Bag-ong mga Miyembro: Kini ang Dapit Diin Kamo Nahisakop
Naninguha ka ba nga kab-uton ang sayop nga mga ekspektasyon?
Kon makatagbo ka og usa ka tawo, unsaon nimo pagpaila ang imong kaugalingon? Unsang mga butanga ang importante sa imong pagkatawo? Ako si Brian. Nahisakop ako sa Ang Simbahan ni Jesukristo sa mga Santos sa Ulahing mga Adlaw. Apan wala ko kanunay mobati nga nahisakop.
Mipasakop ko sa Simbahan pagka-first year nako sa kolehiyo. Daw pipila lang ka mga gutlo human sa akong bunyag, ang maayo’g-panglantaw nga mga miyembro nagsugod sa pagpangutana, “Magmisyon ka ba?” Ang pagmisyon butang nga wala pa kaayo sa akong hunahuna. Apan akong gibati nga oo ang gilauman nilang tubag.
Ako Ba Igo Na?
Mga kapin lang sa usa ka tuig human ko mipasakop sa Simbahan, nadawat nako ang akong call nga moserbisyo sa England ug miabut didto nga mahinamon kaayong motudlo. Apan pipila lamang ka adlaw, akong namatikdan nga grabe ang akong kamingaw. Dili ako andam nga moserbisyo og full-time nga misyon.
Samtang naghisgot sa akong mga pagbati uban sa presidente sa misyon, gibati niya nga mokanta sa, “Kalag Ko May Kasanag Karon” (Mga Himno, nu. 110) diha sa telepono. Mibati ko og medyo lahi, apan mihatag kini kanako og pagbati sa kahayag ug kainit.
Ug gani human sa usa ka semana nagsakay na ko sa eroplano pauli. Nakigbisog ako sa akong mga pagbati sa tibuok biyahe. Napuno ko sa kabalaka bahin sa kon unsay hunahuna sa uban mahitungod sa akong mga pagpili. Napikal ko sa akong kaugalingon nga wala ko makaserbisyo og eksaktong duha ka tuig—human nga akong gibiyaan ang akong mga higala ug pamilya ug gihunong una ang pag-eskwela aron makaserbisyo og misyon. Nag-antus ko og labihang kasakit, ug karon daw gitalikdan ako sa Langitnong Amahan sa panahon sa akong panginahanglan. Naghunahuna ko kon nahisakop pa ba gayud ako tungod kay wala nako maabut ang matag ekpektasyon.
Duol kon Unsa Kamo
Usa ka semana human ko nauli, ang pamilya sa suod nakong higala midapit nako sa ilang panimalay sa pagtan-aw sa sesyon sa kinatibuk-ang komperensya. Kadto ang katapusang butang nga gusto nakong buhaton. Apan miadto ko.
Sa tunga-tunga sa sesyon, si Elder Jeffrey R. Holland miadto sa podyum ug miingon, “Kalag ko may kasanag karon”—ang samang butang nga wala dahumang kantahon sa akong presidente sa misyon mga duha ka semana ang milabay. Ang Espiritu mihunghong, “Kini ang Simbahan diin ikaw nahisakop.” Paglapas sa misunod nga 15 minutos, ang akong tibuok panglantaw nausab.
Dali ra ang mobati nga kita walay labut kon kita mobati nga daw wala nato makab-ot ang ekspektasyon sa uban. Apan kitang tanan makasala (tan-awa sa Mga Taga-Roma 3:23). Ug oo, miingon ang Dios nga aduna pay dapit alang sa matag usa kanato sa Iyang Simbahan (tan-awa sa 1 Mga Taga-Corinto 12:20–23).
Si Elder Holland mitudlo atol niana nga pakigpulong sa komperensya: “‘Duol kon unsa kamo,’ ang mahigugmaong Amahan miingon sa matag usa kanato. Apan midugang Siya, ‘Ayaw pagplano nga magpabilin nga mao ra gihapon kamo.’” (“Mga Awit nga Naawit ug Wala Maawit,” Liahona, Mayo 2017, 51). Gusto sa Dios nga kita ania dinhi bisan kinsa man kita o unsay atong nahimo tungod kay kini nagtugot nga Siya makatabang nato nga mausab kon unsay atong maabut (tan-awa sa 3 Nephi 18:22).
Sa wala pa ko makadungog sa pakigpulong ni Elder Holland, naghunahuna ko nga ang pagkahisakop nagpasabut sa pagkab-ot sa tanang ekspektasyon. Karon ako mas nakasabut nga ang Simbahan sa Ginoo dili alang niadtong kinsa mga hingpit na apan sa pagtabang nga mahingpit kadtong dili hingpit. Ug kon maningkamot ka sa pagsunod Kaniya, ikaw nahisakop sa Iyang Simbahan.