Ko Taku Bwa Akea Te Kantaninga Ibukim Ngkai te Kairake n Ikawai Ngkoe? Iangoia Riki

Iroun Cezar Gervacio

Iangoakina bwa n te taina ao ko na kaira te Ekaretia e na kona ni kakamaku, ma a mwaiti kawai ae ko kona ni moana te kairiiri mang ngkai.

N te bong are imwaain Kauaokin Iesu Kristo, e na bon iai te “buaka, ao tanuani buaka.

“… Bwa e na teirake te botanaomata n ekanako te botanaomata, ao uean temanna n ekanako uean temanna; a na roko rongo, ao aoraki aika kamamate, ao mwaeiein te aba, n taabo aika mwaiti.

“Ao teuana riki, ibukina bwa e na korakora te buakaka, aia tangira aomata e na tabe ni mauna” (Iotebwa Timiti—Mataio 1:28–30).

Inanon ribuakon te mangaongao, antai ae e na ibuobuoki ni kairiia tarira ao mwanera, ake inanon ao itinanikun te nanai, n oki nakon Tamara are i Karawa?

Anne are ti a roko iai.

Tina Kangaa ni Kairiiri

Ti a tia ni weteaki bwa teuana te roro ae korakora irouia kairake n ikawai. E kabwarabwaraa arora Beretitenti Russell M. Nelson bwa “ngaira bon naake a onimakinaki raoi iroun te Atua ae a na kanakoaki nakon te aonaaba n tain te kabanea ni kakawaki ni bong n rongorongon te aonaaba aei” (“Stand as True Millennials,” Riaona, Okitobwa. 2016, 46).

Ngaia are, ti na kanga n roota aron konabwaira n riki bwa taan kairiiri aika korakora n ana Ekaretia te Uea? Noria, ngkana ko taratara nako, ko na bon bae n noria ae ko a tia n riki bwa te tia kairiiri ngkoe n te anga teuana ma teuana.

Ko kona n kairiiri n weteam n te Ekaretia. Ngkai te mitinare, ko kona n kaira waakin te marooro, bairea aron te waaki ni kakaiia ake a na reiakinaki, ke ko bukinaki bwa te zone ke te titita ae e kairiiri. Ko kona ni riki bwa te tia kairiiri inanon am utu ke ibuakoia raoraom. Ko kona ni kairiia am bakatibu nakon te kamaiuaki ae akea tokina rinanon te mwakuri n rongorongon te utu. Tao ko na bae n riki bwa te tia kairiiri n te tautaeka, ao ko kona n tainako ni kairiiri n te tabo ni mwakuri are ko rineia.

Ma aio te titiraki, ti na kangaa ni kairiiri? Te Tia Kamaiu e kairiiri man Bannana. E kairiiri ma “Nakomai, iriirai” tiaki “E tamaroa riki au kawai.” E beku, e reirei, e tangira, ao e tabeakiniia naake Irarikina. Iesu Kristo bon oin te banna ni katooto n tia kairiiri. Ao n riki bwa taan kairiiri aika korakora n te roro aei, ti konaa ni moana man ara kekeiaki n riki n ai aron te Tia Kamaiu ao man karaoan baika a uarereke aikai:

1. Tataro ibukiia naake a korakai, naake a kainnanoa te ibuobuoki, ke naake ko katabeaki ibukiia, ao ukeria bwa ko na ataia bwa ko na kanga ni buokiia. Tataro ibukiia n araia n tatabemaniia, n aron are e ibuobuoki iai te Tia Kamaiu “temana imwiin temana” (3 Nibwaai 11:15).

2. Ana te tai n ukeuke inanon koroboki aika tabu bon ibukin banna aika tamaroa iaon te tia kairiiri, ni kaineti riki mai iroun te Tia Kamaiu.

3. Tataro ibukin am uoote, titeiki, ao taan kairiiri ni kabuta n te Ekaretia. Tataro naba ibukiia taan kairiiri n te tautaeka, bwa a na karekea kairaia mai ieta ao ni mwakuri inanon tamnein te rau ao te boonano.

4. Kinaia naake a mena i rarikim. Kakaea te bwai are e mamate nanoia iai, aia utu, te bwai are a tangiria ni kamatebwaia, ao te bwai are a kani karaoia ae bwabwaka nanoia iai ni maiuia (taraa I-Ebeto 2:19).

5. Wareka am kakabwaia n tamanuea ao iangoia bwa ko na kanga ni riki bwa te kabanea n tamaroa .

Ngkana ti kabanea ara konaa ni kairiiri n te kokoaua, ti na riki bwa ana reirei ni koaua ao taan iriira Iesu Kristo ao n tau ibukin raraonakira iroun te Tamnei ae Raoiroi. Ngkana ti karaoi ao ni karinei berita aika tabu, ti a bon tauraoi ni karekei bwain otangara ake a bon tau ni katauraoira nakon te buaka ni kaitara te buakaka.

Ko Konaa ni Waakinna Ngkai

Ko na riki bwa te tia kairiiri ae aekakira ngkoe? Ke, n taekina are e taekina te Tia Kamaiu, “Aekan aomata [tia kairiiri] raa ngkami? E koaua ae I tuang ngkami, kam na riki n ai arou” (3 Nibwaai 27:27).

Ngkai tia uakaan ma Te Kauaoki, te Uea e na kainnanoia riki taan kairiiri aika a kokoaua ake a na irira Ana burabeti ao n tauraoi imwain te buaka aei. E kainnanoira. Tia bon mena ngkai n te ka 11 n aoa, ao a bati baika ti na karaoi. Ti kona ni moana katauraoakira n riki bwa taan kairiiri aika korakora inanon te roro aei ngkai. E bon tuai n rangi n oimwii moanakina ngkai! Ngkana iai baika ko kainnanoia ni marooroakina ma am bitiobi, e konaa ni buokiko n kawain te rairannano. Ngkana ko kainnanoa kairakim bwa ko na kanga ni karikirakeko, moana man karikirakean reitakim ma Tamam are i Karawa ao Iesu Kristo; A konaa ni kaotia nakoim bwa ko na nakea mai ikai. Ngkoe ao Ngai ti a weteaki ngkai ni karaoa ana mwakuri te Uea ao ni buoka ara burabeti ni kaira te bata ae Iteraera nakon te kamanoaki, ao ngkana ti keiaki ni karaoa ara kabanea n tamaroa, ti na bon tokanikai.

Casar Gervacio bon kaain Missouri, USA ma bon ngaia ataein te reirei i Brigham Young University–Hawaii. E a tia ni beku n ana mission i Biribin ao e tatangira te kuuka, mamataku n tamnei, ao ni karaoi ao ni katangii katangitang.

Tera ae I Kona ni Karaoia?

Ni kunei riki aanga tabeua n riki bwa te tia kairiiri ae tamaroa, rinanoa te “Attribute Activity” inanon mwakoro 6 n Preach My Gospel: A Guide to Missionary Service, rev. ed. (2018), 132. Iangoia bwa baikara bitaki ae ko kona ni karaoi ni maium bwa ko aonga n riki n ai aron Iesu Kirsto n anuam. Iangoia naba, ni kamatebwaia “Stand as True Millennials” iroun President Russell M. Nelson (Riaona, Okitobwa. 2016, 46–53). Tarai boto ni iango aika a okioki ao reirei ake a na buokiko n riki bwa te tia kairiiri ao te tia iriira Iesu ae tamaroa.

Ukoukori aika Mwaiti Riki

Ko kona ni karekei tabeua riki rongorongo iaon aron irakin te waaki n reitinakon Kaokan bwaai n aia iteraniba kairake n ikawai n Eberi 2020 Riaona.

Nora KnI n aia kanoa ni Katoa Wiiki, n aia mwakoro Kairake ni i Kawai n te Gospel Library app, ibukin kanoana aika a boou, ao ni kairaki mai ieta ibukiia kairake n ikawai n te wiiki koraki.

Ko kona ni kanakoa oin am karaki, ao am iango, ke am kaeka iaon liahona.ChurchofJesusChrist.org. A ingainga nanora ni kan ongora mai iroum!