Fakaʻilekitulōnika Pē: Kakai Lalahi Kei Talavoú
Ngaahi Meʻa Pau ʻe 5 ʻi ha Māmani Taʻepau
ʻE lava ke tokoniʻi koe ʻe he ngaahi moʻoni ʻe nima ko ʻení ʻi ha faʻahinga meʻa pē.
ʻOku tātātaha ke hoko ʻa e moʻuí ʻo fakatatau mo e palaní. ʻOku fonu ʻi he ngaahi faingataʻa, feliliuaki, mo ha ngaahi fakaʻohovale ki he taha kotoa pē. Te tau mateuteu fēfē leva ki he kahaʻú ʻi he taimi ʻoku ʻikai ke tau ʻiloʻi ai ʻa e meʻa ʻe hoko aí?
Meʻa mālié, ʻoku ʻi ai ha ngaahi meʻa te tau lava maʻu pē ʻo fakafalala ki ai. He ʻikai ʻaupito ke teitei liliu ʻa e ngaahi moʻoni ko ʻení. ʻE lava ke nau tataki ʻetau ngaahi filí mo fakalotolahiʻi kitautolu ke tau laka ki muʻa, neongo ʻa e ngali fakapōpōʻuli mo taʻepau ʻa e hala ʻoku hanganaki maí.
ʻOku ʻofa ʻa e Tamai Hēvaní ʻiate koe.
ʻE tatau ai pē pe ko e hā e meʻa ʻoku hoko ʻi he moʻuí, ʻoku ʻofaʻi koe. ʻOkú ke mahuʻinga fau ki he Tamai Hēvaní (vakai Tokāteline mo e Ngaahi Fuakava 18:10). ʻOkú ke mahuʻinga tatau mo e ngaahi māmaní!1
Mahalo ʻoku ʻikai ke ke ongoʻi mahuʻinga fēfē. Mahalo ʻokú ke ongoʻi mamahi mo tuenoa mo manavahē. Mahalo ʻokú ke ongoʻi taʻetaau. Kae hangē ko ia ne fakamatalaʻi ʻe Sisitā Soi D. Sōnasi, Palesiteni Lahi ʻo e Palaimelí, ko e mahuʻingá mo e tāú ʻoku ʻikai ke na tatau.2 Naʻa mo e taimi ʻoku tau faiangahala aí, ʻoku tau mahuʻinga ʻaupito. Ko e ʻuhinga ia ʻe taha naʻe fakahoko ai ʻe he Fakamoʻuí ʻa e Fakaleleí (vakai, Tokāteline mo e Ngaahi Fuakava 18:11–13). Koeʻuhí ʻokú Ne ʻafioʻi mo ʻofeina koe, kuó Ne ʻomi ai ʻa e founga ke ke lava ʻo toe maʻa ai.
ʻOku ʻi ai ha palani ʻa e Tamai Hēvaní maʻau.
ʻOkú ke ʻi he māmaní koeʻuhi ko ha taumuʻa: ke hoko ʻo hangē ko e Tamai Hēvaní mo Sīsū Kalaisi peá ke foki ʻo nofo fakataha mo Kinaua. Ko e taumuʻa ia ʻa e ʻOtuá maʻaú, pea te Ne tokoniʻi koe ke ke fakahoko ia!
ʻOku ʻikai ʻuhinga ia ʻe faingofua maʻu pē ʻa e meʻa kotoa pē; te tau kei fehangahangai pē mo e ngaahi faingataʻá. Ka te tau lava ʻo fakapapauʻi “ʻe fengāueʻaki fakataha ʻa e ngaahi meʻa kotoa pē koeʻuhi ko e lelei ʻanautolu ʻoku ʻaʻeva ʻo angatonú” (Tokāteline mo e Ngaahi Fuakava 100:15).
ʻE hā ngali kehekehe ʻa ʻEne palani ki hoʻo moʻuí mei hoʻo palani ʻaʻaú, ka te ke lava ʻo falala ko ʻEne palaní maʻa hoʻo leleí pea ʻe tataki ai koe ki he fiefia taʻengatá. Lau ʻa e ngaahi tohi fakahinohino ki he moʻuí: ʻa e ngaahi folofolá, ko hoʻo tāpuaki fakapēteliaké, mo e ngaahi lea ʻa e kau palōfita he kuonga ní. Te nau tokoni ke mahino lelei ange kiate koe ʻa ʻEne palani maʻaú.
Hili iá peá ke muimui leva ki Heʻene fakahinohinó. ʻI he taimi ʻoku tau talangofua ai ki Heʻene ngaahi fekaú, te tau maʻu ʻa e melino mo e monūʻia (vakai, Mōsaia 2:22). Hangē ko e lea ʻa Palesiteni Tōmasi S. Monisoní, “Ke mou fiefia. ʻOku hā ngingila mai e kahaʻú ʻo hangē tofu pē ko hoʻomou tuí.”3
Ko e taumuʻa taupotu tahá ʻa e moʻui taʻengatá.
Neongo e ngali taʻepau ʻa ʻetau fononga ʻi he moʻuí, ka ʻoku mahino ʻa hotau ikuʻangá. ʻI heʻetau fai ha ngaahi filí, te tau lava ʻo fehuʻi “ʻE iku nai ʻeni ki fē?”4 Kapau ʻokú ne fakatafoki koe mei he hala ki he moʻui taʻengatá, ʻoku ʻikai ko e fili totonú ia.
Taimi ʻe niʻihi ʻoku tau tokanga kitautolu ki he ngaahi fili īkí, hangē ko e ngāue fakaako mei ʻapí pe ko e meʻa ke kai ʻi he maʻu meʻatokoni hoʻataá. ʻOku ngalo ʻiate kitautolu ʻa e taumuʻa totonu ʻo e moʻuí—ke hoko ʻo hangē ko ʻetau ongomātuʻa fakalangí. Ko e moʻoní, ʻi he taimi ʻoku tau huʻu ai ki he taumuʻa ko iá, ʻe lelei ʻa e meʻa kotoa pē. Ko ia, tauhi ha fakakaukau ʻoku taʻengatá.
Mahalo he ʻikai tatau e moʻuí mo e meʻa ne tau palani ki aí. Ko hono moʻoní, he ʻikai ʻaupito ke na tatau. Ka ko e meʻa ʻoku mahuʻinga tahá ʻa hotau ikuʻangá. Fakapapauʻi ʻokú ke ʻalu ʻi he hala totonú, pea ʻe lelei ʻa e meʻa kotoa pē ʻi he tokoni mai ʻa e ʻEikí. Te Ne tataki koe.
ʻOkú ke tauʻatāina ke fili.
Neongo ʻoku tataki ʻe he Tamai Hēvaní ʻa hotau halá, ka ʻoku ʻikai ke Ne folofola mai ʻa e meʻa kotoa pē ʻoku totonu ke tau faí. Kuó Ne foaki mai kiate kitautolu ʻa e tauʻatāina ke filí, pea ʻokú Ne ʻamanaki ke tau fakaʻaongaʻi ia.
Hangē ko e folofola ʻa e ʻEikí, “ʻOku ʻikai taau mo au ke u fekauʻi ʻi he ngaahi meʻa kotoa pē; … ʻoku totonu ke femoʻuekina ʻa e tangatá ʻi he holi lahi ʻi ha ngāue lelei, pea fai ʻa e ngaahi meʻa lahi ko ʻenau fili tauʻatāina ʻanautolu pē” (Tokāteline mo e Ngaahi Fuakava 58:26–27). ʻOku ʻuhinga heni ʻa e holi lahí ke faivelenga mo moʻui mateaki.
Taimi ʻe niʻihi, mahalo he ʻikai ongo fakafiemālie ʻa e maʻu ʻa e tauʻatāina ke filí. Ko e taimi ʻe niʻihi mahalo te tau fie maʻu pē ke fekauʻi mai e meʻa ke faí. Ka ko hono moʻoní, ko ha tāpuaki maʻongoʻonga ʻa e tauʻatāina ke filí. Ko ha meʻaʻofa ia mei he ʻOtuá pea ko e taha ia ʻo e ngaahi meʻa ʻoku tau hangē ai ko Iá. ʻOkú ne ʻomi ha mālohi kiate kitautolu.
Ko e hā leva e meʻa ʻokú ke loto ke fakahokó?
ʻOku finangalo ʻa e Tamai Hēvaní ke tau tupulaki.
Ko e taha ʻo e ngaahi ngāue lelei ko ia ke tau fakahokó, ko ʻetau fakalakalaka fakataautaha pē ʻatautolú. ʻOku ʻi ai maʻu pē ha ngaahi meʻa ke fakaleleiʻi ʻiate kitautolu, ngaahi meʻa te tau lava ʻo ako, mo e ngaahi pōtoʻi ngāue te tau lava ʻo fakatupulaki. ʻOku ʻi ai foki mo ha ngaahi fuakava ʻoku fie maʻu ke tau fakahoko mo tauhi.5
Naʻe fakamatalaʻi ʻe ʻEletā Teili G. Lenilani ʻa hono mahuʻinga ke tau tupulaki ʻi he founga ko ʻení: “ʻOku ʻikai tokanga ʻa e ʻOtuá ia ke hoko ʻEne fānaú ko ha ‘fanga kiʻi pusiaki’ ʻoku akoʻi mo talangofua, ʻe ʻikai ke nau maumauʻi Hono ngaahi nāunau ʻi he loki silesitialé. ʻIkai, ʻoku fie maʻu ʻe he ʻOtuá ʻEne fānaú ke nau tupu pea kau mo Ia ʻi Heʻene ngāué.”6
Teuteu ki ho ikuʻanga taʻengatá ʻaki hoʻo hoko ko ho lelei tahá. ʻIloʻi ʻa e ngaahi pōtoʻi ngāue ʻokú ke loto ke fakatupulakí mo e ngaahi meʻafoaki fakalaumālie ʻokú ke fie maʻu ke ke hoko ai ʻo hangē ko e ʻOtuá.7 Faʻu leva ha palani ke fakatupulaki ʻa e ngaahi meʻa ko iá! Fakamālohia hoʻo “ngaahi uoua fakalaumālié” ʻaki hoʻo toutou fakahoko ia.8
ʻI he taimi ʻoku ngali fakailifia ai ʻa e moʻuí ʻi heʻene hanganaki maí, manatu ʻoku ʻikai ke taʻe lava ʻo mapuleʻi ia. ʻOku ʻikai ke ke tuenoa. ʻOkú ke mālohi. Pea ʻi hoʻo kau mo Sīsū Kalaisí, he ʻikai faʻa taʻofi koe. Te Ne tokoniʻi koe ke ke aʻusia ʻa e meʻa kotoa pē ne fakataumuʻa ke ke aʻusiá.