Man Tii Bwaai Aika a Maiu Man te Iti: Kairake n Ikawai

Karaoan Mwakuri aika Tabu n Tain te Tiku ni Kaokoroaki

Iroun Kaith Ashley Moran

Ngkai a kainaki tembora, ti kona n reitinako ni buoka te mwakuri ae tabu man te mweenga.

Aine a taraa te bwai ni mwakuri ae e maiu man te iti

Te tia korokaraki e maeka i Manila, Philippines.

I aki kantaningaia bwa N na ongo taeka ake e tibwaia te Moan Beretitentii n te namakaina ae nako: Imwiin karauan rinanoana ma te tataromwaaka, ao man tangiria n riki bwa kaain te aba aika a tamaroa, ti a tia ni baireia bwa a na kainaki waaki nako ake a karaoaki n te tembora.”¹

Tao n ai arou, kona iango bwa kona kanga ni kaitaraa te kangaanga n te tai aei n akean taabo aika tabu ibukin te rau. Ikai iaon Biribin, a kaman kainaki tembora imwain are e kamatoaki te tiku ni kaokoroaki n te komiuniti, ngaia are I a kaman ingainga ni kan oki nakon ana auti te Uea n te tai ae maan.

Ma I a ata te bwai teuana ae e kakawaki ngkai ti mena iaan te tua n tiku ni kaokoroaki. Ngkai a in mataroan tembora, te mwakuri ibukin katauraoan otenanti a bon aki toki. Ara bakatibu ake n iteran te rabuna are teuana, a tataningaira bwa ti na reiakina aroia. Ngkana ko kakaei kawai ni kaoa te namakin ae tabu ibukin te mwakuri n te tembora ni mweengam, aikai tabeua iango:

Ukera kateirikin am utu iaon FamilySearch.org.
Kataa karaoan te intekiti. E korakora riki iai te bwai ae e manena nakon te takakaro iaon te witeo!
Kabonganai kukune aika boou n reitaki ma am utu ake a maiu.
Korei karakinaia oin am utu.

I a tia n noria bwa a kanga waaki aikai n “rai[ra] nano[ia]” kaain au utu, n aron are e kabwarabwaraaki ni Maraki 4:6, ao n anganiira te aki bwaranano, te botu, ao akean te kantaninga. Ao ngkai te tiku ni kaokoroaki bon tiaki te bwai ae tangiraki, I kakaitau ibukin te tai ae e reke nakoira ni buokiira ma karaoan tabera nakon te tembora.

Aio e kona n riki bwa te tai ae tabu inanon maiura. Tao te buti n aoraki aei e na kauringiira aron kakawakin taian tembora. Ao are tao ti na rang karabwarabwa n reken te tai ni kawara te tembora n ae mwaiti nakon are ti kakaraoia mai imwaina. N aron are e katanoataki man te Moan Beretitentii, “Aio te bitaki ae e uarereke taina, ao ti kariaria nakon boong aika a na roko ngkana a manga kaukaki tembora.”²

I aki kona n tataninga nakon te bong anne ngkana ti a manga kona ni karababa nako te otenanti ni kamaiu teuana riki te tai nakoia ara bakatibu! Ma ngkai e tuai roko te bong anne, a rangi ni mwaiti mwakuri ae ti kona ni karaoi.

Kakabwaia n te Kamaoaki

Unimwaane Dale G. Renlund man te Kooram n Abotoro n te Tengaun ma Uoman e taku: “ngkai ti ira buakon te mwakuri n rongorongon te utu ao te mwakuri n te tembora n te bong aei, ti … katauraoa karekean ‘te kamaoaki’ kakabwaia ake a beritanaki irouia burabeti ao abotoro… . A raonaki bwaai aika karinanaki aikai ma kakabwaia aikai:

Karikirakea ataakin te Tia Kamaiu ao ana karea ni kamaiu;
Karikirakea namakinan te Tamnei ae Raoiroi n namakin te korakora ao te kairaki ibukin maiura;
Karikirakea te onimaki, n te aro are te rairaki nakon te Tia Kamaiu e a nano riki ao n teimatoa;
Karikirakea te konabwai ao te ungannano n reirei ao n rairannano ibukin te atatai bwa antai ngaira, ti nako mai ia, ao te taratara ae itiaki n te tabo are tina nako iai;
Karikirakea te itiaki, katabuakaki, ao te bitaki n nano n tainako inanora;
Karikirakea te kukurei rinanon te konabwai ae rikirake n namakina ana tangira te Uea;
Karikirakei kakabwaian te utu, n aki tabe ma arora n te tai aei, mai imwaina, ke n taai aika a na roko ke tao aki kororaoin ara kateiriki n ara utu;
Karikirakea te tangira ao te kakaitau ibukiia ara bakatibu ao ara koraki ake a maiu, bwa ti aonga n aki namakina te maroaa;
Karikirakea te mwaaka ni kanakoi bwaai ake a kainnanoi kamaoaia ao man, ana ibuobuoki te Uea, ni buokiia tabeman;
Karikirakea te katantan man kariri ao korakoran ana kariri te kakaitara; ao
Te rikirake n te ibuobuoki ni katokii kangaanga, uruaki, ke ingainga n nano ao ni kamarurunga are e ikoaki” (“Rongorongon te Utu ao te Mwakuri n te Tembora: Te Kabaebae ao te Kamaoaki,” Ensign ke Riaona, Meei 2018, 47).