Man Tii Bwaai Aika a Maiu Man te Iti: Kairake n Ikawai
Kunean te Kantaninga iaon te Tabo ae e Rangi n Rotaki
Ngke e rotaki Itare n te COVID-19, I kunea bukina ae N na kamatoa n taua te kantaninga.
E maeka te tia korokaraki i Catanzaro, Itare.
I tangira ana taeka Iesu are e tibwaia ma Ana reirei imwiin Mangautina: “E na mena te rau i roumi” (Ioane 20:19). E aki taraa ni kamiimi ae ara Tia Kamaiu e aki toki ni beritana te rau nakoia naake a Iriiria? Te taneiai ae e onoti are I rinanona tabeua te tai n nako e kauringai te koaua aei.
Nakonnano ao te Katukaki ni Kaokoroaki
N te tairiki teuana ngke I mataku n te TV, taan kanakoa te rongorongo a marooro iaon te COVID-19 ao korakorana n roota Itare, te tabo are I maeka iai. A marooro iaon rikiraken mwaitiia aomata ake a tia ni mate man te man aoraki aei ao rikiraken te mwaiti are e kakoauaki bwa iai irouia te man aoraki. E ngae ngke e rangi ni mwaiti, I bon aki rangi n tabeaianga iai n te tai anne. Ma inanon uoua te wiiki imwiina, e a rikirake ni korakora te kangaanga, ao raraomau naba e a rikirake.
I namakina te nanokawaki ao te maaku rinanon baikai ni kabane. I raraoma ngkana I a rotaki n te aoraki. Ao ai tibwa au moan tai inanon maiu, ae I a maaku n nako ni mwakuri. N na riai ni kabongana nangoan te bai ao te ubu ni katoa tai ngkana I otinako nako tinaniku. Teuana te wiiki imwiina, te aba ni kabutaa e a kainaki ao aomata n tatabemaniia nako a rinanon te tua ae matoa ibukin te kaokoroaki.
N te tai aei tia aki kariaiakaki bwa ti na otinako man mweengara ma ti ngkana ti na nako ni bobwai teuana ni katoa wiiki. Te tiku inanon auti e bon rangi ni kangaanga. A bane ni kainaki bootaki n te Ekaretia n te tai ae e uarereke ao ngkai e karika anne nanokawakiu, te bwai ae I rangi n rotaki iai bon kainakin tembora ibukina bwa I a tia ni baireia bwa N na ira kabaeakiia te utu are I reireiniia ngke I mena n te mition. I namakina te uruaki n nano ao te bwaranano ibukin te bwai ae e riki n te aonaaba.
E Ringaki Nanou n te Katangitang
N te ingabong teuana ngke I wareware ni koroboki aika tabu ao n ongora n te anene ae “Peace in Christ,” I tataro ao ni butiia Tamara are i Karawa, “N na kanga N reitinako ma te kantaninga inanon te tai ni kangaanga aei?”
Ao mai ikanne are I a moana n ongora raoi nakon taekan te anene:
E anga te rau
Ngke bua iroura.
E anga te korakora
Ngkana tiaki konaa.
E anga te katantan
N tain te buaka.
Ngke akea te rau iaonaba,
Iai te rau iroun Kristo.1
I namakina te Tamnei ae Raoiroi ni kakoaua nakoiu bwa a koaua taeka aikai. I taraa au taeki are arau ni mitinare iaona ao n ongo taeka aikai n au iango: “Romina, I tangiriko bwa ko na karekea te rau are ko anganiia tabeman ngke ko mena n am mition man tibwaan taekan te kantaninga. A na nakoraoi bwaai ni kabane. N na aki katikuko n ti ngkoe.”
Ngaia are ngkai, I tangiria n tibwa te rongorongo n taekan te kantaninga! E ngae ngke I a tia n namakina te maaku ae korakora ao te ingainga n nano n taai ni kangaanga n te aonaaba, I ataia ni koaua bwa iroun Iesu Kristo, bon iai te kantaninga! Rairaki Nakoina. Ongo Irouna. Mai Iriiria. Ti kona ni karekea te rau Irouna. Iai te mwaaka inanon Kakoauakina, ao ngkana ko karaoia, E na anganiko te korakora n nim nakon te kantaninga (taraa Ita 12:4).
Nimta te Kantaninga
N taetae iaon te kantaninga, Unimwaane Dieter F. Uchtdorf man te Kooram n Abotoro n te Tengaun ma Uoman e reirei, “Te kantaninga iroun te Atua, Ana nanoanga, ao Mwaakana e na anganiira te nano ae boou ma te ninikoria n tain kakaewenako aika kangaanga.”2 Te kakamaaku n taai n aron aikai, ti kona n rinea te ninikoria ao n onimaki n ana berita te Uea. Ngkana e a kangaanga te maiu aei, ti aki riai n tuanga Tamara are i Karawa bwa E na bita te bwai are ti mena inanona, ma, ti na butiia bwa E na bitii anuara. Ti kona n reirei ao n rikirake inanon baike a riki.
I ataia bwa te Atua e mena irarikira ao bwa E tangiria Natina—ngaira ake ti mena iaon te tabo are e rangi n rootaki n te buti n aoraki aei. I ataia bwa rinanon Kristo, a na bane n nakoraoi bwaai ni kabane. Ao I ataia bwa I kona n tainako ni katine nakon te rau are e roko man te kakoaua iroun Iesu Kristo. Ibukin Ana Mwakuri ni Kamaiu ae akea tokina, I aki riai ni kaitaraa te kangaanga n ti ngai.