Berglind Guðnason
Árnessýsla, Iceland
Berglind (maing) ma tarina Elín (atai). Ngke Berglind e mena inanon aorakin te iango ae moan te korakora, e namakina te bwarannano. Man tibwauakin ana kangaanga nakoia ana utu ao raoraona, e kunea te bwainnaoraki n tamnei ao n iango rinanon bwaai ake e katauraoi Tamara are i Karawa.
Mindy Selu, Tia Rawetamnei
I bon rinanon aorakin te iango ma ngke 13 au ririki. N teuana te tai, e rangi ni korakora n te aro are I kataia n anaa oin maiu. I namakina te bwarannano ae korakora n te tai anne. N au iango, “N na bon aki kona ni kukurei. Akea te bwai ae na reke irou.”
Iai te tai are I iangoia iai bwa kitanan te Ekaretia bon kaekan au kangaanga ibukina bwa I namakina te bwarannano ni bwai ni kabane. E bebete karaoan baika ko riai n aki karaoi i Iceland. E uarereke te Ekaretia ikai. Bon ti ngai ma tariu ma mwaneu n ara kiraati n te Ekaretia n au tai n rikirake. I namakina te tionako ao n te tai anne, I namakina te aki kan taromauri.
Angina aomata i Iceland a ribaa te aro. Aomata a moantaai n tooma te manging man uarerekeia. I reketaati n anne, ao I aki tataromauri tabeua te tai i nanon maiu. I aki kakatonga n anne, ma bon mwakoron karakinau ao I reiakinaki mai iai. I kamatebwaia ana marooro Unimwane Jeffrey R. Holland ao e I tangira ana taeka are: “Taai ake ngkoa e riai te reirei mai iai ma e aki riai te maiu i nanona . … N te tai are ti reiakina are ti riai n reiakinna … , ngkanne ti waakinako, ti uringnga bwa te onimaki e kaineta taai aika a na roko n tainako.”1
Teuana te bong ngke I bon rangi n rootaki, I wareka au kakabwaia mairoun te tamanuea. Ngke I warekia, I noria bwa e na bon nakoraoi taai aika a na roko. Iai ana babaire te Atua ibukiu, ao E bon tangirai. Te nako n taromauri, anaakin te toa, warekan koroboki aika tabu, ao te tataro e uota te oota ma te kukurei ae bati nakon maiu. I noria imwina bwa, “I buokaki ni baikai.” Ikanne are I a ataia iai bwa n tainako I kainnanoa te euangkerio inanon maiu. Imwin baike I rinanoi, I ataia bwa e kamaiuaki maiu n te euangkerio, ao I rangi ni kakatonga n anne.
Marooroakinan aorakin te iango ma te utu ao rao e rangi n ibuobuoki. E kairaki riki nakon ibuobuoki aika a bati. I aki kan anai bwainaoraki ke n nakon te tia ibuobuoki. I aki toki n tuangai i bon irou, “Iai Atuau.” Ma te Atua e katauraoi bwai n mwakuri aika a mwaiti, n aron te bwainaoraki ma te marooro ma te tia rabakau, ibukira bwa ti na kabonganai irarikin ibuobuoki n te tamnei.
Ngke I moana kabatian warekan koroboki aika tabu ni katoa bong ao n rikirake ni kaania te Atua rinanon te tataro, I karekei kakabwaia aika bati ao kaotioti bwa tabeu bon buokaia tabeman. I namakinaa bwa e mwaiti iroura ae kaitaraa kangaangan marurungin te iango ma ti kataia ni karaba. Aorakin au iango ao au kangaanga a reiakinai bwa e raoiroi riki te marooro ao te reitaki ma tabeman. Temanna raoraou e kaota nakoiu ana kangaanga ma aorakin te iango. Ti marooroakinna ao ti bon oota i bon imarenara.
Tiaki n tainako ae ti nora aia kangaanga tabeman, ma n tabetai I nakonako ao n taraia tabeman ao n ataia bwa te Atua e kinaira ngaira n tatabemaniira. E tangiriira ao e atai raoi baike ti rinanoi. Ao ti kona n ibuobuoki imarenara.
Rinanon au kangaanga ma aorakin te iango, I reiakinna n titiraki, “Tera ae I kona n reiakinna man te kakatai aei?” ao tiaki “Bukin tera iai irou te kakatai aei” I tangira Ita 12:27, ike e taekinaki bwa e na kakorakorai mamaarara ngkana ti onimakina Iesu Kristo. Aio n tainako bon te karaunano nakoiu.
Ti bane n rineia bwa ti na roko nakon te aonaba. Ti ataia bwa ti na rinanon te maraki rinanon kakatai. Ao ni koauana anne ae e katamaroa te maiu. Ibukina bwa ti ataia bwa a na kaoti baika a raoiroi. Ti ataia bwa ngkana ti iriira te Tia Kamaiu n taai n kangaanga, ti kona n karekea te maiu ae akea tokina ao kakabwaia ni kabane ake a tataningaira.
I a tia n nora raoi aron bitakiu man aorakin au iango. Ana Mwakuri ni Kamaiu te Tia Kamaiu e bon koaua, e a tia n bitaki nanou, ao I kakorakoraaki. I namakinna bwa I a bitaki nakon are mai mwaina. A nora aei aomata ao a taku, “Ko a bitaki.” Temanna te ataeinnaine man te reirei e taku naba, “I nora te kaokoro ao te oota iroum.” E kamanga ibukina bwa tiaki ngaia kaain te Ekaretia, ao ti bon tuai mamarooro mai mwaina.
Ngke I mena inanon aorakin te iango ae rangi ni korakora, aomata a tutuangai, “Ko na bon marurung.” I rangi n ebu n ongoongo aei ma, e ngae ngke e katuara, e koaua.
Ma e riai n iai nanom ni kan marurung. I a tia n reiakinaa bwa ko aki riai n kantaninga te marurung ngkana akea te bwai ae ko karaoia. E riai n iai nanom ni kan kukurei ao ni kakoaua bwa iai korakoram ao kabwaiam ibukin taai aika a na roko. E kakaawaki uringana bwa e mwaiti ae tangiriko, n ikotaki ma Tamam are i Karawa. A bane n tauraoi ni buokiko.
Akea n au iango ae N na rangi ni kukurei n aron ae ngkai. Tabeua boong a bon matoatoa, ma man bwai n mwakuri ake e anganai Tamara are i Karawa, I kona uotau. Ngkai ngkana I namakinna N na okira aorakin te iango, I tuangai i bon irou bwa I tangiraki, iai aomata ae I kona ni marooro ma ngaiia, ao N na bon marurung.
Kaitaraan aorakin te iango e buoka Berglind n ataia bwa ti na kanga n ibuobuoki i marenara rinanon kakaewenako. “Te Atua e kinaira n tatabemaniira nako, E tangiriira, ao E ataia raoi bwa tera ae ti bane n rinanona. Ao ti kona n ibuobuoki imarenara.”
Berglind e a tia n nora te bitaki irouna rinanon kakaewenakoana. “Ana Mwakuri ni Kamaiu te Tia Kamaiu e bon koaua,” e taekinna. “E a tia ni bitaki nanou, ao I a korakora riki. I namakinna bwa I a bitaki nakon are mai mwaina.”
“Ngke I moana kabatian warekan koroboki aika tabu ni katoa bong” e taekinna Berglind, “I karekei kakabwaia aika bati ao kaotioti bwa tabeu bon buokaia tabeman. I tangira Ita 12:27, ike e taekinaki bwa e na kakorakorai mamaarara ngkana ti onimakina Iesu Kristo. Aio n tainako bon te karaunano nakoiu.”