iai te maenako inanon te Ekaretia, e tiku n teimatoa Rebecca, n rineia bwa ana maeka ni kaineti ma reirei n Ana Boki Moomon.³

William McLellin: “Kamatoaaki … ni Kakoauaa te Koaua”

N te ingabong teuana n 1831 te kairake n tia reirei ae arana William McLellin e ongo bwa tabeman mwaane ake iaon kawaia nako Missouri a na kabwarabwaraa taekan te boki ae boou ae e taekinaki bwa “te Kaotioti mai iroun te Atua.” E kawaekoa bwa E na ongoraa irouia. E ongora iroun David Whitmer are e taekina koauan ae e a tia “n nora te Anera ae Tabu are e kaota koauan te rekooti aei nakoina.” E rangi n tangiria ni kan ataia ngkana a koaua aia kakoaua. E iriia 400 te maire (644 te kiromita) nako Independence, Missouri, te tabo are e kaitibo ao n intawiuniia taan kakoaua ake tabeman, ma Martin Harris ao Hyrum Smith.⁴

William e intawiuna Hyrum inanon te tai ae maan. “I titiraki bwa e kanga raoi aron reken te rekooti,” e koreia William. N te ingabong are imwiina, ngke e a tia n tataro bwa e na kairaki nakon te koaua, e a ataia ae “kantaningaaki ngkai bon te mwaane ae e kokoaua e kabaeaki bwa e na kaota te koaua ae e bon kona ni kakoauaaki Ana Boki Moomon.”⁵

N te ririki are imwiina, ana onimaki William e a kataaki ao ni kakorakoraaki man ana rinerine ao man bwainikirinakiia Aika Itiaki. Ngke a buakanaki kain te Aro i Jackson County, Missouri, raoraon William ae Hiram Page, are temanna mai ibuakoia taan Kakoaua ake Waniman, e tiribooaki ao ni kataereaki irouia mwaane ake a taku bwa ana kanakoa ngkana e kakewea Ana Boki Moomon. “N na kanga ni kakewea te bwai ae I ataia bwa e koaua?” E kaeka Hiram, ao a manga tiribooia riki.

E kakorakoraki William man ana koaua Hiram—ao e ata kakamakun ae rinanon te tiribooaki. Ngke e ongo William ae mwaane n te tabo arei a anga te kaniwanga nakoia ake a taua ngaia ma Oliver Cowdery, a rabanako man te kawa ni karabaia n te buakonikai ma David Whitmer. Ikekei are e a intawiunia naake uoman mai buakoia Taan Kakoaua ake Teniman. “I tuai man nora te mii ni burabeti ae e a oti inanon maiu,” e taku, “ma ngkamii kam taku bwa kam a tia, ao man anne kam bon ataia raoi bwa e koaua. Ngkai kam ataia ae maiura e a reke n te kangaanga ni katoa aoa, ngkana ti kona nreke irouia taan iowawa. Tuangai n ae kam maaka te Atua, e bon koaua Ana Boki Moomon?”

“Te tari William,” e taku Oliver, “te Atua e kanakoa ana anera ae tabu n taekina koauan rairana nakoira, ngaia are ti a ataia bwa e koaua. Ao ngkana arona bwa a tiringiira taan iowawa, ma ti na bon mate n taekina koauana.”

E reitia David, “e a tia n tuangko Oliver te bwai ae e bon koaua, bwa ti aki kona ni mwamwanaaki. I bon rangi ni koaua n taekinna nakoim koauana!”⁶

David, Martin, Hiram, Oliver, ao William a bane n ata Iotebwa Timiti ae raira Ana Boki Moomon man mwaakan te Atua. A ataia ae te euangkerio are e koreaki iaon bwatua koora a bon koaua. Ma imwiina ni maiuia a kariaia te maraki n nano iroun Iotebwa bwa e na rikirake ni korakora ao a katoka maiuakinan reirei man Ana Boki Moomon.

N tia n nora aron aia rinerine, e taekinna koauana Iotebwa Timiti bwa tiaki ae e tii koaua ana Boki Moomon—“te boki ae te kabanea n eti mai buakon booki nako iaon te aonaaba, ao boni ngaia kingin ara ekaretia”—ma ti na “kaniia riki te Atua man irirakin nanon reirei ake i nanona, nakon taian boki riki tabeua.”⁷

Sally Parker: “Korakora n te Onimaki”

Sally Parker bon kain rarikin Lucy Mack Smith i Kirtland, Ohio. “E tuangai ni kabane bwaninin te rongorongo,” e koreia Sally. Ngke e titirakina Lucy ngkana e a tia n nora te bwatua, “[Lucy] e taku I tuai, bon tiaki katauana bwa e na noori, ma e a tia n tabekii ao n tautauii ao I kakoauai baike e taekinii bukina bwa I a tia ni maeka i rarikina waniua te namwakaina ao bon temanna mai ibuakoia aine aika a tamaroa ae I ataia.”

N 1838, Sally e ongo mai iroun Hyrum Smith ngke e taekina ana kakoaua naba: “E taku bwa e a tia n nora te bwatua ni matana ao e riringii ni baina.”⁸

Inanon banen 1830, ngke a mwati aomata ae a kitana te Ekaretia, e nanokawaki Sally Parker ni buan reitakiia ao e kaboua kamatoaan nanona bwa e na karaoi nanon baike a taekinaki n ana Boki Moomon. “I nanonna ae N na taua te onimaki anne n ai aron uaan te makeke,” e koreia Sally. “I namakina mwaakana ngkai inanou. E bon teimatoa au onimaki n ai arona ngkekei ngke I bwabetitoaki ao au namakin bon arona naba ngkai. I nanonna ae n taua raoi te euangkerio ni karokoa te mate.”⁹

Rhoda Greene: “Iai Irouna Tamnein te Atua”

E taetae Lucy Mack Smith n te maungatabu ni kabuta n 1845, imwiin mateia nikabane taan kakoauaa Ana Boki Moomon n ana utu man te aoraki ke a tiringaki. E taekina te karaki iaon moan ana mition natina te mwaane ae Samuel.

Samuel, temanna mai ibuakoia taan Kakoaua ake Waniman, e kawara mweengan Rhoda Greene, are kainabana e karaoa ana mition man te ekaretia teuana. Samuel e titirakina Rhoda ngkana e tangira te boki. “Bon Ana Boki Moomon are e rairia Tariu Iotebwa man bwatua aika a karabaaki iaontano,” e kabwarabwaraa.

E butimwaea te kaobi teuana Rhoda bwa e na warekia ao ni kaotia nakon kainabana. Ngke e oki imwiina Samuel, e tuangnga Rhoda ae kainabana akea nanona iai, ao e a aki kona ni kabooa te boki. Ma te nanokawaki, e a anaa te boki Samuel ao n tauraoi n nako. Rhoda e tuanga Lucy ae e tei teutana Samuel ao e taraia. “E tuai man nora te mwaane ae e tara n,” e taku Lucy n ana tai n taetae n te maungatabu. “E ataia ae iai iroun teuanne Tamnein te Atua.”

“Te Tamnei e aki kariaia bwa N na ana te boki aei,” Samuel e tuanga Rhoda, are e katorobubua ao n tuanga Samuel bwa e na tataro ma ngaia. E kawakina te boki, e warekia, ao e karekea ana koaua iaona. Ao, i mwiina, kainabana. A rineia bwa ana maiuakin reirei ake inanona ni maiuia.

“Ao mai ikanne e a moanaki te mwakuri,” e taekina koauana Lucy, “ao e a maenako n ai aron koraan te makeke.”¹⁰

Rhoda Greene bon au bakatibu. I reireinaki man ana koaua n Ana Boki Moomon ao man koaua ake a tauaki mwiia n aia koaua taan kakoaua ao nake a ongo mai irouia. I kakorakoraaki man aia rinerine n tiku iaon baike a reiakinaki man ana Boki Moomon.

Ngaira n tatabemaniira ti kona n riki bwa taan kakoaua n ana Boki Moomon n taai aikai, ngkana e kamatoa nakoira te Tamnei ae Raoiroi koauan te boki. Teutana imwain nakou nakon au mition, I kabanea warekan ana Boki Moomon, imwiina I katorobubua ao n tataro n ae e beebete ma nanou raoi, te nano ae koaua, ao n onimaki iroun Iesu Kristo (taraa Moronaai 10:3–4). I namakina te namakin ae e korakora are e tuangai, “Ko a kaman tia n ataia ae e koaua.” E roko ma te rau ae I aki tangiria bwa na tukia. I a tia n ataia mai i mwiin anne bwa e koaua Ana Boki Moomon.

Mae e ngae n anne, e bon aki tau. E reirei Beretitenti Russell M. Nelson: “N tainako ngkana I ongo ana taeka temanna, n raonaki ma ngai, n taekina, ‘I ataa ana Boki Momoon bwa e koaua,’ I kan takarua, ‘E tamaroa anne, ma e aki tau!’ Ti riai n namakinna, mai ‘kabin’ nanora, bwa ana Boki Moomon bon ana taeka raoi te Atua. Ti riai n namakinna mai kabin nanora bwa ti bon aki tangiria ni maiu teuana te bong ngkana akea.”¹¹ Ana reirei Beretitenti Nelson a bon koaua. Au kekeiaki ni waaki nako ni maiuakin reirei man ana Boki Moomon e a tia n uotai ni kaniai nakon te Atua nakon riki bwaai tabeua.

Bwaai aika a na taraaki

1. Russell M. Nelson, “Ana Boki Moomon: Tera Aron Maium Ngkana Arona bwa Akea?” Riaona, Nobembwa 2017, 63.

2. Rebecca Swain Williams to Isaac Swain, Youngstown, New York, Tuun 12, 1834, kateiraoan korean taekana. Taraa kabwarabwaraan ao tamnein te reta n Janiece Johnson, “Give Up All and Follow Your Lord,” BYU Studies, vol. 41, nambwa 1 (2002), 97–102.

3. Taraa naba Janiece Lyn Johnson, “Rebecca Swain Williams: Steadfast ao Immovable,” Ensign, Apr. 2011, 38–41.

4. Taraa The Journals of William E. McLellin: 1831–1836, ed. Jan Shipps and John W. Welch, (1994), 29–33.

5. The Journals of William E. McLellin, 33, capitalization standardized.

6. In William E. McLellin’s Lost Manuscript, ed. Mitchell K. Schaefer (2012), 165–67.

7. Iotebwa Timiti, n kabwarabwaranan ana Boki Moomon. Ibukin karauan tuoan te reirei aei, taraa Scott C. Esplin, “Getting ‘Nearer to God’: A History of Joseph Smith’s Statement,” in Living the Book of Mormon: Abiding by Its Precepts, ed. Gaye Strathearn ao Charles Swift (2007), 40–54.

8. In Janiece L. Johnson, “‘The Scriptures Is a Fulfilling’: Sally Parker’s Weave,” BYU Studies, vol. 44, no. 2 (2005), 116, 115.

9. Inanon Johnson, “‘The Scriptures Is a Fulfilling,’” 117.

10. Lucy Mack Smith, “This Gospel of Glad Tidings to All People,” in Jennifer Reeder and Kate Holbrook, eds., At the Pulpit: 185 Years of Discourses by Latter-day Saint Women (2017), 24.

11. Russell M. Nelson, “Ana Boki Moomon: Tera Aron Maium Ngkana Arona bwa akea?” 63.

Aia taetae ni Burabeti Taan Kakoaua

2 Nibwaai 27:12 “Mangaia ae n te bong arei ao e na anganaki te aomata are I a tia n taekinna, te boki e na karabaki te boki mai mataia kaain te aonaba, ao bon akea ae e na nooria ma ti taan kakoaua ake teniman aika a na nooria, ni mwaakan te Atua, i rarikin te aomata are e na anganaki; ao a na kakoaua te boki ma kanoana.”

Ita 5:2–3 “Ao nooria, ko na karekea te raka bwa ko na kaoti bwaatua aikai nakoia ake a na buoka waakin te mwakuri aio;

“Ao a na kaotaki nakoia teniman ni mwaakan te Atua; ngaia are a na bon ataia ma te koaua raoi bwa a koaua bwaai aikai.”

Ana Utu te Burabeti Iotebwa bwa taan Kakoaua

Iotebwa Timiti te Ikawai. e rinanon te kabureaki ao abong ana bong n aki amwarake nakon ae e na kakewea ana Boki Moomon.

Lucy Mack Smith e ongo aia koaua n tatabemaniia Taan Kakoaua ake Teniman—Martin Harris, Oliver Cowdery, and David Whitmer—ao aron naba ana koaua natina Iotebwa. I mwiin raoi ngke e kaota te bwatua te koora te anera ao bwaai ake rimoa nakoia taan Kakoaua aika Teniman n 1829, e tuanga tinana Iotebwa: “Te Uea e a tia ni kataua bwa e na kaotaki te bwatua nakoia 3 riki i rarikiu ake a tia n nora te anera ao a na riai n kaotioti nakon te koaua n te bwai are I a tia n taekinna” (“Lucy Mack Smith, History, 1844–1845,” itenariba [11], boki 8, josephsmithpapers.org).

Samuel Smith e kaota ana koaua nakon Brigham Young, “I ataia bwa te boki bon te kaotioti mai iroun te Atua, e rairaki man ana bwai n tangira ao mwaakan te Atua” (in “History of Brigham Young,” Millennial Star, vol. 25, no. 23 [June 6, 1863], 361).

Hyrum Smith, are e mena n te Oo ni Kaikain i Liberty ma Iotebwa, e taku: “E a tia ni karaoaki ae e aki raoiroi nakoiu ao ni karinaki inanon te karabuti, ao n tauaki inanon namwakaina aika bati tii ibukin au onimaki ao ‘kakoauakin Iesu Kristo.’ Ma e ngae n anne, I karabwa te Atua bwa I namakina te nano matoa ni mate, nakon ae N a kakeea te bwai are e a tia n noria matau, are a tia n tautawi baiu [te bwatua are e rairaki mai iai ana Boki Moomon], are I a tia n taekina koauana nakoia ake I kairaki nakoia” (“Nakoia aika Itiaki ake a uamaenako,” Times and Seasons, vol. 1, no. 2 [Dec. 1839], 23; taraa naba M. Russell Ballard, “Brothers Bound by Love and Faith,” Ensign, Sept. 1994, 65).