He ʻIkai Te Ke Lava ʻo Fakavaveʻi ʻa e Fakatomalá
Ke hoko ʻo lelei angé, naʻe fie maʻu ke u liliu ʻeku founga fakatomalá.
“ʻĒmeni.”
ʻOku punou hoku ʻulú ʻi he taimi ʻoku tufa ai ʻa e sākalamēnití. ʻOku ou fai ha lotu, ʻo fakamatala ki he Tamai Hēvaní ʻa e ngaahi fehālaaki ne u fakahoko ʻi he uike kuo maliu atú mo e ngaahi founga ne u mei toe lelei ange aí. ʻOku ou palōmesi ke liliu. ʻOku ou fakakaukau ki he Fakamoʻuí. ʻOku ou maʻu ʻa e sākalamēnití. Peá u toe fai pē e meʻa tatau ʻi he uike hokó, ʻo toe fakahoko pē ʻa e meimei meʻa tatau.
Ko e anga ia ʻeku fakakaukau ki he sākalamēnití ʻi ha taimi fuoloa: fakakaukau ki he Fakamoʻuí, fakatomala, pea palōmesi ʻe kehe ʻa e uiké ni.
Naʻe ʻikai mahino lelei naʻe ʻikai tokoniʻi au ʻe he foungá ni ke u fakalakalaka ai. Naʻe ʻikai ke fuʻu faikehekehe ʻa e uike takitaha mei he uike kimuʻá. Naʻe kei tatau pē ʻa e ngaahi meʻa ne u lea ʻaki ʻi heʻeku ngaahi lotu fakatāutahá pea kei tātāitaha hono fakahokó. Naʻá ku kei fakakaukau kovi pē ki he kakai ʻoku talanoa he lēlué he pongipongí. Naʻe kei lahi pē ʻeku sio TV ʻi hoku taimi ʻatā hili ʻa e ngāué. Naʻe hangē ha meʻa pau e ngaahi tōʻonga ko ʻení, pea neongo naʻá ku ongoʻi kovi koeʻuhi ko e ngaahi meʻá ni, ka naʻe ʻikai ke u fuʻu fakapapauʻi pe ko e hā ha toe meʻa ʻe fai ke taʻofi ai ia. Ne ʻi ai ha meʻa naʻe mole. Naʻe ʻikai pē ke u ʻiloʻi pe koe hā.
Ko e Talí
ʻI he lolotonga e konifelenisi lahí, naʻá ku ʻilo ai ʻa e kiʻi konga ko ia naʻe molé. Naʻe akonaki ʻa Palesiteni Tāleni H. ʻOakesi, ko e Tokoni ʻUluaki ʻi he Kau Palesitenisī ʻUluakí ʻo pehē: “Ko ha toe maʻuʻanga ivi fakalaumālie mo fakatupulaki ʻa e hokohoko atu ʻo e fakatomalá, tatau ai pē kapau ʻoku hangē ha kiʻi angahala siʻisiʻí. Ko e fakatomala peheé ʻoku totonu ke hoko ia kimuʻa ʻi heʻetau maʻu fakauike ʻa e sākalamēnití.”1
Fakafokifā pē, ne mahino kiate au ʻa e ʻuhinga naʻá ku faingataʻaʻia aí: naʻá ku toki fakatomala pē he ngaahi ʻaho Sāpaté. ʻI heʻeku fakakaukauloto pē ki heʻeku ngaahi angahalá lolotonga e ngaahi miniti siʻi ʻo e sākalamēnití, naʻá ku fakaʻatā ai au ke tupulaki ʻeku fakafiemālie ʻi he toenga ʻo e uiké, ʻo iku taʻofi ai e faingamālie ke liliú.
ʻOku tokoni mai ʻa e akonaki ʻa Palesiteni Oaks ke u ʻiloʻi ʻa e founga ʻe tolu te u lava ai ʻo fakafekauʻaki ʻa e meʻa ko ʻeni naʻe molé ki he founga ʻo ʻeku fakatomalá.
Ko e hā ʻOku Lau ko e Angahalá
ʻOku kātoi ʻe he Fakalelei ʻa Kalaisí ʻa e meʻa kotoa pē, ʻo tatau pē ʻa e ngaahi tōʻonga moʻui koví pe ngaahi meʻa fakamāmani ʻokú ne tohoakiʻi ʻetau tokangá—ha faʻahinga meʻa pē ʻe malava ke ne taʻofi ai kitautolu mei heʻetau hoko ʻo hangē ko Iá. ʻOku mahino ki he Fakamoʻuí ʻe lava pē ʻe he fanga kiʻi meʻa iikí ʻo ʻave māmālie kitautolu mei Hono halá, ko ia ai ʻokú Ne fie maʻu ke tokoniʻi kitautolu ke tau lavaʻi foki mo e ngaahi meʻa ko iá. Ke fakaʻatā Ia ke Ne fai iá, naʻá ku fili ke u kamata fakakaukau ki he ngaahi meʻa ko iá ʻi ha founga kehe—ko ha ngaahi meʻa ʻokú ne kei taʻofi au mei heʻeku ʻunu ke ofi ange ki he Fakamoʻuí.
Ne tokoni ʻeku fai ʻení ke u fakatokangaʻi lelei ange ʻeku ngaahi tōnounoú pea tokoniʻi au ke u tokanga fakamaatoato ange ki ai. Ne u ongoʻi ha fuʻu fie maʻu fakavavevave ange ke siʻaki kinautolu fakataha mo ha fakatuʻamelie foʻou ne maʻu mei he ʻiloʻi ʻe tokoni mai ʻa Kalaisi ʻi he meʻá ni. Ne ongo tonu ʻeni he kapau te u fie maʻu ke taʻofi ʻa e ngaahi tōʻongá ni, ʻoku ʻikai feʻunga ke lotu tuʻo taha he uike fekauʻaki mo kinautolu. ʻOku fie maʻu ke u fealeaʻaki fakaʻaho mo e ʻEikí.
Fakaafeʻi e Tokoni ʻa e Fakamoʻuí
ʻOku fakaʻatā ʻe he fakatomala fakaʻahó ke tau vakaiʻi moʻoni ʻetau fakalakalaká ʻi heʻetau toe fai ha fakamatala ki he Tamai Hēvaní. ʻOku tau lava ʻo sio lelei ange ki he feituʻu ʻoku ʻi ai hotau ngaahi vaivaiʻangá pea kole kiate Ia ha tokoni pau lolotonga ʻetau fekumi ki ha fakamolemolé. ʻI heʻeku fehangahangai fakaʻaho mo e fanga kiʻi meʻa iiki ʻokú ne ʻai ke u mamaʻo mei he Fakamoʻuí, ne liliu ʻeku lotú, pea pehē foki ki heʻeku ngaahi ngāué. Naʻe ʻikai te u toe fai e ngaahi meʻa angamaheni ʻi he fakalau atu e uiké, ka ʻoku ou ongoʻi maʻu pē ha holi ke fakalakalaka. Naʻá ku ongoʻi ʻa hono takiekina ʻe he Laumālié ʻa ʻeku ngaahi filí. ʻOku ou maʻu ha mālohi lahi ange ke “fili ki he totonu ʻoku faingataʻá,”2 ʻa ia ʻoku ou ʻiloʻi ʻoku maʻu mei he mālohi ʻo e Fakalelei ʻa Kalaisí ʻa ia ʻoku malava ke fakahoko ai ha meʻá.
Neongo ne ʻi ai ha ngaahi fakakaukau lelei ʻi heʻeku feinga ke fekuki mo ʻeku ngaahi angahalá ʻiate au peé, ka ko e meʻa ne hoko ai e faikehekehé ko e falala ki he ʻOtuá lolotonga e uiké. ʻI heʻeku fai ʻení, ʻoku ou ongoʻi ʻene ofi mai kiate aú ʻi heʻeku feinga ke liliú; ʻoku ʻikai ke u toe ongoʻi ʻo hangē ʻokú Ne tatali mai ʻi he ngataʻanga ʻo ha fuʻu tānolo (tunnel) lōloa moʻoni.
Ko ha Vakai Foʻou ki he Sākalamēnití
Hangē ko e fakamatala ʻa Palesiteni Oaks, ʻoku ʻikai fālute ʻe he sākalamēnití ʻa e fakatomalá—ko ha sitepu fakauike ia ʻi ha siakale ʻo ha meʻa ʻoku toutou hoko. Ko ha taimi ia ke tau vakaiʻi ai hotau uiké, fakahaaʻi ʻa e houngaʻia ki he Fakamoʻuí, pea tukupā ke toe fai lelei ange. ʻOku toe ʻuhingamālie ange ʻa e sākalamēnití kiate au ʻi heʻeku fakatomala fakaʻahó. ʻOku ʻikai ke u toe fakatahaʻi kotoa mai ʻa e founga fakatomalá kotoa ki he miniti pē ʻe 10. Ka ʻoku ou fakakaukau moʻoni ki he feilaulau ʻa Kalaisí pea ofo ʻi Heʻene ʻofa taʻe fakangatangatá mo ʻene angaʻofá. ʻI heʻeku maʻu ʻa e maá mo e vaí, ʻoku ongoʻi moʻoni ʻa hono fakamaʻa aú pea mateuteu ke kiʻi fakalakalaka ange ʻi he uike hoko maí.
ʻOku ʻomi ʻe he fakatomala lolotonga ʻa e uiké ha faingamālie ke fakahoungaʻi ʻa e sākalamēnití koeʻuhi ko e mana ko iá. Kuo fakaivia au ʻe he mahino ko e fakatomalá ko ha ngāue fakaʻaho ia, ke u fehangahangai mo ʻeku ngaahi tōnounoú ʻi he mālohi mo e fakatuʻamelie. ʻOku ʻikai ke u toe ongoʻi ʻoku ou tuenoa mo ʻeku ngaahi palopalemá. Kuo ʻikai ke u toe ongoʻi mafasia mo loto foʻi ʻi he ngaahi momeniti ko iá, kuó u lava ʻeni ʻo maʻu ʻa e ʻamanaki lelei mo e fiefia ne u aʻusia ʻi heʻeku papitaisó.