COVID-19: Usa ka Oportunidad sa Pagtutok og usab sa Sentro sa Ebanghelyo

Ni Tyler ug Kiplin Griffin ug Taylor Halverson

Imahe

Litrato sa mga kasulatan ug usa ka mask

Sa tibuok kasaysayan, kanunayng adunay lisud nga mga panahon. Karon, tiningub kita nga nag-atubang og seryuso nga kalisdanan gumikan sa COVID-19. Nadungog nato kini og balik-balik: kini talagsaon nga mga panahon. Daghan kanato ang nabalaka mahitungod sa atong panglawas ug sa kaayohan sa atong mga minahal. Nabati nato ang ekonomikanhon ug emosyonal nga mga epekto gumikan niining kagaw. Maingon nga wala nay butang nga normal. Ug ang misyonaryo nga pagserbisyo ug ang buhat sa templo nabalda. Daghang mga tawo ang mibati og kaugtas tungod sa buluhaton sa pag-usab sa mga naandan diha sa panimalay.

Ang mag-atubang sa kawalay kasiguroan nga umaabut makaingon sa mga pagbati og kahadlok o gani kalisang—tingali gibati ninyo kini. Apan taliwala sa tanan niining mga kasamok, adunay paglaum! Bisan pa man sa kawalay kasiguroan ug mga kausaban, ang mga mahinungdanon ug ang mga sukaranan sa ebanghelyo wala mausab:

Ang pormal nga mga miting sa simbahan ug panagpundok mahimong temporaryong gikansilar o limitado, apan dili ang pagsunod sa ebanghelyo! Kita makapadayon sa pagsimba, pag-alagad, ug pagpraktis sa ebanghelyo sa atong mga panimalay.
Ang Dios anaa pa gihapon sa Iyang kalangitan.
Ang Iyang Anak, si Jesukristo, nagbarug gihapon diha sa ulohan niini nga buhat. Nakasabut Siya sa mga panglimbasug sa kalibutan ingon man usab sa atong personal nga mga panglimbasug. Misaad Siya, “Dili ko kamo biyaan nga daw mga ilong tuwapos” (Juan 14:18). Siya nagpadala sa Espiritu Santo nga mag-uban kanato.¹
Ang Dios mitawag og mga propeta, mga manalagna, ug mga tigpadayag. Ug pinaagi kanila, Siya mipahimutang kon unsay atong eksaktong gikinahanglan sa pagsagubang niini nga unos.² Hunahunaa ang bag-ong nakasentro sa panimalay nga kurikulum, kauban sa ubang mga kausaban, nga nakatabang kanato nga maandam alang niini nga panahon ug sa pagsunod ug sa pagpangalagad sa mas taas ug mas balaan nga mga paagi.³ Kining bag-ohay nga mga kausaban dili mga sulagma—kini gipahimutang sa usa nga nasayud sa tanang butang ug mahigugmaong Dios.

Bisan sa kasamok, ug uban niining mga butang diha sa hunahuna, kita makatutok pag-usab sa sentro sa ebanghelyo, nga naglakip sa hugot nga pagtuo diha sa Ginoong Jesukristo.

Apan unsaon nato sa pagbuhat niana nga hugot nga pagtuo? Gikan sa sinugdanan, ang Ginoo mitugot sa Iyang mga disipulo sa paglahutay og mga hagit bisan wala makaangkon sa tanang tubag. Ang atong mga lintunganay sa hugot na pagtuo makagamot og mas lawom kon kita mogamit sa kabubut-on ug mopadayon sa unahan diha sa atubangan sa kawalay kasiguroan. Si Elder Neil L. Andersen sa Korum sa Napulog Duha ka mga Apostoles mipasabut niini pag-usab, nag-ingon, “Kamo wala masayud sa tanan, apan kamo igo nga nasayud!”⁴

Ang istorya ni Nephi ug sa iyang mga igsoong lalaki nga misulay sa pagkuha sa mga palid nga tumbaga usa ka talagsaong ehemplo niini. Sila nasayud unsa ang gikinahanglan nilang buhaton: pagkuha sa mga palid! Gani sila adunay maayong ideya kon ngano. Wala lang sila masayud kon unsaon sa pagbuhat niini. Human mapakyas og kaduha (tan-awa sa 1 Nephi 3:10–27), si Nephi dili na makasalig sa iyang kaugalingong mga kapasidad. Imbis moundang, misulay siya sa makausa pa. Timan-i ang direkta nga paggamit sa mga pulong ni Nephi sa atong sitwasyon karon:

“Ako giubanan sa Espiritu, wala masayud sa sinugdanan sa mga butang nga ako mobuhat.

“Bisan pa niana ako mipadayon” (1 Nephi 4:6–7).

Bisan pa sa daghang pangutana nga nagbilin og mga timailhan sa atong mga kinabuhi, kon kita “mopadayon” sama ni Nephi, mosalig sa Dios ug magsunod sa Iyang mga propeta ug motutok diha sa hugot nga pagtuo, Siya mogiya ug mohulma kanato. Sa usa ka punto niining proseso, ang atong problemado nga mga pangutana mamahimong sukaranang mga pagtuaw.

Atong usbawan ang atong hugot nga pagtuo kang Jesukristo, ang atong pagsalig sa Iyang mga sulugoon, ug ang atong gugma alang sa usag usa samtang kita nag-atubang sa umaabut. Kining panahon sa tibuok kalibutan nga kasakit ug kalisud mahimong sagrado nga dapit alang kanato nga mas mopaduol ngadto Kaniya. Samtang kita mobuhat sa ingon, ang Iyang matam-is nga kalinaw mopuno sa atong mga kalag, bisan taliwala sa kasamok, ug kita makakaplag og kalig-on ug mga tubag nga atong gikinahanglan.