Ko Aki Kona n Ienikuriia te Rairannano
Ni katamaroa riki, I riai ni bita aron au iango ni karaoan te rairannano.
“Amen.”
I teimatoa ni kabaraaka atu ngke e bwatinaki te toa. I tataro, ni karinani bwaai nakon Tamara are i Karawa ni bwaai ake Ia tia ni kairua iai n te wiiki ae e nako, n te kawai are I kona ni katamaroa iai. I berita bwa N na bitaki. I iangoa te Tia Kamaiu. I kana te toa. Ngkanne I karaoi bwaai ake I a tia ni karaoi n te wiiki are imwiina, ni manga kaoki naba bwaai akekei.
N te tai ae maan, anne au iango aron te toa, iangoakin te Tia Kamaiu, rairannano, ao ni berita bwa n te wiiki aei e na bitaki.
I bon aki matata n ataia bwa te waaki aei e aki buokai ni karikirakeai. Ni katoa wiiki e bon aki bitaki man te wiiki are mai imwaina. Au tataro a teimatoa n okioki ao ni bibitaki. I teimatoa ni buakaka au iango nakoia aomata ake a taetae n takarua iaon te turein n te moaningabong. I teimatoa ni mamataku n te TV n ae mwaiti n tiku n te taun imwiin te mwakuri. Taraan ae anua aikai a bon tiku, ao e ngae ngke e aki raoiroi irou, I aki ataia raoi bwa tera riki ae N na karaoia bwa N na kanakoi. Ma iai te bwai ae matata ae bua. I bon aki ataia bwa tera.
Te Kaeka
N tain te maungatabu ni Kabuta I a kunea te bwai anne. Beretitenti Dallin H. Oaks, Moan Kauntira n te Moan Beretitentii, e reirei: “Teuana bwain tabekarakean te tamnei ao te rikirake bon kakaraoan te rairannano n tainako, riki man bure aika a tara n rang uarereke. N aron te rairannano e riai ni waaki nako imwaain kanakin te toa ni katoa wiiki.”1
N te tai ae waekoa, e a matata bukin tera I rereke n te kangaanga: I bon ti karaoa au rairannano ni katoa Tabati. Man tii iangoan au bure inanon tabeua te miniti n tain te toa, I bon kariaia bwa N na rauaki inanon nikiran te wiiki, are n tokin te tai e totokoa te kona ni bitaki.
Ana reirei Beretitenti Oaks e buokai n atai teniua kawai ake I kona ni ikotii iai bwaai aika a bua inanon karaoan au rairannano.
Tera ae Warekaki bwa te Bure
Ana Mwakuri ni Kamaiu Kristo bon ibukin bwaai ni kabane, bon anua naba aika buakaka ke kabwakabwaka n te maiu n rabwata —bon bwaai ni kabane ake a totokoira man rikira ni kaan riki n ai Arona. Te Tia Kamaiu e ataia bwa bon bwaai naba aika uarereke e kona ni kararoaira man Kawaina, ngaia are E tangiriira bwa tina tokanikai naba iaon bwaai akanne. N te aro bwa E na kona ni karaoa anne , I baireia bwa N na waaki n iangoi bwaai akanne n te kawai ae kaokoro—ni bwaai ake a kararoaira man kaniiara nakon te Tia Kamaiu.
Karaoan aei e buokai n noori kabwakau n ae matata riki ao e a tia ni buokai bwa N na karaoi n taua ma nanou. I namakina korakoran kawaekoan kanakoaia n raonna ma te kantaninga ae boou are roko man atakin are Kristo e kona ni buokai n aei. E kona ni mataata bwa ngkana I tangiria ni kanakoi anua aikai, e aki tau ti te tataro ibukiia teuana te tai n te wiiki. I riai n reitaki ma te Uea ni katoabong.
Kaoakin ana Ibuobuoki te Tia Kamaiu
Te rairannano ni katoabong e karekea bwa tina kona n noora rikirakera ni koaua ngkai ti ribooti n oki nakon Tamara arei Karawa. Tina kona riki n noori kabwakara are ti mena iai ao ni butiia ibukin ibuobuoki aika onoti ngkai ti ukoukora kabwaraan ara bure iai. Man kaitaraan bwaai aika a uarereke aikai ake a kararoaira mairoun te Tia Kamaiu ni katoa bong, au tataro a bitaki, ao aron naba au waaki. N onean mwiin karaoan bwaai ake I kakaraoi n te wiiki, I teimatoa n namakina te nano ni kan kanakoraoaki riki. I namakina te Tamnei ni bitii au babaire. I karekea te mwaaka ni kona n “rinea te eti are matoatoa riki,”2 are I ataia bwa e roko rinanon mwaakan Kristo n ana Mwakuri ni Kamaiu.
E ngae ngke iai nanou ae tamaroa ngkana I kataia n rinanon au bure ibon irou, kaweneaia iroun te Atua rinanon te wiiki are e karaoa te bitaki ni kabane. Ngkana I karaoa aei, I namakina te kaniiaki nakoIna ngkai I kataia ni bitaki, I aki manga namakina are kaanga e bon tii tataninga n tokin te tanoo ae abwabwaki.
Taraakin te Toa ae E Boou
Ngke e kabwarabwara Beretitenti Oaks, te toa e aki kaira te rairannano—bon te mwaneka inanon te wiiki are e karaoaki are e okioki. Bon te tai ibukira n rinanon arora n te wiiki, kaota te kakaitau ibukin te Tia Kamaiu, ao ni katamaroa riki ara motinnano. Ngkai i raira nanou ni katoabong, te toa e manga boou kanoana irou. I aki manga ikoti bwaai ni kabane inanon te rairannano ae karaoaki inanon 10 te miniti. N onean mwiina, I a iangoa raoi ana anganano Kristo ao ni miimi n Ana tangira ao Ana nanoanga ae akea tokina. Ngkai I kana te kariki ao te ran, I namakina te kaitiakaki ni koaua ao n tauraoi ni katamaroa riki teutana n te wiiki are imwiina.
Te rairannano ni katoa wiiki e anganai au tai ni kakaitau ibukin te toa ibukin ana kakai ake iai. Ataakina bwa te rairannano bon te mwakuri ae katoabong e a tia ni kakorakorai ni kaitarai kabwakau ma te ninikoria ao te taratara ae boou. I aki manga namakina ae kaanga bon tii ngai iaon au kangaanga. Nakon riki namakinan te rawawata ao te bwarannano inanon taai akanne, I a kona ni manga karekea te onimaki ao te kukurei are I rinanona n te bwabetito.