Fakaʻilekitulōnika Pē: Kakai Lalahi Kei Talavoú
Ko e Founga, ʻUhinga, Taimi, mo e Feituʻu ke Fakahū e Paʻangá
Naʻe teuteuʻi e fakamatalá ʻi he fetalanoaʻaki mo E. Sefilī Hili, PhD, tokotaha fakatotolo ki he ngaahi meʻa fakapaʻanga ʻa e fāmilí
ʻOku tatau ai pē pe ʻokú ke pehē ko e paʻangá ko ha tāpuaki ia pe ko ha meʻa ia ʻoku kovi, ʻoku mahuʻinga moʻoni ia. Ka ʻi heʻetau hoko ko ha kakai lalahi kei talavoú, ʻoku tau faʻa ongoʻi hangē ʻoku ʻikai teitei feʻunga e meʻa ʻoku tau maʻú ke feau ʻetau ngaahi fie maʻu fakaʻahó, kae pehē foki ki ha faʻahinga meʻa fakatuʻupakē taʻeʻamanekina! Ko hono ʻuhinga ia ʻoku mahuʻinga ai ke fakahaofi ha paʻangá.
Ko ha ngaahi tokoni ʻeni ʻe nima ke tokoniʻi koe ke ke kamata fakatupulaki kei taimi hoʻo fakahū paʻangá koeʻuhí ka ke fiefia ʻamui ange ʻi he ngaahi tāpuaki ʻo e tuʻunga malu fakapaʻangá.
-
ʻO founga fēfē? Kamata ʻaki hano faʻu ha patiseti. Palani fakalelei ʻa e lahi hoʻo paʻanga hū mai ʻe ʻave ki he totongi vahehongofulú mo hoʻo ngaahi fie maʻú (ngaahi moʻuá, meʻatokoní, mo e alā meʻa pehē). Ko e toengá te ke maʻu leva ai ha fakakaukau ki he lahi ʻo e paʻanga te ke lava ʻo fakahū ʻi he māhina takitaha mo e lahi ʻo e paʻanga ʻe toe ke ke fakamoleki ki hoʻo ngaahi fie maʻú.
Vakai ki hoʻo pangikeé ki ha ngaahi fili ke toe faingofua ange ai hoʻo fakahaofi paʻangá, hangē ko hono fakahū hangatonu ha peseti pau ʻo hoʻo paʻanga hū maí ki hoʻo ʻakauni fakahaofi paʻangá ʻi he māhina takitaha. ʻI he founga ko iá, he ʻikai leva ke ke toe fakakaukau ki ai! Pea fakapapauʻi ʻokú ke ngāue lelei ʻaki ha faʻahinga palani maʻu vāhenga mālōlō ʻe ʻoatu ʻe he kautaha ʻokú ke ngāue ki aí.
-
ʻI he taimi fē? Taimí Ni! … Pe kamata ʻi hoʻo vahe hokó. Mahalo te ke ongoʻi ʻoku ʻikai feʻunga hoʻo patisetí ke ke fakahaofi ai ha paʻanga he taimí ni, ka ʻi hoʻo kamata ke fakahū ha paʻanga siʻisiʻi he māhina takitahá, te ke fakatupulaki leva ai ha tōʻonga moʻui te ke monūʻia ai he kahaʻú!
-
Ko e hā hono lahí? Fakahaofi ʻa e lahi taha te ke ala lava ʻi hoʻo patisetí. Kapau ʻoku siʻisiʻi hoʻo paʻangá pe ʻoku ʻi ai haʻo moʻua, te ke lava ʻo fakahaofi ha kiʻi pēseti ʻe 5 ʻi he māhina takitaha. Ka ʻi he fakaʻau ke lahi ange hoʻo paʻanga hū maí, te ke lava ʻo fakalahi ia ki he pēseti ʻe 10 pe 15 pe lahi ange ʻi he fakalau ʻa e taimí. Mahalo ko ha taumuʻa lelei ke ʻi ai ha paʻanga ʻoku feʻunga mo ha meʻa fakatuʻupakē māhina ʻe taha. Pea kamata leva ke fakahū ha paʻanga feʻunga ki ha māhina ʻe 3 pe 6 pea hokohoko atu ai pē.
-
ʻI fē? Ko ha fakakaukau lelei ke tānaki hoʻo paʻanga kuo fakahaofí ki hano ʻakauni pē ʻoʻona—ʻe taʻofi leva ai hano ʻahiʻahiʻi koe ke ke fakamoleki ia ki he ngaahi meʻa fakaʻahó. Kapau ʻokú ke fakahaofi paʻanga ki ha meʻa pau, ʻahiʻahi fokotuʻu ha ʻakauni pau te ke lava ʻo fakahingoa (hangē ko e “sea” pe “komipiuta”) ke fakamanatu atu kiate koe ʻa hoʻo taumuʻá.
Kapau ʻoku kei ʻi ai haʻo ngaahi fehuʻi, fetuʻutaki ki ha tokotaha faifaleʻi fakapaʻanga. Te nau lava ʻo tokoni atu ke ke fokotuʻu ha ngaahi taumuʻa ki he fakahaofi paʻangá ʻo makatuʻunga ʻi hoʻo tuʻunga fakapaʻangá.
Mahulu hake aí, manatuʻi ko e fuofua sitepu ki he malu fakapaʻangá ko hono ʻuluaki totongi hoʻo vahehongofulú! Falala ki he talaʻofa ʻa e ʻEikí te Ne “fakaava kiate kimoutolu ʻa e ngaahi matapā ʻo e langí, mo lilingi hifo kiate kimoutolu ha tāpuaki, ʻe ʻikai ha potu ʻe faʻa hao ia ki ai” (Malakai 3:10; 3 Nīfai 24:10). Ko e taimi ʻe niʻihi ʻoku tau ʻamanaki ko e ngaahi tāpuaki ko iá ko ha paʻanga ʻoku ʻomi maʻatautolu, ka ke tau manatuʻi muʻa ʻe lava ke kau ʻi he ngaahi tāpuaki ko ʻení ha ngaahi tāpuaki fakalaumālie (vakai, David A. Bednar, “Ko e Ngaahi Matapā ʻo e Langí,” Liahona, Nōv. 2013, 17–20).
Naʻe folofola ʻa e ʻEikí ʻo pehē “ko [ʻEne] taumuʻá ke tauhi ʻa [ʻEne] kau māʻoniʻoní” (Tokāteline mo e Ngaahi Fuakava 104:15). ʻE ngali faingataʻa ke fakahaofi ha paʻanga—tautautefito ʻi hoʻo hoko ko ha tokotaha lahi kei talavoú, ko e taimi ia ʻoku lahi fau ai ʻa e ngaahi tapa hoʻo moʻuí ʻoku ʻikai ke ʻi ha tuʻunga paú—ka te ke lava ʻo fakahoko māmālie ia. ʻE tokoni atu ʻa e Tamai Hēvaní ke liliu hoʻo ngaahi tōʻongá mo e ngaahi taumuʻá ke ke hoko ʻo fakafalala pē kiate koe mo malu fakapaʻanga.