Giunsa Nako Pagkahibalo nga ang Propeta Tinawag ug Giniyahan sa Dios
Nausab ang akong pagpamatuod sa buhing mga propeta sa adlaw nga usa ka Apostol mibisita sa Haiti.
Ang tagsulat nagpuyo sa Haiti.
Nagtubo sa Simbahan, ako kanunay naningkamut nga mahibalo sa mga kamatuoran ug sa paghupot sa akong pagpamatuod nga lig-on. Nahinumdom ako usa ka Huwebes sa buntag sa seminary, ang akong magtutudlo nagtudlo kanamo mahitungod sa mga propeta ug sa mga apostoles. Siya misulti og mga pulong nga tataw kaayo nako mahinumduman: “Si Presidente Thomas Spencer Monson [kinsa mao ang propeta niana nga panahon] usa ka propeta sa Dios, ug bisan kinsa nga adunay tinguha nga mahibalo kon tinuod ba kini makaampo sa kinasingkasing aron makaplagan ang tubag.” Ang iyang mga pulong sa tinuod nakatandog kanako.
Sa dihang mipauli ako nianang adlawa, ako miluhod ug mihangyo sa Langitnong Amahan nga pahibaloon ako kon si Presidente Monson gitawag ba Niya isip ang propeta. Nianang higayona, gibati nako ang dako ug tam-is nga hingpit nga kalipay nga mipuno kanako—usa ka butang nga dili masabut. Sukad nianang adlawa, ako nahibalo nga ang dagaang nga akong gibati niadtong higayuna gikan sa Dios, ug kini mipanghimatuod sa akong hugot nga pagtuo diha sa propeta. Ang akong gugma milambo ngadto sa punto nga ako nahibalo nga akong gikinahanglan ang paggiya sa propeta sa akong kinabuhi. Dili ako makahimo nga wala niini. Kanunay akong gusto nga maminaw ug mosunod sa iyang tanan nga mga pulong gikan sa kinatibuk-ang komperensya. Sa dihang akong nahibaloan ang pagkamatay ni Presidente Monson pipila ka tuig wala madugay, naguol ako og maayo, tungod kay ang akong gugma alang kaniya hilabihan ka lig-on.
Sa dihang si Presidente Russell M. Nelson gipaluyohan isip bag-ong propeta, naghunahuna ako kon sa unsang paagi kaha ako mobati og gugma alang kaniya sama sa akong gibati alang ni Presidente Monson! Apan ang Langitnong Amahan nahibalo sa tinguha sa akong kasingkasing, nga mao ang pagpalambo og dakong gugma alang sa matag usa sa mga tawo nga Iyang tawagon sa pagpangulo sa Iyang Simbahan. Ug ako nagtuo nga Siya gusto kanako nga magpadayon sa pagbaton og mga kasinatian nga motugot kanako sa pagbuhat niana.
Sa wala madugay human siya gitawag, si Presidente Nelson mipadala ni Elder Dale G. Renlund sa Korum sa Napulog Duha ka mga Apostoles nga makigkita sa mga kabatan-onan sa Haiti. Nalipay ako sa ideya sa pag-adto aron sa pakigkita kaniya. Gusto kong makasiguro kon siya tinuoray ba nga tinawag sa Dios.
Pagkaplag sa Kamatuoran
Human sa taas nga biyahe, ako miabut sa kaulohan sa akong nasud ug milingkod diha sa gambalay nga si Elder Renlund nakighimamat kanamo. Sa dihang siya misulod sa kwarto, mibati ako og inanay nga dagaang nga milukop sa akong dughan. Misugod siya sa iyang pakigpulong pinaagi sa pag-ingon nga si Presidente Russell M. Nelson mao kinsa ang mipadala kaniya sa pagbisita namo. Nianang higayuna ako nahibalo nga ang Dios nasayud nga gikinahanglan nato nga mobati sa gugma ug suporta sa bag-ong propeta, ug Siya mitugot kanato nga makabaton niana nga oportunidad.
Sa dihang si Elder Renlund mihangyo og usa ka boluntaryo sa pagbasa sa pasiuna sa Basahon ni Mormon ngadto sa grupo, akong gibati ang Espiritu nga kusog kaayo—mibarug ako nga wala gani makaamgo kon unsa ang akong gibuhat. Misaka ako ngadto sa entablado ug mibarug sikit sa Apostol sa pagbasa. Ang akong kasingkasing diha-diha dayon misugod pagpitik og kusog, ug ako dili gani makalitok sa mga pulong sa kalig-on sa Espiritu nga akong gibati. Kini sama nga ang presensya sa Dios diha sa kwarto, ug kini usa ka talagsaong pagbati nga sination. Nianang higayona, ang akong tanan nga mga pangutana ug pagduha-duha nawagtang. Nasayud ako nga si Elder Renlund usa gayud ka Apostol nga tinawag sa Dios. Mibati ako og dakong gugma alang kaniya—ug alang sa propeta kinsa mipadala kaniya aron sa pakigpulong kanamo.
Ang Langitnong Amahan nahigugma kanato pag-ayo nga Siya nagpakita sa iyang Kaugalingon ug sa Iyang paggiya pinaagi sa Iyang talagsaong mga lider. Ako mosaksi nga ang mga propeta ug mga apostoles tinawag sa Dios, nga si Presidente Nelson nagsunod sa mga rekomendasyon ug pagpadayag sa Dios, ug nga siya kanunay nga mogiya kanato sa hustong dalan. Sukad ni Joseph Smith, ang buhat sa pagpahiuli sa ebanghelyo gisugdan, ug kana nga buhat sa gihapon nagpadayon karon. Ug samtang atong gibuhat ang atong labing maayo sa pagsunod sa tambag sa atong mga propeta ug sa pagpakigbahin sa kamatuoran ngadto sa uban, kita usab nag-apil sa nagpadayon nga Pagpahiuli.