Kakai Lalahi Kei Talavoú
Meʻa ʻe Taha fekauʻaki mo e Kahaʻú Te u Lava ʻo Mapuleʻí
Tā fakatātā mei he Getty Images
Naʻe fakaʻau ke faingataʻa hono tukunoaʻi e ongo naʻá ku maʻú. Naʻá ku taʻu 28 kei taʻemali mo ʻikai fakapapauʻi e meʻa naʻá ku fie fakahoko fakapalofesinalé neongo naʻá ku maʻu ha ngāue lelei ko ha neesi fai fāʻele. Ne u ongoʻi hangē naʻe fehalaaki e tafaʻaki kotoa pē ʻo ʻeku moʻuí. Naʻá ku veiveiua ʻi he ngaahi fili ʻo e moʻuí mo ʻikai ʻiloʻi e hala ke filí. Ne u ongoʻi hē.
ʻI ha ʻaho ʻe taha he taimi naʻá ku ongoʻi loto-foʻi ai, naʻe fetuʻutaki mai ha kaungāmeʻa ne fuoloa ʻema taʻefelōngoakí. ʻI heʻene fehuʻi mai pe naʻá ku fēfeé, naʻá ku fakamatalaʻi ange e ngaahi ongo kotoa ko ia naʻá ku fefaʻuhi mo iá. Naʻá ne fakafanongo pea pehē mai leva, “Sai, ʻoku fēfē ho tuʻunga fakalaumālié?”
Naʻá ku tali ange he taimi pē ko iá, “ʻIo, lelei ʻaupito ia.” “Kuo teʻeki ai ke u ongoʻi ofi ange ki he ʻOtuá ʻi heʻeku moʻuí.”
Naʻá ne tali mai, “Ta ʻoku ʻikai leva toe ʻi ai ha meʻa kehe ke ke hohaʻa ki ai.”
Falala ki he Palani Haohaoa ʻa e ʻOtuá
Naʻá ku fakatokangaʻi ha meʻa ʻe ua talu mei he fepōtalanoaʻakí. ‘Uluakí, ne u fakatokangaʻi naʻá ku houngaʻia ʻaupito ke maʻu ha fakamoʻoni mālohi ki he ongoongolelei kuo fakafoki maí pea ke malava ʻo moʻui ʻaki e ngaahi fekaú mo ongoʻi fehokotaki mo langi.
‘Oku fuʻu mahuʻinga kiate au ʻa e moʻui fakafalala fakalaumālie pē kiate kitá, pea ʻoku ou kei ako pē e founga ke maʻu ai e fakahā mei langí ʻi heʻeku moʻuí. ‘Oku ou ongo’i ko e lotu mo e ako folofola he pongipongi kotoá ʻa e ongo meʻa faingofua ʻokú na fakahoko e faikehekehe lahi taha ʻi heʻeku malava ʻo maʻu e fakahā fakatāutahá. ʻOku ou ongoʻi fehokotaki ange foki mo langi ʻi heʻeku feinga ke angaʻofá, moʻui lelei kae lava e Laumālié ʻo hoko maʻu pē ko hoku takaua, talangofua ki he ngaahi fekaú, mo fakatomala moʻoni.
Ko hono uá, naʻá ku fakatokangaʻi naʻe ʻikai moʻoni fakaʻaufuli ʻeku tali ki he fehuʻi ʻa hoku kaungāmeʻá—naʻá ku fakakaukau ne u “haohaoa” fakalaumālie, ka naʻe fie maʻu ke lahi ange ʻeku tuí, tuku e loto-hohaʻá, pea falala ki he ʻOtuá ke Ne tokangaekina e ngaahi meʻa ʻoku ʻikai ke u lava ʻo mapuleʻí.
Naʻa mo e taimi ʻoku ʻikai fuʻu lelei ai ha ngaahi tafaʻaki ʻe niʻihi ʻo ʻeku moʻuí ʻo hangē ʻoku ou fakaʻamu ki aí, ʻoku ou ʻiloʻi ko e meʻa mahuʻinga tahá ke ngāue ʻi he tui mo fakahaaʻi ki he ʻOtuá ʻoku ou fakaʻaongaʻi ʻeku tauʻatāina ke filí ke fakahoko ha ngaahi fili ʻoku leleí. Kuó u ako ko e taimi ʻoku kehe ai e moʻuí mei he meʻa ʻoku ou ʻamanaki ki aí, ʻoku hoko foki ia ke u lava ʻo ako mo tupulaki ʻi ha ngaahi founga naʻe ʻikai ke u mei lava ʻo maʻu ʻi ha founga kehe.
Naʻe ʻikai ke u teitei fakakaukauloto te u veiveiua ʻi hoku taʻu 29 fekauʻaki mo ʻeku ngāue maʻuʻanga moʻuí pea mo e konga hono hoko ʻo ʻeku moʻuí. Kae naʻa mo e ngaahi meʻa taʻeʻiloá ni, naʻá ku falala kakato ne ʻi ai ha palani haohaoa ʻa e ʻOtuá maʻaku. ʻOkú Ne ʻafioʻi lelei e meʻa ʻoku hokó mo e meʻa ʻoku ou fie maʻú, pea te Ne tokangaʻi maʻu pē au (vakai, Mātiu 6:28–34). Hangē pē ko ia naʻe akoʻi ʻe ʻEletā L. Toti Pasi ʻo e Kau Fitungofulú, “Neongo ʻene faingataʻa ke mahinó, tautefito ki he ngaahi taimi ʻi heʻetau moʻuí ʻoku mālohi ai ʻa e matangí pea hou ʻa e tahí, te tau lava ʻo fiemālie ʻi hono ʻiloʻi ko ia ʻoku tokoni maʻu pē ʻa e ʻOtuá ʻi Heʻene lelei taʻe fakangatangatá, ke tau aʻu ki ʻapi” (“Falala Maʻu Pē mo Vilitaki,” Liahona, Nōvema 2019, 48).
Lahi Ange Falalá; Siʻi Ange Hohaʻá
Hangē ʻoku fuʻu faingataʻa e moʻuí ʻi ha ngaahi ʻaho ʻe niʻihi, ka ʻi heʻeku fakakaukau moʻoni ki aí, ʻoku ou ʻiloʻi ʻoku ʻikai fie maʻu ke u hohaʻa. Kuo kamata māmālie ke u fakatokangaʻi ʻoku fie maʻu ke u falala lahi ange ki he ʻOtuá pea fakasiʻisiʻi ange ʻeku hohaʻa ki he ngaahi meʻa ʻoku ʻikai ke u lava ʻo mapuleʻí. Ko e meʻa ʻe taha ʻoku ou lava ʻo mapuleʻi ki he kahaʻú ko e falala ki he ʻOtuá mo ngāue ke toe ofi ange kiate Ia ʻi he ʻaho kotoa pē.
‘I he taimi ʻoku ou ongoʻi ai kuó u heé, ʻoku ʻi ai maʻu pē ha maama feʻunga ke u fepaki ai mo e ngaahi tūkunga taʻeʻiloá pea laka atu ki muʻa. Pea kapau te u fakaʻaongaʻi ʻa e tuí mo tauhi ʻeku ngaahi fuakavá, kapau te u manatuʻi hoku tuʻunga moʻoni ko ha ʻofefine ʻo ha Ongomātuʻa Fakalangi mo toutou feinga maʻu pē, ʻe hoko e ngaahi meʻá ʻi he taimi mo e founga ʻoku totonu ke nau hoko aí, pea ko e meʻa pē ia ʻoku mahuʻingá.