Man Tii Bwaai Aika a Maiu Man te Iti: Kairake n Ikawai
Aua Reirei n te Ota ibukin Taai aika Roo
Ngkai te buti n aoraki e a otabwaninia te aonaaba n aron te nang ae roo, bon iai te kawai ni karekea rinin te oota.
E maeka te tia korokaraki i Voronzh Oblast, Russia.
N te taina n aki maan nako ngke I kanakonakoa au kamea, I nora te nang ae e maii roo ae e otanako otan taai rinanona. E kauringai n te buti n aoraki ae butanako ngkai. E ngae ngke inanon baika a riki a tara n roo ao ni kanakonano n aekakin te nang, ana tangira te Uea ibukira e korakora riki, n aiaron taai.
Te taeka ae ataaki n te taetae ni Imatang bon “Angiia naang iai mataniwina ae tirewa,” ae nanona bwa ni kabane kakaitara a kona n reireiniira bwaai aika bongana. Ngkai I iangoa aron baike a tia ni buokai n tiku n rau inanon tabeua te namakaina n nako ao baike a aki naba buokai, I a ataia bwa iai aua koaua aika a kakawaki are I namakina bwa a na reitinako ni buokai inanon maiu imwiin te kangaanga aei.
1. Iai te Kamanoaki ni Irirakin te Burabeti
Baike a nako man bwaai ni kaongoraa iaon tokin te aonaaba ao rongorongo aika kewe iaon angaa n aron katokan te maninaoraki e bon aki anganai te rau ibukin te maiu aei. E ngae ngke rongorongo aikai a karaoaki bwa a na buokiia aomata n tiku ni mano ao ni marurung, a anganai riki te namakin bwa n a maaku nakon ae I namakina mai imwaina. Te katooto, imwiin noran te kaonoua n rongorongo bwa e kangaa renganan te amwarake ae e tena ni kona ni kamatea te coronavirus, I uringa nakon nanou bwa tao e na rawata aekan bwai n rengarenga aikai ibuakon ara bwai ni kuka, irarikin iangoakin ae e nang bon toki maiu.
N teuana te maungatabu ni kabuta tabeua te ririki n nako, e kaoira Beretitenti Russell M. Nelson bwa ti na ira buakon te aki mamatam inanon 10 te bong ibukin bwaai ni kaongora ake a anga baika aki raraoi ma ni bubuaka nakon te iango.1 Ana taeka n reirei a tara n ae taeka ni kauring nakoiu, ngaia are I a kanakoi uoua app ni bwaai ni itoman ake a anaa angiin au tai. I a moana ni kukurei ao n aki tabeaianga.
Ngkai I a ataia bwa I riai ni manga kaitiakii arou ni kabonganaan baika a maiu man te iti. I iango rikaki ma te kuba ao te miimii: E ataia Beretitenti Nelson n te tai arei ae rongorongo man bwaai ni kareke rongorongo bon ngaia ae e nako mai iai te barannano ao te aki nakoraoi n te bong aei, inanon tain te aki rau aei? Ni koauana bon iai te kamanoaki ni irirakin te burabeti. Aia taeka ara taan kairiiri n te Ekaretia bon titebo ma teuana kawain te ota man taai, ae katoka te mangaongao ao ni kaotaa te kawai nakon te rau.
2. Te Tatauraoi e Totokoa te Maaku
Tabeua riki te bwai ae karika raraomau bon man ongoraeakin rongorongo mai irouia aomata, ake n aron ana tai Noa, a kaenaenaia tabeman ibukin aia katauraoi ao n tauanano. I taku bwa tabeman aomata a karikirakea te anua ae aki tarabwai ibukin taai aika a na roko. Naake a wanawana ni koaua a irii aia taeka n reirei burabeti ao ni kataia raoi n riki ni maiu n toronibwai.
Inanon ririki, taan kairiiri n te Ekaretia a tia n reireinira bwa ti na aki tarau, ni karekea te rabakau bwa ti aonga ni karekei maiura ibon iroura ao tabeman, ni kaikoa te amwarake ao te ran, ao ni kawakina te mwane ngkana e riai. I ataia bwa a kakaokoro arora nako, ao tabeua aba a aki kariaia kain abaia bwa a na kaikoa te amwarake ke bwaai tabeua ibukin maiun te rabwata. Ma e ngae ngke iai taian tua aika matoa, e tara n ae ngaira n tatabemaniira ti atai bwaai tabeua ake ti kona ni karaoi bwa ti aonga n tauraoi ibukin taai aika a na roko.
I namakina te kamanoaki ngkana I kabanea au kekeiaki n ongotaeka ao ni kona ni kawara te Uea ma te nano ni koaua ngkana I bubuti buokau. Te katauraoi aei bon ai aron naba teuana otan taai, are e urua te nano ni maaku ao ni kaotaa te kantaninga.
3. Te Anua e Karika te Bitaki
Te aoraki ae buti aei e a tia ni karikai bwa N na kakaitau riki ibukiia aomata ake a kaungaai n aia rongorongo ae e tamaroa, te nonori n te maiu n tamnei, ao aia kangare aika kakukurei. Rao aikai a aki toki ni katamaroa au bong. A kauringai bwa ti kona n rineia bwa e na kanga arora ni kaitaraa te bwai are e riki nakoira.
I kataia n ira te katooto aio ngke a bane ni kainaki bobotaki n te Ekaretia. Imwaain kanakoan titiraki ake ti tangiria ni waekoa ni kanakoi n aron “bukin tera” ao “e kanga,” I rineia n kabotoa riki iaon iterana ae tamaroa n reiakinan te euangkerio ae e boboto n te mweenga. I a kona n noria ngkai bwa atakin raoi karikirakean te anua ae tamaroa, ngkana e rangi ni matoatoa n tabetai, e buokai n tiku riki ni matoa n te maiu n tamnei nakon are e na riki ngke I kariaia bwa e na rotai te nano n uun. N aron te katenua n ootan taai, te anua ae tamaroa e kona ni kamaenakoa te nanokokoraki ao ni kaboua nanora.
4. Te Tamnei ae Raoiroi bon te Rao ae Mwakaroiroi
N te bong teuana ngke I a namakina te rawawata ao te bwarannano, I a iangoia bwa N a ongora nakon te Taebanako Kuaea i aonraain. Te katangitang e aki toki n karokoa namakinan te Tamnei ae Raoiroi. Iai te bwai n reitaki ae maiu iaon te channel, ao e kaunga norakiia aomata aika a kaotii nanoia n tangira ao ni kakaitau man aba nako ni katobibia te aonaaba! I namakina te reitaki ma ngaiia. Ngkai namakinan te Tamnei ae Raoiroi e katoka rawawatan nanou, I a rikirake riki ni kukurei ao n rau.
I a tia n noria n taai aika a mwaiti bwa ngkana I karaoa au kabanea ni kekeiaki ni kaoa te Tamnei ae Raoiroi nako nanon maiu, e na bon buokai n te bwai are I kainnanoia. Bon te rao ae korakora are e ingainga ni kan uota te bwaintangira ae te rau, te mweraoi, ao te mataata. N aron otan taai, E kona n kamaenakoa te mabubu ao ni kaotia bwa teraa ae e koaua.
Kakaea Otan Taai
E rangi ni korakora riki te Uea nakon bwaai ni kakatai. N aron taekan te kauakibu n te anene n taromauri 89 e taku:
Bon Iehova otau; a na roko taian nang,
Te onimaki, e korakora riki nakon te taratara, tararake nako karawa
Are e tautaeka iai Iesu ni mimitong n aki toki.
Ngaia are e kanga bwa N a tiku inanon te roo?2
I tangiria bwa ti na kona n uaia n nakonako n te bong aei. Tina kona n tararake nako karawa, ni kaonaki n otan taai, ao n taekaina taekan te koaua are e kaotai maiura. I kakoauaa bwa e na iai am iango aika tamaroa n tibwa te ota anne ma tabeman. Tao ko na kona ni iangoa te nakonako n aron aei ngkana e a manga roko n tei iaora te angibuaka n te namakin. Te Uea e mena i rarikira, ao ti aki riai ni maaku.