Ang Ginoo Nangulo sa Iyang Simbahan pinaagi sa mga Propeta ug mga Apostoles
Ni Presidente Dallin H. Oaks
Unang Magtatambag sa Unang Kapangulohan
Ang buhat sa Ginoo nagkinahanglan og usa ka organisasyon nga pangulohan sa Ginoo pinaagi sa mga lider nga Iyang pinili ug hatagan og awtoridad ug kinsa Iyang idumala sa pagpatuman sa Iyang mga katuyoan. Ang kasaysayan sa kasulatan nagpakita nga ang maong mga lider usa ka propeta o mga propeta ug mga apostoles. Mao kini ang sundanan atol sa mga katuigan sa nakigsaad nga Israel ug sa tunga-tungang kapanahunan sa gipahiuling Simbahan ni Jesukristo.
Gipangulohan sa Ginoo ang Iyang Katawhan pinaagi sa usa ka Organisasyon
Ang katuyoan sa Langitnong Amahan mao ang “pagpahinabo sa pagka-imortal ug sa kinabuhing dayon” sa Iyang mga anak nga lalaki ug babaye (Moises 1:39). Niini nga dispensasyon, Iya kining gibuhat pinaagi sa Ang Simbahan ni Jesukristo sa mga Santos sa Ulahing mga Adlaw, kansang katuyoan mao ang “pagtabang sa mga indibidwal ug pamilya nga mahimong kwalipikado alang sa kahimayaan.”1
“Ang talagsaon ug makaagning trio sa responsibilidad nga gipahimutang diha sa Simbahan,” mitudlo si Presidente Gordon B. Hinckley (1910–2008), mao “ang, una, pagsangyaw sa ebanghelyo ni Jesukristo sa katawhan sa yuta; ikaduha, aron magamit kana nga ebanghelyo diha sa kinabuhi sa mga miyembro sa Simbahan; ug ikatulo, aron mapaabut pinaagi sa mga buhat para sa mga patay ang mga panalangin niini ngadto sa mga atua na sa pikas tabil.”2
Sa atong panahon daw daghan ang gusto og espiritwalidad o relihiyon apan nagtuo nga makabaton sila niini bisan walay bisan unsa nga relihiyusong organisasyon. Kadtong nagtuo nga sila makahimo niini bisan walay pormal nga organisasyon mibaliwala sa eksaktong rekord sa kasaysayan sa unsay giestablisar ni Ginoong Jesukristo aron masiguro ang pagpadayon ug kaepektibo sa Iyang ebanghelyo ug mga pagtulun-an. Sigun sa gipahinumdom kanato ni Elder D. Todd Christofferson sa Korum sa Napulog Duha ka mga Apostoles sa usa ka nabantog nga pakigpulong sa kinatibuk-ang komperensya lima ka tuig ang milabay, “Diha sa tunga-tunga sa panahon, si Jesus miorganisar sa Iyang buhat sa ingon nga paagi nga ang ebanghelyo matukod og dungan sa daghang mga nasud ug sa nagkalain-laing katawhan.”3 Kana nga organisasyon naglakip sa mga Apostoles ug ubang mga opisyal nga gihulagway diha sa Bag-ong Tugon.
Ngano nga ang usa ka organisasyon gikinahanglan man aron matuman ang mga katuyoan sa Ginoo? Bisan og ang atong Manluluwas nahigugma ug motabang kanato sa tinagsa-tagsa, sa pagtuman sa Iyang mga katuyoan alang sa tibuok pundok sa mga anak sa Dios—ilabi na sa Iyang katawhan sa pakigsaad—molihok Siya pinaagi sa usa ka organisasyon nga pangulohan sa mga propeta ug mga apostoles.
Pinaagi lamang sa usa ka organisasyon nga ang tinagsa-tagsa ka miyembro nga gitawag ni Apostol Pablo og “ang lawas ni Kristo” (1 Mga Taga-Corinto 12:27) makadawat og mga oportunidad nga ilang gikinahanglan aron makab-ot ang espirituhanong paglambo nga maoy tuyo sa ilang pagkalalang. Ug ang organisasyon lamang nga adunay lain-laing mga talento ug managlahing paningkamot ang gikinahanglan aron matuman ang buhat sa Ginoo.
Ang mga butang nga matuman lamang pinaagi sa organisadong mga pundok sa magtutuo naglakip sa dagkong paningkamot sa pagtabang sa mga kabus, sa pagsangyaw sa ebanghelyo sa tibuok kalibutan, ug sa pagtukod ug pagmentinar sa mga templo. Si Propeta Joseph Smith miingon nga ang katuyoan sa Dios sa pagpundok sa Iyang katawhan sa bisan unsa nga panahon mao ang “pagtukod ngadto sa Ginoo og usa ka balay diin Siya [maka]padayag … sa mga ordinansa sa Iyang balay ug himaya sa Iyang gingharian, ug sa pagtudlo sa katawhan sa paagi sa kaluwasan.”4
Ang usa ka organisasyon gikinahanglan usab aron makab-ot ang sugo sa Ginoo sa “paghiusa; ug kon kamo dili magkahiusa kamo dili akò”(Doktrina ug mga Pakigsaad 38: 27). Si Presidente Henry B. Eyring, sa Unang Kapangulohan mitudlo nga dili nato makab-ot ang paghiusa—kana nga panaghiusa—kon magtinagsa-tagsa. “Kita kinahanglan nga motinguha niini ug mopasarang niini uban sa lain. Mao nga dili ikatingala,” siya nakabantay, “nga ang Dios miawhag kanato sa pagpundok aron Siya makapanalangin kanato.”5
Ang indibidwal nga mga tumutuo kinahanglan usab nga makasinati og usa ka relihiyon pinaagi sa usa ka relihiyusong organisasyon tungod kay pinaagi lamang niini kita mabadlong sa awtorisadong paagi o mapanton tungod sa sala ug kasaypanan. Kana nga pagpanton mahinungdanon alang sa atong espirituhanong paglambo (tan-awa sa Doktrina ug mga Pakigsaad 136: 31; 101: 4–5; tan-awa usab sa Mosiah 23:21–22).
Si Elder Neal A. Maxwell (1926–2004) mihatag og laing rason sa pag-organisar og relihiyoso o espirituhanong mga tawo: “tungod kay ang sulagma, tinagsatagsang kamaayo dili paigo nga ikabatok sa dautan.”6
Si Kristo nga Nag-orden sa Napulog Duha ka mga Apostoles, ni Harry Anderson
Ang Gipahiuli nga Simbahan ni Jesukristo Gidumala sa mga Propeta ug mga Apostoles
Ang organisasyon sa Simbahan ni Jesukristo kinahanglang adunay mga lider nga Iyang pinili ug hinatagan sa gahum ug awtoridad sa pagpahayag sa Iyang kabubut-on ngadto sa katawhan.
“Kamo wala magpili kanako,” ang Manluluwas mitudlo, “apan ako mipili kaninyo, ug nagtudlo kaninyo, nga kamo moadto ug modala og bunga” (Juan 15:16). Tin-aw diha sa Biblia kon si kinsa ang mopili og mga propeta ug mga apostoles. Diha sa Daang Tugon maklaro kini diha sa mga tawag ni Moises ug ni Samuel, ug diha sa Bag-ong Tugon makita kini sa mga pagtawag sa Napulog duha Ka mga Apostoles ug ni Apostol Pablo (tan-awa sa Exodo 3; 1 Samuel 3; Marcos 3; Mga Buhat 9). Kini nga mga lider wala mobulontaryo, ug dili pinili sa mga tumutuo.
Sa Biblia makita usab nga ang mga relihiyusong mga lider siguradong adunay awtoridad sa pagkapari [priesthood] sa Dios, nga gitugyan pinaagi sa usa ka naggunit na niana nga awtoridad. Ang mga paghulagway sa Biblia sa mga tawag ug paghatag og awtoridad kang Aaron, sa mga sakop sa Napulog Duha ka mga Apostoles, ug sa Seventy naghulagway niini nga baruganan (tan-awa sa Exodo 28: 1–4; Marcos 3:14–15; Lucas 10:1, 17). Ang awtoridad sa pagkapari wala maggikan sa pagbasa sa mga kasulatan o gikan sa usa ka tinguha nga moserbisyo. Ug ang pag-orden nga magtugyan sa awtoridad sa pagkapari maggikan sa mga pangulo sa Simbahan, ug kini ipahibalo sa publiko (tan-awa sa Doktrina ug mga Pakigsaad 42: 11).
Diha sa Daang Tugon, ang mga espirituhanong mga lider mao ang mga propeta. Gihulagway sila pinaagi sa tulo ka managlahing tahas. Ang uban mga tawong balaan nga mohimo og propetikanhong buluhaton alang sa ilang mga kaliwatan, sama ni Abraham. Ang uban mga lider nga migamit og politikal ingon man sa gahum sa pagkapari, sama ni Moises ug ni Josue. Kasagaran nagpahigayon sa ilang propetikanhong tahas nga dili magsalig sa patriyarkal o politikanhong kahimtang, sama ni Samuel ug ni Isaias. Ang Basahon ni Mormon nabutyag sa samang tulo ka posisyon sa mga propeta, sama ni Lehi (patriyarka), Haring Benjamin (politikal nga lider) ug ni Alma nga Batan-on (human siya mibiya sa iyang posisyon isip labaw nga maghuhukom) (tan-awa sa 1 Nephi 1–2; Mosiah 1–6; Alma 4–5). Hinoon, tin-aw nga ang tanang propeta nga nag-una ni Jesukristo nanawagan sa katawhan sa paghinulsol, ug, labaw sa tanan, nanagna sila sa pag-anhi sa Mesiyas.7
Ang katungdanan sa Apostol sa una nahibaloan diha sa Bag-ong Tugon, dihang ang Manluluwas mitawag sa mga Apostoles giorganisar Niya ang Iyang pagpangalagad sa pagsangyaw, pagpamunyag, ug pagpang-ayo. Si Apostol Pablo misulat nga ang Simbahan ni Jesukristo “gitukod ibabaw sa patukuranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang” (Mga Taga-Efeso 2:20). Si Jesus mitawag usab og mga Seventy ug mipadala kanila sa pagpangalagad (tan-awa sa Lucas 10:1, 17), ug Iyang gitugot ang pagtawag og uban pang mga opisyal, sama sa mga pastor ug mga magtutudlo (tan-awa sa Mga Taga-Efeso 4:11).
Ang mahinungdanong buluhaton sa mga Apostol sa Simbahan nga giestablisar ni Jesus mao ang paghupot sa mga yawe sa pagkapari. Sa dihang gisaaran sa Manluluwas si Apostol Pedro “sa mga yawe sa gingharian sa langit”, gihulagway Niya kini isip gahum nga “bisan unsay imong pagabugkuson dinhi sa yuta pagabugkuson didto sa langit” (Mateo 16:19). Sa laing pagkasulti, ang mga yawe nagsiguro sa langitnong epekto sa awtorisadong mga buhat sa awtorisadong pagkapari dinhi sa yuta. Ang mga apostoles nga naghupot sa mga yawe sa pagkapari adunay katungod ug responsibilidad sa pagdumala ug pagpangulo sa mga kalihokan sa pagkapari sa Dios ug sa Simbahan ni Jesukristo dinhi sa yuta.8 Naglakip kini sa pagpahigayon ug pagdumala sa importanting mga ordinansa sa ebanghelyo.
Isip kabahin sa ilang mga responsibilidad, ang mga propeta ug mga apostoles adunay mapanagnaong katungdanan ug gasa sa pagtudlo sa mga kamatuoran sa ebanghelyo ug sa pagpamatuod isip “espesyal nga mga saksi sa ngalan ni Kristo sa tibuok kalibutan” (Doktrina ug mga Pakigsaad 107: 23). Sila ang moila sa kamatuoran ug kasaypanan ug awtorisadong moingon nga, “Sa ingon niana miingon ang Ginoo.” Si Presidente J. Reuben Clark Jr. (1871–1961), Unang Magtatambag sa Unang Kapangulohan, namahayag nga ang mga Apostoles “adunay katungod, gahum ug awtoridad sa pagpahayag sa hunahuna ug kabubut-on sa Dios ngadto sa iyang katawhan, ubos sa tanang gahum ug awtoridad sa Presidente sa Simbahan.”9
Isip mga sulugoon sa Amahan ug sa Anak, ang mga apostoles ug mga propeta motudlo ug motambag sigun sa sugo sa Espiritu Santo, nga walay laing tinguha kon dili ang pagsulti unsay tinuod ug sa pag-awhag sa tanan sa pagsubay sa dalan ngadto sa mga panalangin sa Dios, lakip sa Iyang katapusang destinasyon alang sa Iyang tanan nga anak: mahangturong kinabuhi, “ang labing mahinungdanon sa tanan nga mga gasa sa Dios” (Doktrina ug mga Pakigsaad 14:7). Ang ilang mga tingog kasaligan.
Si Presidente M. Russell Ballard, Akting nga Presidente sa Korum sa Napulog Duha ka mga Apostoles, miingon: “Sa Kalibutan karon, diin 24 ka oras sa usa ka adlaw ang mga komentarista sa telebisyon ug sa radyo mobuga og nagkasumpaking mga opinyon, diin ang mga ahente nakigkompetensya alang sa tanan gikan sa imong kwarta para sa imong pagpili, adunay usa ka klaro, dili hugaw, walay pagdapig nga tingog nga inyo kanunayng kasandigan. Ug mao kana ang tingog sa buhing propeta ug mga apostoles. Ang ilang bugtong nga motibo mao ang “walay katapusang kaayohan sa inyong mga kalag’ (2 Ne. 2:30).”10
Ang pag-akses sa mga pagtulun-an sa mga apostoles ug mga propeta usa ka panalangin ug usa ka talagsaong responsibilidad. Ang panalangin maoy usa ka inandam nga pag-akses sa unsay gusto sa Ginoo nga atong madungog. Ang responsibilidad mao nga kini nga akses sa mga pagtulun-an sa Ginoo maghimo natong may tulubagon sa pagpaminaw ug pagpatalinghug niana nga mga pagtulun-an. Subo lang, kay ang ubang tumutuo pakyas niini nga responsibilidad. Dili ikatingala, daghan dinhi sa kalibutan mosalikway sa kamatuoran nga ang Dios mihatag diha sa mga apostoles ug mga propeta sa awtoridad ug inspirasyon aron sa pagpamulong sa Iyang ngalan. Gani daghan ang mosalikway sa mga propeta ug mga apostoles tungod kay gilimod nila ang pagkaadunay Dios o sa pagkaadunay hingpit nga pagkaensakto ug sayop.
Maayo na lang, daghan ang mopili nga motuo ug mosunod sa mga pagtulun-an sa mga propeta. Madawat nila ang gisaad nga mga panalangin. Si Presidente Russell M. Nelson mitudlo niini: “Ang dugay nang naestablisar sa Dios nga sundanan sa pagtudlo sa Iyang mga anak pinaagi sa mga propeta nagsiguro kanato nga Siya mopanalangin niadtong nanginahanglan og propetikanhong tambag.”11
Paghulagway kang Joseph ug sa mga Apostoles pinaagi ni Dan Burr
Ang mga Propeta ug mga Apostoles Molihok pinaagi sa mga Konseho
Ang Ginoo ang nangulo sa Iyang Simbahan pinaagi sa mga propeta (plural) ug mga apostoles (plural), samtang sila naglihok pinaagi sa mga konseho. Anaay daghan nga mga paghulagway niini.
Ang Ginoo motawag og usa ka propeta aron masugdan ang bag-ong dispensasyon. Dayon, kon kana nga bag-ong pagpahiuli molambo ug mohingkod, ang mga doktrina ug mga polisiya alang sa grupo ipadayag ug itudlo pinaagi sa usa ka organisasyon nga pangulohan sa mga apostoles ug mga propeta. Sa ingon niana, samtang ang gipahiuli nga Simbahan mitubo ug mihingkod niining katapusang dispensasyon, ang Ginoo mipadayag nga ang pinakaimportante nga buhat ug labing lisud nga mga sitwasyon kinahanglan hukman pinaagi sa usa ka konseho sa Unang Kapangulohan ug sa Napulog Duha ka mga Apostoles (tan-awa sa Doktrina ug mga Pakigsaad 107:78–79). Diha, ang matag desisyon “kinahanglan gayud nga pinaagi sa nagkauyon nga tingog sa mao gihapon” (Doktrina ug mga Pakigsaad 107: 27). Kon dili, sila dili “angay sa sama nga mga panalangin sa mga hukom sa usa ka korum sa tulo ka mga presidente sama sa karaan” (Doktrina ug mga Pakigsaad 107:29).
Kining tanan nagpakita sa direksyon sa Ginoo nga ang Iyang Simbahan kinahanglan idumala sa mga konseho sa mga apostoles ug mga propeta. Kini mopanalipod ug mopasiugda og panaghiusa nga gikinahanglan sa Simbahan sa Ginoo.
“Ang Ginoo sa pagsugod niini nga buhat mipadayag nga kinahanglang adunay tulo ka mga high priest nga mangulo sa Halangdon nga Pagkapari sa iyang Simbahan ug sa tibuok Simbahan,” Si Presidente Joseph F. Smith (1838–1918) mitudlo sa kinatibuk-ang komperensya diin siya gipaluyohan isip Presidente sa Simbahan.12 Gipamatud-an niya ang kaimportante sa tulo ka halangdong mga pari [high priest] sa kapangulohan pinaagi sa pagpamahayag nga “sayop nga usa ra ka tawo ang mogamit sa tanang awtoridad ug gahum sa kapangulohan sa Simbahan ni Jesukristo sa mga Santos sa Ulahing mga Adlaw.”13 Siya midugang, “Dili gayud tuyo sa Ginoo nga usa ka tawo ang aduna sa tanan nga gahum, ug tungod niana iyang gibutang diha sa iyang Simbahan ang, mga presidente, mga apostoles, high priest, mga seventy, [ubp.].”14
Ang pakisayran [reference] ngadto sa plural, mga propeta ug mga apostoles, mao usab ang mahinungdanon niining pamilyar nga mga pagtulun-an ni Presidente Joseph Fielding Smith (1876–1972): “adunay usa ka butang nga kinahanglang klaro kaayo sa atong mga hunahuna. Ang Presidente sa Simbahan, ang Unang Kapangulohan, ang hiniusang tingog sa Unang Kapangulohan ug ang Napulog Duha dili gayud mopahisalaag sa mga Santos o motambag sa mga tawo nga sukwahi sa hunahuna ug kabubut-on sa Ginoo.”15
Aron mahimong opisyal nga doktrina sa Simbahan ni Jesukristo, ang tinagsa nga mga pagtulun-an sa mga apostoles ug bisan sa mga propeta kinahanglan nga pahimatud-an pinaagi sa proseso sa pag-aprubar gikan sa ubang mga apostoles ug mga propeta. Gihulagway kini sa Biblia diha sa pag-aprubar nga aksyon sa mga apostoles dihang si Pedro mitaho sa iyang pagpadayag nga isangyaw ang ebanghelyo ngadto sa mga hentil (tan-awa sa Mga Buhat 11:1, 18). Sa samang paagi, dihang ang panaglalis sa mga panginahanglan sa sirkunsisyon gidala ngadto sa mga Apostoles, gipahinumduman sila ni Pedro sa kamahinungdanon sa pagpadayag nga iyang nadawat, ug ang konseho dayon miaprubar ug mihusay sa panaglalis pinaagi sa pagmatuod nga sulat ngadto sa Simbahan (tan-awa sa Mga Buhat 15).
Sa samang paagi, dinhi sa gipahiuli nga Simbahan, ang doktrina dili ikonsiderar nga opisyal hangtud nga madawat kini sa mga miyembro sa Simbahan pinaagi sa balaod nga inuyunan sa kadaghanan (tan-awa sa Doktrina ug mga Pakigsaad 26:2, 28:13). Kana nga baruganan gipadayag niadtong 1830 ug gigamit sukad nianang panahona.16 Kini nga buhat, nga wala sunda sa mga simbahan nga diha na sa panahon nga atong gitawag og Apostasiya, nanalipod sa kamatuoran sa ebanghelyo gikan sa pag-usab o impluwensya sa pribadong mga ideya o mga tinagsa-tagsang mga opinyon.
Sa katapusan, ang panagkahiusa sa doktrina nga gikinahanglan tali sa managlahing mga lider gipreserbar pinaagi sa dugay na nga mga pangutana nga gitumong ngadto sa tinagsa-tagsang mga Apostoles o sa ubang mga awtoridad mahitungod sa doktrina o polisiya nga dili klaro ang pagkapasabut diha sa mga kasulatan o sa mga handbook, nagkinahanglan nga iagi sa Unang Kapangulohan (tan-awa sa Doktrina ug mga Pakigsaad 124: 126).17
Mga Propeta ug mga Apostoles mga Saksi ni Jesukristo
Atol sa iyang pangalagad, si Propeta Joseph Smith mitudlo niini: “Ingon sa pagdumala sa Dios ni Abraham, Isaac ug Jacob isip mga pamilya, ug ang mga anak sa Israel isip usa ka nasud, ingon man usab kita, isip usa ka Simbahan, kinahanglan gayud nga ubos sa Iyang paggiya kon kita gipalambo, gipatunhay ug gipaluyohan.”18
Kini nga artikulo naghulagway kon sa unsang paagi gihimo sa Ginoo ang Iyang buhat latas sa kapanahunan ug sa unsang paagi kini nga sundanan ug mga pamaagi nagpadayon sa atong panahon. Sigun sa gitudlo ni Apostol Pedro, “tanan nga propeta” mihatag og “pagsaksi” kang Kristo (Mga Buhat 10:43). Sa atong panahon, ang Ginoo padayon nga mihimo sa Iyang buhat pinaagi sa mga propeta ug mga apostoles kinsa awtorisadong molihok sa Iyang ngalan sa paghimo sa Iyang buhat sa pagpahinabo sa kinabuhing dayon sa tawo.