Man Tii Bwaai Aika a Maiu Man te Iti: Kairake n Ikawai

Nakon te Mitinare are E Kamwaingaki n te Tai ae Karina

Iroun Amy Davis

E riki te kakubanko n am mition? Aikai kairi n ibuobuoki mai iroun temanna are e mataata teutana n aron te bwai are ko rinanona.

E maeka te tia korokaraki i Utah, USA.

A mwaiti mai ibuakomi mitinare ae kam a mena n te tabo are e aki katauaki ibukimii—n tataninga ni kan ataia bwa iia am tabo ni beku ae boou, ke tao n okira mweengam. Norakin rongorongo aika a otinako aikai a kaokii ururing aika a kauringaaba ni baike I rinanoi n tain au mition n ririki aika nako. I iango bwa tao I kona n tibwai tabeua baike I nori ake a na kona ni ibuobuoki, mai iroun te mitinare temanna are e kamwaingaki n te tai ae karina nakon te tabo teuana.

Te Kananako Mai Albania

Ni moan te 1997, I mitinare i Albania. Ngai ao toau ti rangi n tangira aonon tinanikun te kawa, te pie ae karaoaki man te tiiti ao te tibiniti, ao tein tangin te taetae are ti a tia ni kekeiaki n reiakinna. Ma ae moamoa riki, ti tangiria ni mwakuri ma aomata ake ikekei.

Inanon waakin te tai, te namakin ibukin wakin te tautaeka e a rikirake ni matoatoa. Ti kataia ni kabanea ara iango iaon tibwaan te euangkerio ma tia rotaki ma rongorongo ake ti ongo iaon rikiraken korakoraia naake a kakaitara ni kabutaa te aba. Ngkanne te tautaeka e a kamatoa tuan te aki nanakonako, ao mai ikanne are e moanna ni karika te kiriwe. Te aba ae e bwanin e a rinanon te buaka inanoaa i bon imarenaia.

N tokina, ni Maati 14, ara mition ae bwanin e a kamwaingaki. I aki konaa ni mwaninga tareboniakira ike ti a tuangaki bwa ti na ikotaki bwa ti aonga ni bane ni kaotinakoaki man te aba. E a roko te iango ao te namakin ae e mangaongao n au iango. E koaua I bon tangiria bwa na mano, ma iangoakin ae N nang kitaniia te utu are ti a rikirake n tangiriia, ai moara riki n tain te mangaongao aio, e bon urua nanou. E na bon aki reke naba te tai ni kaboo ma ngaiia.

Mwanangara ni kitana te aba bon iaon te erekabuta are e uotiira nakon te kaibuke ao ni manga uotaki n te raroa ae e uarereke nako Itare imwaain kamwaingara nakon te mition ae kaokoro. I kamwaingaki nako Engiran. E rangi ni baiti, ao ni kamimi, ma e rangi ni matoatoa. Kabanean uringan te tabo ae Albania bon man norana ngke e a tabe n uarereke n taraana man te erekabuta, ao ni iango bwa ai teraa ae e na riki nakoia aomata ake a tiku imwiira.

Kuneakin Te Rau

Ngkai tao e kaokoro aron te bwai are ko rinanona ma are irou, I taku bwa tabeman mai ibuakomi ti tebo te namakin are kam rinanona ngkai. Ngaia are Au kantaninga bwa te bwai are N na tibwaia imwiina e na iai nanona iroum. Aikai unoua reirei ake a buokai ni karekea te rau imwiin te bitaki ae kakubanako n te bwai are I rinanona n au mition ae e bwanin taina.

1. Reitaki ma tabeman. E na iai te namakin n nanokawaki ao te aki oota are e na karikiko bwa kona teiraroa iai mairouia tabeman. Ma e kakawaki bwa ko na teimatoa n reitaki, riki inanon taai aika imwaim ngkai ko kataia ni bitaki. Reitaki ma aomata ake a tabeaianga ibukim n taraia bwa ko na kukurei. Man tauraoin bwaai n rabakau aika boou, ai bon a akea angam ni katibanakoa! Tao ko kona ni kakaea temanna ae ko na kataneiai am rabakau n te taetae ni iabatera ma ngaia. Ko kona n reitaki ma naake ko beku ao n reireiniia. E ngae ngkai ko namakinna bwa ko aki tau, ko na aki maroa. Riki ngkana am utu ao raraom aki ataa raoi aron boutokakim, I taku bwa angiia a rangi n tabe ibukim ao a tangiriko bwa ko na kukurei.

2. Reitinako n tibwaua am koaua. N aki tabe bwa ko mena ia ngkai ko wareka te rongorongo aio, akea au nanokokoraki bwa ko katobibiaki irouia aomata ake a na kakabwaiaaki man am nonori ae e onoti. Tai maama man tibwakin te bwai are ko a tia n reiakina ao n namakina n am tai ni mitinare ae e bwanin taina—n aki tabe bwa maanra ke uarerekera am tai ngke ko “beku n te mition”. Ngkai ko waaki rinanon bwaai aika a riki ngkai ao n nora bain te Atua inanon maium, tibwaa te bwai are ko ataia ma ake ko tangiriia. Tao te reirei are ko reiakina man te bwai are ko rinanona tao bon ngaia are e kainanoia temanna n ongo.

3. Kakoaua ae Tamara are i Karawa e kinako. Ketinna bwa tera? Te Atua e ataa te bwai ae e na riki! E ataa te bwai are e na reke inanon maium. Ao am Tia Kamaiu, Iesu Kristo, e mataata raoi n te bwai are ko namakina. A mena irarikim ngkai ko toua te kawai aei ao A kona ni karaua nanom rinanon te Tamnei ae Raoiroi. Te nano ae e uruaki e na anaa te tai ae e maan, ao e bon Raoiroi anne. Onimakina te Uea ngke E kangai, “N na mena i angataimi ao n angamaingimi, ao Tamneiu e na mena i inanomi, ao au anera a mena i buakomi, n tabekiko rake” (Reirei ao Berita aika Tabu 84:88).

4. Taotaona n nano n am tai n nanokawaki. Ko namakina ae ko un? Nanokawaki? Maraki n nano? Ke ko iango iroum, “E bon aki riai aei”? Ke tao ko namakina te namakin ae e aki rau. Ko na ataia bwa te namakin are ko rinanona e bon rereke. Ko nanokawaki ibukin te bua, ao e kakawaki bwa ko na karaurau ibon iroum n taotaonanano ngkai ko rinanon te waaki aei. Irarikina, rangi ni karaurau bwa ko na aki karekea bwa te bwai ae e karawawata ke ni katurua iangoan te bwai are ko rinanona bwa e na roota aron am waaki ni mwakuri n te bong aei. Ngkana ko namakinna bwa e a kangaanga kaitarana nakon marurungim, tuanga am bitiobi ke te beretitenti n te mition bwa a na buokiko n reitaki ma te tia rabakau ibukin buokam. Bon akea te bwai ae e kamaama n titiraki ibukin te ibuobuoki.

5. Kabanea am konaa ni kaoa te Tamnei. Reitinako ni kabanea nanom n te mwakuri n te euangkerio. Ngkana ko a manga kamwaingaki, teimatoa n ongotaeka nakon tuan te mition. Kakaai anga ni katoa bong ni kaotia nakon te Tamnei bwa ko tangiria bwa E na memena irarikim, ao korei namakin mai ieta ake ko karekei mai Irouna. Tikum ni kaniiko ma te Tamnei e na buokiko ni karaoi rinerine ibukin taai aika a na roko ao n anganiko te mwengaraoi n te bwai ae ko rinanona ngkai.

6. Onimakina raoi bwa ko bon “weteaki naba ngkai nakon te mwakuri.” N te tai ae e maan, I iangoia bwa te “wewete” bon n te tabo are I kanakoaki bwa n na beku iai ni mitinare. I tangiria bwa N na kaman ataa aei mai imwaina bwa weteakiu raoi bon te buokiia natin te Atua n te tabo are I mena iai. Imwiina ngkana I a buuta arau ni mitinare are e roro, I bon tiku naba ni kabaeaki ma berita ake n tain te bwabetito n uouota aran Iesu Kristo iaou ao ni karaoa ae e raoiroi nakoia aomata n aron are E karaoia ni katoa bong. Ngkana tao e a manga reke am mition ae boou ke ko a kamotirawaaki man te beku ae e bwanin taina, ko na ataia bwa e kona ni kabonganaaki am tarena ni katea abanuean te Atua n te tabo are ko nako iai.

Inanon Baina

I taku bwa te bwai ae moan te kauruaki nano ni kitanakiia kaain Albania bon atakina ae ti a katikuia Aika Itiaki ake a tibwa kaina te aro n kakae ibukin te euangkerio n akea ara ibuobuoki. Ma ko ataia bwa tera? A karaoa te mwakuri ae e kamiimi. E ngae ngke ti aki mena ikekei ni buokiia, te Atua e mena i rarikiia. E a riaon 20 te ririki imwiin are I kitaniia, te mwakuri n te aba anne e rikirake, ao Kaain te Aro a rangi ni matoatoa.

Ngaia are, nakoia mitinare, reitinako n taratara te mwakuri ae nako mai ieta ni baike a riki inanon kawaim. Iai aomata ake a kainanoa bwanaam. ao e mwaiti te kimwareirei ae e na kuneaki. Kabongana te taneiai ae e onoti aei bwa te tai ni kamatoa reitakim ma te Atua. E Na kakabwaiako ngkai ko waaki rake ma te onimaki.

Te mweraoi inanon tain Taai aika Aki Ataaki Kanoaia

“I ataia bwa te kakabwaia ae tamaroa e a tia ni katauraoia te Atua ibukiia natina ake a tangiria ao ni beku Ibukina. Ngaia are, inanon taai aika a kananououa aikai, e na rau nanom n ana berita aei te Tia Kamaiu. E taku, ‘Ngai, ae te Uea, I bae ngkana kam karaoa are I taku.’ I berita nakoimi bwa te kimwareirei e rangi ni kaan nakoia naake a kan ongo Irouna ao n ongotaeka nakon Ana tua,”

Beretitenti Russell M. Nelson, “Beretitenti Nelson e Kakao Nakoia Aba ni Kabane n Aki Mamatam ibukin ‘Kamarurungan te Maiu n Rabwata, te Maiu n Tamnei’ ni Kaitaraan te COVID-19,” Maati 26, 2020, news.ChurchofJesusChrist.org.