Usa ka Panan-awon nga Nakagiya Kanako sa Kamatuoran
Naghunahuna ra ba diay ko sa estatuwa?
Pipila ka tuig ang milabay, nakighimamat ko sa mga misyonaryo, ug ang akong panglawas nanlimbasug. Nagmagul-anon ko, ug ang ako lang gusto mao nga mobati nga murag naay giya sa akong kinabuhi.
Wala ko mobati og kamasaligon o kahinam mahitungod sa bisan unsang butang, ilabi na mahitungod niining simbahan nga perming gihisgutan sa mga misyonaryo. Bisan pa man, supak sa buot mihukom ko nga motambong sa sakramento sa unang higayon.
Ang akong inahan miuban nako, ug sa dihang miabut kami sa simbahan, gikulbaan ko sa dihang nakita nako ang bulawan nga estatuwa diha sa atop. Mao kadto ang kinanindutan nga talan-awon nga akong nakita sukad! Kini nga gambalay malinawon kaayo ug nagpangamay nga ang akong tibuok kinaiya nausab, ug ganahan ko nga moadto sa sulod.
Atol sa sakramento, mipiyong ako, ug ang usa ka imahe ni Jesus mipakita diha sa akong hunahuna. Sa nagdako pa ko, kanunay nakong nahibaloan mahitungod ni Jesus, apan wala gayud ko mainteresado Niya hangtud karong bag-ohay lang. Wala pa ko sukad makabasa sa Biblia. Ug sa tinuoray wala ko masayud og bisan unsang butang nganong si Jesukristo namatay sa krus o nganong Siya adunay napulog duha ka mga Apostoles o nganong daghang mga propeta nagtudlo mahitungod Kaniya.
Apan nianang higayona, gibati nako nga konektado ngadto Kaniya. Sa katapusan mura og para nako tinuod Siya. Akong gibati ang naghingapin nga pagbati sa gugma ug tinguha sa pagkat-on og dugang pa. Mituo ko nga Siya ang tinubdan sa kamatuoran ug gugma nga akong gipangita.
Pipila ka adlaw ang milabay, akong gipangutana akong mama kabahin sa estatuwa nga akong namatikdan. Ingon og naglibug siya og gamay ug miingon nga wala siya makamatikod og estatuwa, apan gusto siya nga moagi pag-usab sa gambalay aron makita kini human ako mihulagway kon unsa kini kanindot.
Apan sa dihang miabut kami sa gambalay sa simbahan, ang estatuwa nga akong nakit-an pipila lang ka adlaw ang milabay wala na. Dili ko katuo niini! Duna bay mikuha niini?
Sa simbahan sa pagkasunod semana, nangutana ko og usa ka tawo kabahin sa estatuwa. Natingala siya ug miingon nga ang gambalay wala gayud mabutangi og estatuwa. Apan sa dihang akong gihulagway unsa ang hitsura sa estatuwa, miingon siya, “Ah! Buot nimong ipasabut ang estatuwa ni Moroni? Wala kini sa mga gambalay sa simbahan, apan ang iyang estatuwa anaa sa mga templo.” Miingon siya nga si Moroni mao ang usa ka propeta sa Basahon ni Mormon ug usab adunay nahimong bahin sa Pagpahiuli.
Mihukom ko nga sa hunahuna ra gyud tingali to nako ang estatuwa. Apan akong gisiksik ang Basahon ni Mormon alang sa mga paghisgut bahin ni Moroni. Akong nakat-unan nga nawad-an siya sa iyang pamilya ug mga higala, nga siya gisakitan sa mga sala sa kalibutan, ug nga bisan pa man nianang tanan, gisunod gihapon niya ang sugo sa Dios sa pagpanalipod sa kamatuoran. Nakat-unan usab nako nga siya mipakita ngadto ni Joseph Smith sa makadaghang higayon aron sa paghatag kaniya og mensahe gikan sa Langitnong Amahan. Ang pagkat-on mahitungod ni Moroni ug sa iyang mga pagtulun-an ug kon sa unsang paagi siya mihimo og dakong sakripisyo sa pagsunod ni Kristo ug pagpreserbar sa kamatuoran nakatabang nako nga tinuorayng makabig ang tibuok kong kasingkasing ngadto sa ebanghelyo.
Sa katapusan sa dihang nakabaton ko og oportunidad nga makabisita sa Sapporo Japan Temple, nakita nako ang tinuod nga estatuwa ni Moroni sa unang higayon. Kini mao gihapon ang sama nga estatuwa nga akong nakita sa ibabaw sa akong gambalay sa simbahan. Apan ang usa nga akong nakita nianang adlawa misanag sa hilabihan labaw pa niining kalibutan. Nagtuo ko nga ang “naggilak-gilak nga estatuwa” mao ang usa ka panan-awon gikan sa Langitnong Amahan, nga nagdapit kanako sa pagpangita sa Iyang gugma ug sa kamatuoran sa gipahiuli nga ebanghelyo ni Jesukristo. Sa pagkat-on sa karaang mga propeta sama ni Moroni kinsa mipamatuod kang Kristo ug sa buhing mga propeta kinsa mobuhat sa ingon. Sa pagpangita og direksyon nga gipangita nako og maayo.
Nasayud ko nga ang Ginoo mipahiuli sa ebanghelyo ni Jesukristo pinaagi ni Propeta Joseph Smith ug nga kita adunay buhing mga propeta karon nga Iyang gigiyahan sa pagdala kanato sa kamatuoran ug motabang kanato nga makabalik sa Langitnong Amahan. Ako nasayud nga si Jesukristo mao ang tinubdan sa kalinaw ug kalipay niining kinabuhia ingon man usab sa sunod.
Ang kahayag sa Iyang gipahiuli nga ebanghelyo ug ang tanang panalangin nga nahatag niini hingpit nga nakapausab sa akong kinabuhi, ug sama lang nianang unang adlaw sa simbahan, nasayud ko nga ang Langitnong Amahan mogiya sa akong kinabuhi samtang magpadayon ko sa pagsunod Kaniya ug sa Iyang mga mensahero.